Matayo Khukhwaantsula
Khukhwaantsula
Kamakhuuwa Kamalayi nga ni kaaronebwa ni Matayo niko kamakhuuwa kamalayi kakaboola kari Yezu niye umuwonesi uwalomewakho. Mu Yezu uyu nimwo mweesi Wele olelesela bisuubiso byeesi alomela babaandu be Ndakaano Ikhale. Kamakhuuwa kano kamalayi sikali kamakhuuwa kamalayi isi Bayudaaya bonyene isi Yezu asaalikhila ta, ne kali kamakhuuwa kamalayi isi shiibala shoosi.
Shitabo shino sha Matayo sharuungikhibwa ni bubwitsililisi bukali. Shirakikha ni khusaalikha khwa Yezu, shakanikha khu khubatisibwa ni khu khukhakibwa khweewe. Shiryo shitsya shabalaayisa khu buraambi bweewe bwe khuboolela kamakhuuwa, ni khuleekela, ni khuwonesa balwaale i Galilaaya. Lwanyuma lwa bino Matayo akhwokesanisa nga Yezu n'akyeenda khukhwaama i Galilaaya khuutsya i Yerusalemu, ni n'ebyo byoosi byeesi akholela mu sabiiti iyakamayo nga nibyo bibyamwoolesa khu khwiribwa, ni khulamukha.
Kamakhuuwa kano kakhwokesa Yezu nga n'ali umuleekeli umukhulu naabi, uli ni bunyala khuleekela khu makaambila ka Wele, lundi nga niye uleekela bibiwaamba khu Buyiinga bwe mwikulu.
Byeesi Yezu aleekela byakabananisibwamo bisiintsa biraano: (1) Indeekela ye khu lukiingi, esi Yezu akanikhila khu saambo, ni bufunisi, ni bilayi, ni intsakamo ye babekhali be mu Buyiinga bwe mwikulu (Tsisuula 5-7); (2) Bye khukaambilila baleekelwa liikhumi na babili lwe kumulimo kwawe (isuula ye 10); (3) Tsisimo tsitsiwamba khu Buyiinga bwe mwikulu (isuula ye 13); (4) Indeekela iwaamba khu buleekelwa sheesi bumanyisa (isuula ye 18); (5) Khuleekela khukhuwaamba khu ntsakamo iye kumuboolo kuno, ni khukhwiitsa khwe Buyiinga bwe mwikulu (Tsisuula 23-25).
Inoondekhana iye bibiilimo
Shikuuka ni khusaalikha khwa Yezu Kristu (1.1—2.23)
Buuraambi bwa Yohana Umubatisa (3.1-12)
Khubatisibwa ni khukhakibwa khwa Yezu (3.13—4.11)
Buuraambi bwa Yezu bwa lubuula mu Galilaaya (4.12—18.35)
Khukhwaama i Galilaaya khuutsya i Yerusalemu (19.1—20.34)
Sabiti iyakamayo i Yerusalemu (21.1—27.66)
Khulamukha ni khubonekha khw'Omukasya (28.1-20)
Currently Selected:
Matayo Khukhwaantsula: LCE
Highlight
Share
Copy
Want to have your highlights saved across all your devices? Sign up or sign in
Lumasaaba Catholic Bible © The Bible Society of Uganda, 2017.