Matayo 10
10
Baarume liikhumi na babili
(Mrk 3.13-19; Luk 6.12-16)
1Yezu walaanga baleekelwa beewe liikhumi na babili, wabawa bunyala bwe khuwoonatsaka kimisaambwa kimibi, ni khuwonesatsaka buli ndwale, na buli butsiina bwoosi. 2Ni kamasina ke baarume beene liikhumi na babili niko kano: uwanyoowa niye Simoni (ulaangiwa Petero) ni wandaaye Andereya; Yakobo ni wandaaye Yohana, nga boombi babaana ba Zebedaayo; 3Filipo ni Batolomayo; Tomasi ni Matayo, uwaba umubusanisi we kumusolo; Yakobo umuwana wa Alufayo; ni Tadewo; 4Simoni uwaba atsiinikhila naabi linaambo lyeewe (beesi balaanga bari Zelote); ni Yuda Isikalyoti, niye uwalyamo Yezu luwomelo.
Yezu arumana baarume liikhumi na babili
(Mrk 6.7-13; Luk 9.1-6)
5Yezu warumana basaani bano liikhumi na babili, nga abalomela ari, “Mukhatsyakho mu shisiintsa shoosi she Banaambo ta, namwe mukhenjilakho mu shiriimba shoosi she Basamariya ta. 6Ne shilayi mutsye isi kamasheese kakakoraana ke mu ntsu ya Isiraeli. 7Ni muba nga mutsya, mulaangilile muri, ‘Buyiinga bwe mwikulu bwolele ambi.’ 8Muwonese balwaale, mulamuse baafu, muwonese ibo babaali ni bulwaale bwe bikeenge, nalundi muwoonatsake kimisaambwa kimibi. Inywe mwawebwele busa nga mbaawo sheesi musasuule ta, ni nanywe muryo ni muwanatsake busa. 9Mukhasuta izaabu, namwe ifeeza, namwe tsinusu musutilo tseenywe ta. 10#1 Kor 9.14; 1 Tim 5.18Namwe mukhasuta isutilo ye lukyeendo ta, namwe tsingubo tsibili ta, namwe bilaalo ta, namwe imiimbo iye khukhwitiila ta. Lwekhuba umuraambi akhila kumukheemba kweewe kweebyo bibimwakhila.
11“Ne mu buli shiriimba namwe shishaalo sheesi mwinjilamo, mutsya muweentse umuundu umulayi, unyala wabakaanila, mumenye w'omweene uyo, khukhwoolesa ni mururayo. 12Ni muba nga mwinjila mu ntsu, musheesatsaka ibo babakilimo. 13Ne mu ntsu umwo ni mubamo babaandu bababakaanila, khusheesa khweenywe khwe lukoosi khurame khu nibo. Ne ni baba nga si baakhila ta, khusheesa khweenywe khwe lukoosi khukobolatsake isi muli. 14#Bur 13.51Ne mungo mwoosi, namwe shiriimba shoosi isi bekaana khubekhoyela, namwe balekha khubawulilisa bilomo byeenywe ta, ni muba nga murura mu ntsu iyo, namwe mu shiriimba isho, musisakulatsaka lufuumbi luluuli khu bikyele byeenywe. 15#Mat 11.24 Rak 19.24-28#Luk 10.4-12Ilala imbaloma ndi, khu shifukhu she khukhalilakho kimisaango, Wele aliwambila babaandu be mu shiriimba Sodoma, ni Gomora#10.15 bino byaba biriimba byeesi Wele ahesa lwe bumoyaani bwaabwe mu muboolo kwa Ibulayimu. shiisa khufuurisa babaandu be mu shiriimba isho.”
Bitaambiso bibiliitsa
(Mrk 13.9-13; Luk 21.12-17)
16 #
Luk 10.3
Yezu weloosela wabalomela ari, “Bona ise imbarumana nga kamasheese akari mu bitsuutse. Nashiryo, ni mube ni kamakyesi nga tsindemu, nalundi mube bawolu nga kamawuusi.
17 #
Mrk 13.9-11; Luk 12.11,12; 21.12-15 “Ne ni mwiliinde babaandu, lwekhuba balibawamba babawaneyo isi tsimbusano tse Bayudaaya, nalundi babakhupile tsimiimbo mu ntsu tsye khukhwisaayilamo. 18Ni lwe khubafunisa ise, balibakhweeselesa, babayile isi bawuli, ni bayiinga, nio mube bajulisi baase isi nibo, ni isi Banaambo. 19Ne ni kane babawaneyo, mukheyembelela lwe byeesi munyala khukanikha ta, namwe isaambo yeesi munyala khukanikhamo ta, lwekhuba mu saawa inyene iyo, muliweebwa byeesi muliloma. 20Lwekhuba bilomo byeesi muliloma sibiliiba bibyeenywe ta, ne bilyaama isi Umwoyo wa Paapa weenywe, nga niye ukanikhila mus'iinywe.
