Tsinikha 3
3
Kamakhula isi basooleli
1Mwaana wase, ukhebilila biilomo byase byeesi ikhuleekela iwe ta.
Nu'liindatsaka kamakaambila kaase mu mwoyo kwoowo.
2Lwekhuuba bibyeene bino kane bikhuliinde
uwangale kimiiko mikali,
naluundi bikhuwe buulamu buulayi bubwikanisa.
3Ukhalekhuula khuukana khukhuukhawawo ni bubwiyikinwa byakhururakho ta.
Uli ni khuubibowa mu milo mwoowo,
bibonekhelele nga bubuuma bwe mu milo;
ubirone khu mwoyo kwoowo mukari.
4 #
Luk 2.52
Musaambo iyo kane ufune bubweela ni lisiina liilayi
mu moni tsa Wele, ni mu moni tse babaandu.
5N'uwiyikinatsake Umukasya ni kumwoyo kwoowo kwoosi,
Ukheyikinatsaka byeesi iwe wambaasa uri waamanya ta.
6Uli ni khuushebulilatsaka Umukasya mu buli shiindu shoosi sheesi ukhola,
ni naye kane akhutsalaasile kumukhoosi kwoowo buulayi khweesi kane ukyeendele.
7 #
Roma 12.16
Ukheyambaasatsaka khuuba uuli ni kamakyesi kakaafuura ke babaandi ta,
ne uli ni khuurya Umukasya wikaane khukhola bye bubwoonaki.
8Nga waakholile uryo, kane bifwaane nga kamasuuswa mu mubili kwoowo,
ni khukhwiwulila buulayi mu makuumba koowo.
9Yiisatsakamwo Umukasya shiriifwa, nga uwaanayo khu bye buyiindifu byoowo,
ni khuuwaanatsakayo biilime bibinyoowa khukhwaama mu mukuunda kwoowo.
10Nga waakholile uryo, ukhaabuunge birara byoowo ni biilyo bikhupake biikali,
ni kamasuuriro koowo kakheetsule iviini, utaambe isi ukibiikha.
11 #
Yob 5.17
#
Heb 12.5,6 Mwaana wase, ukhalekelesa khuuboolelela khw'Omukasya ta,
namwe waamuminyaalila nga akhureewula ta.
12 #
Bimb 3.19
Lwekhuuba Umukasya aleekela abo beesi akana,
nga n'ubona paapa n'aleekela umwaana weewe isi akana naabi.
13Ali ni tsikhabi umuundu ufuna kamakhula,
ni nooyo uuba ni khuumanya.
14Lwekhuuba kamakhula kali ke lisuno khufuurakho ifeetsa,
naluundi niko ke lisuno naabi khuufuurakho izaabu.
15Kamakhula kali ke lisuno naabi khuufuura bubuuma bwe buukusi bwe angaaki,
mbaawo shishiindu shoosi sheesi ukana shishinyala shafwaananakho ni nako ta.
16Kamakhula kakhuwa iwe buulamu bwe kimiiko kimikali,
naluundi mu niko mulimo buyiindifu ni shiriifwa.
17Kamakhula kakhola buulamu bwoowo bwaaba bubwikhoyesa,
naluundi kakhuraangilila khu mukhoosi kwe lukoosi.
18Kamakhula kali nga kuusaala kukureera buulamu isi abo babaakakaanila,
naluundi abo babaakewaambakho, bali ni kumwikhoyo.
19Umukasya aaraambisa kamakhula keewe khuubuumba shibala,
aaraambisa khuumanya waarawo likulu.
20Kamakhula keewe niko kakaakila tsintsitsi tse kameetsi tsaarubukha,
ni kamafuumbi khuulakasa liime.
21Mwaana wase, yiwaambila ilala khu makhula ni khuumanya.
Ukhabilekhuula byaakhururakho ta.
22Kamakhula ni khuumanya kane nibyo bibe bikhuyeeta khuuba umulamu,
ni khuuba ni buulamu buulayi luundi bubwikhoyesa.
23Lwanyuma nio iwe ukyeende mu ntsila yoowo ni lukoosi,
ni shikyele shoowo shilekhe khukhwituya nakhakyeekhe khoosi ta.
24Nga waakonile aasi singene ubekho ni khuurya khwoosi ta,
naluundi nga waakonile aasi mu bulili bwoowo,
kane ukone liilo nameyirira lilyeene.
25Ukharya lwe buukosi bubukwakawo khaangu ta,
namwe lwe khuuhela khwe baboonaki khukhuuba khwaaboolilekho ta.
26Umukasya umweene kane akhuliinde buulayi,
singene afukiilile iwe ukwe mu mureko ta.
27 #
Sir 4.3
Khola buulayi isi babaandu boosi babaakana buyeeti,
musaambo yoosi isi uba unyalisa khuushikhola.
28Ukhaboolela umwesanwa woowo khuutsya aliindekho khukhwoolesa kumukaamba,
ate nga unyalisa khuumuyeeta shaleelo shino ta.
29Ukhambaasa khuukhola buubi khu mwesanwa woowo ta,
niye amenya aambi ni nawe, nga akhwiyikina.
30Ukhakhaabisana n'umuundu yeesi akhali ilomo yoosi ta,
ate nga mbaawo shiibi shoosi sheesi umuundu uyo akhukholile ta.
31Libuba likhakhuwaambila umuundu uwe shituluungu ta,
namwe waakhalawo khuuloondelela she khuubonelakho she buraambi buubi ibwo ta,
32lwekhuuba Umukasya s'akana babaandu babaakhola buubi ta,
ne babaakhola bye buukwalaafu, abakhola khuuba basaale beewe.
33Umukasya ara bitsubo khu tsiingo tse babaandu babaakhola bye bubwoonaki,
ne tsiingo tse bakwalaafu atsiwa tsikhabi.
34 #
Yak 4.6; 1 Pet 5.5 Niye atsekhelela abo babaakanikha biilomo bye khuutsekhelela,
ne okesanisa bubweela bweewe isi babaali baawolu.
35Abo babaali ni kamakhula baliba baasikha be shiriifwa,
ne abo babaali basilu bakhelooselekho khuuswaala.
Currently Selected:
Tsinikha 3: LCE
Highlight
Copy
Compare
Share
Want to have your highlights saved across all your devices? Sign up or sign in
Lumasaaba Catholic Bible © The Bible Society of Uganda, 2017.