Malaki 2

1Ne ari, likaambila lino libawaamba khusi inywe basaayi. 2Umukasya alikho aloma ari, nga simwamurekeeresire niye ta, namwe nga simwawaambiile mu myoyo kyeenywe likaambila lye khukhwiisamo shiriifwa mu lisina lyeewe ta, kane abasiindikhile inywe shiitsubo. Khulwekhuuba simurekeeresa byeesi niye aloma ta, kane ashuuse tsiikhabi tsyeenywe, tsiikelemo biitsubo; ilala biitsubo bibyeene. 3Ise ikhaawe lisaaye lyeenywe shitaambiso, imbakhupile kamasisye ke tsisaayilo tsyaabwe mu moni mwaabwe, imbatimise inywe mururewo isi ise ndi, mutsye. 4#Bala 3.11-13Umukasya aloma ari kane shikile inywe mumanye muri niye waabawa inywe kamakaambila keewe; nio akile mutsiile khu bye indakaano isi niye aamala khaale khuukhola ni Levi. 5#Bala 25.12Indakaano isi ise nakhola ni naye yaba iye khuureerawo buulamu ni lukoosi. Ise nakimuwa niye indi akiisyemo lukoosi; ni ilala niye waakisamo lukoosi, niye waamenya buulamu bweewe bwoosi nga esamo lisina lyase lukoosi. 6Byeesi niye aleekela abe bili bya ŋali, nga imbaamo bye bubeeyi ta. Niye buulamu bweewe abe buli bwe bukhosefu, naluundi abe aloondelela byeesi ise inoma, waalekha khukholakho bye bubwoonaki ta.

7Khulwekhuuba babaandu batsiila khu byeesi basaayi baloma, naluundi baweentsa bye kamakhula khukhwaama khu basaayi, nga bamanyile bari basaayi bali baarume b'Omukasya, uwe kamaani. 8Umukasya aloma ari, ne bona inywe mwayantsukha kumukhoosi ukwo; naluundi khulwe ndeekela yeenywe imbi, inywe mwaakila babaandu baakali baarura khu mukhoosi ukwo. Inywe mwafuniaaka indakaano isi ise nakhola ni kuuka weenywe Levi. 9Ni nashiryo khu luwaande lwase, nase kane ingile babaandu babalekelese inywe nga si babawa lukoosi ta, khulwekhuuba mwafuniaaka indakaano yase, nga simuleekela bya ŋali byoosi nga ni byakhiile khuuba ta.

Tsindakaano tsyeesi babaandu baafuniaaka

10Inywe simwamanya muri ifwe fweesi khuli ni Wele, niye uuli paapa weefwe ta? S'aali Wele mutweela niye uwakhubuumba ifwe fweesi ta? Ne ari shiina kila buli mutweela alyakhana uwasheewe, khwaaba nga khufuniaaka indakaano iye bakuuka beefwe? 11Babaandu be mu Yuda si bali babeyikinwa ta, naluundi bibiindu byeesi babaandu be mu Isiraeli ni Yerusalemu bakhola, bili bibiwaambisa kamaŋaanyu. Mu khwisaaya ba wele be kamanaambo kakaandi, babaandu be mu Yuda baakhola shishiindu shishiili she mbikho isi Umukasya. 12Khali babaandu boosi babaakhola bibiindu nga ibyo, Umukasya abatuumile ibulafu we lituuli lye lisaaye lya Yakobo, abe ikhaba nga bareera biwaanwa isi Umukasya, uwe kamaani.

13Shishiindu shishiindi sheesi inywe mukhola nisho shino: inywe mutsya khu sheeso sh'Omukasya, mwakukuula nga mulila, mwakwiisakakho kamasika, khulwekhuuba niye s'enaanayo namwe wakaanila biwaanwa byeenywe ta. 14Isho shaakila inywe mwereeba muri, “Ne shiina kila?” Ilomo ili ndi, imbawo namutweela khusiinywe uwamenya nga ali umwiyikinwa isi umukhasi weewe ta. Buli mutweela khusiinywe aasuubisa ari umukhasi uyo atsya khuba umusaale weewe, ne ari mwafuniaaka shisubiso isho. 15Wele niye uwabuumba umukhasi uyo, nga amuwa kumubili ni kumwoyo. Ne ari inywe mweembi, sheesi Wele abakanakho nisho shiina? Abakanakho khuusaala ni khuutsowesa babaana babaarya Wele. Ni nashiryo muli ni khukhwitsiiliilisa mubone muri buli mutweela khusi inywe ali ni khuuba umwiyikinwa isi umukhasi weewe. 16Umukasya Wele wa Isiraeli aloma ari, niye s'akana umusaani yeesi wawoona umukhasi weewe ta. Khulwekhuuba, isho shiba shikholwa she shisaayuumba. Nashiryo muli ni khukhwitsiliilisa, mubone muri muli babeyikinwa.

17Inywe muluyisa Wele ni byeesi muloma. Ne shitweela busa mwereeba muri, “Ne khumuluyisa khuryeena?” Nga muloma muri, “Abo boosi babaakhola bye bubwoonaki bali baalayi mu moni tsy'Omukasya umunyali wa byoosi, naluundi muri abekhoyela.” Naluundi mwaareeba na khureeba muri, “Ilala, Wele akhola bya ŋali?”

Currently Selected:

Malaki 2: LCE

Highlight

Copy

Compare