21 #
Mrk 13.12; Luk 21.16 “Babaandu baliwaanayo babandaayabwe khukhwiribwa, ba paapa balikhola shishiindu sheene nisho shitweela isi babaana baawe, ni babaana nabo balinyukhila basaali baawe babeere. 22#Mat 24.9; Mrk 13.13; Luk 21.17 Mat 24.13; Mrk 13.13Babaandu boosi balibabiiyila inywe, lwe khubafunisa lisiina lyase. Ne uyo ulihandalala khukhwoolesa ibumaliliso, niye uliwonesebwa. 23Ne ni balibataambisila mu shiriimba shitweela, mwilukhila mu shiriimba shiindi. Ilala imbaboolela ndi Umwaana w'Omuundu aliitsa nga mushiili na khumalilisa kumulimo kweenywe mu biriimba byoosi bya Isiraeli ta.
24 #
Luk 6.40
Yoh 13.16; 15.20 “Mbaawo umuleekelwa ufuura umuleekeli weewe ta, namwe mbaawo umwakaanisi ufuura umukoosi weewe ta. 25#Mat 9.34; 12.24; Mrk 3.22; Luk 11.15Ne umuleekelwa shiba shimumala, n'aba wekyelile nga umuleekeli weewe, n'umwakaanisi khukhwikyela nga umukoosi weewe. Baryo babaandu ni baba nga balaangile umweene mungo khuuba Belizebuli, si balifuurisakho naabi khulaanga be mungo mweewe baryo!
Naanu isi khwaakha khuurya
(Luk 12.2-7)
26 #
Mrk 4.22; Luk 8.17 “Nashiryo, mukharya babaandu ta. Lwekhuba mbaawo shishabiimbiwakho shishikhalibonesebwa ta, namwe shishabisibwa shishikhalimanyikha ta. 27Ise sheesi imbaboolela mu shilima, mushilomatsaka mu lubuula; ni sheesi muwulilila mu shimoonyo mushilaangilila khu ntsu khu ngaaki. 28Mukharya abo babeera kumubili ne balekha khunyala khukhwiira kumwoyo ta. Khurusakho ni muryatsake uyo unyala khuwesa kumubili ni kumwoyo kweene atweela mu mulilo kukukhasima ta. 29Banamundyoole babili si banyala khukulisibwamo liŋooti litweela? Ne mbaawo na mutweela khu nibo unyala wakwa asi nga Paapa weenywe akhumanya ta. 30Ne inywe ni litsuune liliili khu mirwe kyeenywe lyoosi lyamala khaale ni khubaliwa. 31Ni nashiryo, mukharya ta, inywe be lisuno likali khufuura banamundyoole bakali.
Khubuula ni khukhwikaana Kristu
(Luk 12.8-9)
32“Aso, buli mundu yeesi uwibuula ari ali uwase mu moni tse babaandu, ni nase ndyo indimubuula isi Paapa wase uli mwikulu. 33#2 Tim 2.12Ne buli mundu yeesi uwuntsikaanila mu moni tse babaandu, nase ndyo indimwikaanila mu moni tsa Paapa wase uli mwikulu.
Khukhwawukhanisa ne akhuba lukoosi ta
(Luk 12.51-53; 14.26-27)
34“Inywe mukhambaasa muri ise neetsa khureera lukoosi khu shiibala ta. Ne ise neetsa khureera lurima lwe khukhwawukhana. 35#Miik 7.6Lwekhuba ise neetsa khureerawo khukhaandisana akari o mwana umusiinde ni paapawe; akari o mwana umukhaana ni maayiwe, akari o mukhaana umumasaala ni maayiwe umumasaala. 36Ni basiku boowo babafuura buubi kane babatsake be mu ntsu yoowo.
37“Umuundu yeesi ukana naabi paapawe namwe maayiwe, namwe babaana beewe besiinde, namwe be khaana, khufuurisa ise, s'akhila khuuba umuleekelwa wase ta. 38#Mat 16.24; Mrk 8.34; Luk 9.23Ne uyo ukhakane asute kumusalaba kweewe anondelele ise, aba s'akhila ni khuuba umuleekelwa wase ta. 39#Mat 16.25; Mrk 8.35; Luk 9.24; 17.33; Yoh 12.25Uyo ukhakakho khuwonesa bulamu bweewe, alibufwilwa, ni nooyo ufwila bulamu bweewe khu lwase, alibunyoola.
Biwaanwa
(Mrk 9.41)
40 #
Luk 10.16; Yoh 13.20
Mrk 9.37; Luk 9.48 “Umuundu yeesi ubakaanila inywe, aba wantsakaaniile ise, ni nooyo uwuntsakaanila ise, aba wakaaniile uyo uwanduma ise. 41Umuundu yeesi uwakaanila umuŋoosi lwekhuba ali umuŋoosi, alifuna shiwaanwa shishakhila umuŋoosi. Ni nooyo uwakaanila umuundu umukwalaafu lwekhuba ali umukwalaafu, umuundu uyo alinyoola shiwaanwa shishakhila umuundu umukwalaafu. 42Ne buli mundu yeesi uwakho mutweela khu bakyeekhe bano kameetsi kamanyire ke khuunywa lwekhuba bari ali umuleekelwa wase, ilala imbaloma ndi, umuundu uyo alifuna kumukheemba kweewe.”
Currently Selected:
Matayo 10: LCE
Highlight
Copy
Compare
Share
Want to have your highlights saved across all your devices? Sign up or sign in
Lumasaaba Catholic Bible © The Bible Society of Uganda, 2017.
