Matayo 19

Yezu aleekela khu bye khuwoona umukhasi

(Mrk 10.1-12)

1Ulwo nga Yezu wamalile khuloma aryo, warura i Galilaaya, watsya mu shaalo she Yuda, injelekha we luluutsi Yorudaani. 2Kamatuuli makali ke babaandu kamulondelela, naye wabawonesela ibweene iyo.

3Bafarisaayo beetsa is'ali khumukhakilisa. Bamureeba bari, “Shifukiilisibwa mu makaambila keefwe umuundu khuwoona umukhasi weewe nga amufunisa buli lomo yoosi?”

4 # Rak 1.27; 5.2 Yezu wabelamo ari, “Simwasomatsakakho bibyaronebwa bikhosefu bibiloma biri, ‘Iburakikhilo, umubuumbi abuumba boombi umusaani n'umukhasi?’ 5#Rak 2.24Nio ndi waloma ari, ‘Lwe lomo yino, umusaani alilekha paapawe ni maayiwe, etubaase n'umukhasi weewe, ni nabo boombi bekyele kumubili mutweela?’ 6Ni nashiryo, si baba bashiili babili ta, ne baba bekyelile kumubili mutweela. Aso, sheesi Wele aba watubaasile atweela, umuundu yeesi akhawukhanisa ta.”

7 # Maka 24.1-4; Mat 5.31 Bafarisaayo bamureeba bari, “Ne lwashiina Musa alakila ari, umusaani awe umukhasi weewe buurone bwe khumuwoona nio amuwoone?”

8Yezu wabelamo ari, “Musa abafukiilisa khuwoona bakhasi beenywe lwekhuba kimyoyo kyeenywe sikileekikhila ta. Ne khukhwaama makiboole sishaba shiryo ta. 9#Mat 5.32; 1 Kor 7.10,11Ne imbaboolela ndi, buli umuundu yeesi uwoona umukhasi weewe, khurusakho khulwe buyeyani, ne wakhwa ukuundi, aba wayeyanile.”

10Kila baleekelwa beewe bamuloma bari, “Noola bili biryo by'omuseetsa n'umukhasi, shiba shilayi khulekha khukhwa ta.”

11Yezu wabelamo ari, “Sibali boosi babanyala khufukiilisa bilomo bino ta, khurusakho isi ibo bababiweebwa. 12Lwekhuba iliwo tsilomo tsikhali ndweela tsitsireesa basaani balekha khukhwa ta. Baliwo babaandu babakhakhwa ta, lwekhuba basaalikha baryo; baliwo babaandi babakhakhwa ta, lwekhuba bayomolebwa ni babaandu, baliwo babaandi babakhakana khuukhwa ta lwe Buyiinga bwe mwikulu. Uyo unyala khukhola shino, n'afukiilile khuleekelwa khuno.”

Yezu awa babaana bafwiiti tsikhabi

(Mrk 10.13-16; Luk 18.15-17)

13Shifukhu shitweela, babaandu bareera babaana bafwiiti isi Yezu bari abarekho kamakhono keewe, lundi abaloombele. Ne baleekelwa beewe barafuyila ibo bababareera.

14Ne Yezu waloma ari, “Ni mubalekhe babaana bafwiiti beetse isi indi, mukhabashinjilila ta, lwekhuba Buyiinga bwe mwikulu buli bwe babafwana nga bano.” 15Aryo lwanyuma nga wabareerekho kamakhono keewe, warurayo, watsya.

Umusaani umuyindifu

(Mrk 10.17-31; Luk 18.18-30)

16Lwanyuma abonekhawo umusaani umuyindifu uweetsa isi Yezu, wamureeba ari, “Umuleekeli, ikhole bilayi shiina, nio ifune bulamu bubuukhawawo ta?”

17Yezu wamwiilamo ari, “Lwashiina undeeba ise khwiibyo bibiwaamba khu bilayi? Aliwo mutweela yenyene niye uli Umulayi. Ne noola ukana khukhwinjila mu bulamu, wulilatsaka kamakaambila.”

18 # Luky 20.13; Maka 5.17 Luky 20.14; Maka 5.18 Luky 20.15; Maka 5.19 Luky 20.16; Maka 5.20 Umusaani tsana wamureeba ari, “Niko kali?”

Yezu wamwiilamo ari, “Ukheera ta, ukhayeyana ta, ukheeba ta, ukhaapa umuundu washoowo liyino ta. 19#Luky 20.12; Maka 5.16 Lev 19.18Yiisatsakamo paapawo ni maayiwo lukoosi, lundi ukanatsake umwesanwa woowo, nga iwe ni wikana wamweene.”

20Umusaani tsana yuno wamwiilamo ari, “Ibyo byoosi naabiwambatsaka, ne shiina shishiindi shishindaambakho?”

21Yezu naye wamwiilamo ari, “Noola ukana khuuba umukwalaafu, tsya, ukulise ibyo byoosi byeesi uli nabyo, ukabile bataambi bibyaamamo, ulwo kane ube ni buyiindifu mwikulu. Lwanyuma wiitse unondelele.”

22Ne umusaani yuno n'awulila shino, watsya nga mukhalafu naabi, lwekhuba aba ni buyiindifu bukali naabi.

23Lwanyuma Yezu walomela baleekelwa beewe ari, “Ilala imbaboolela ndi shiliiba shihangafu naabi umuundu umuyindifu khukhwinjila mu Buyiinga bwe mwikulu. 24Lundi imbaboolela ndi, shili shangukho iŋamya khubirira mu mwanya kwe mpiso, khufuurisa umuundu umuyindifu khukhwinjila mu Buyiinga bwa Wele.”

25Ne baleekelwa ni baawulila shino, beyaanga busa nga bareeba bari, “Ari naanu unyala khuwonesebwa?”

26Yezu wabalolelela, wabaloma ari, “Isi babaandu shino sishinyalikhana ta, ne isi Wele bibiindu byoosi binyalikhana.”

27Lwanyuma Petero wamwiilamo ari, “Bona ifwe khwalekha byoosi, khwakhulondelela iwe, ne khulifuna shiina?”

28 # Mat 25.31; Luk 22.30 Yezu wabaloma ari, “Ilala imbaboolela ndi, mu muboolo kumushaakha nga Umwaana w'Omuundu wekhaale khu shitsoloŋo she shiriifwa, ni nanywe mumuliba nga munondelela, mulikhala khu bitsoloŋo liikhumi na bibili, nga mukhalila bikuuka liikhumi na bibili bye ba Isiraeli kumusaango. 29Na buli mundu yeesi uwalekha tsinusu, namwe babandaaye, namwe bakooko, namwe paapawe, namwe maayiwe, namwe babaana, namwe kimikuunda khu lwase, alifuna kimilundi shitoondo khufuurisakho, lundi asikhile bulamu bubuukhawawo ta. 30#Mat 20.16; Luk 13.30Ne bakali babaali baakiboole ari, baliiba bamalilisi, ni bamalilisi ari, baliiba baakiboole.”

Currently Selected:

Matayo 19: LCE

Highlight

Copy

Compare