Hagayi 2

Shiriifwa she Lisaayilo Likhulu lishaakha

1Nga biifukhu kabili na shitweela mu mweesi kwe kumusaafu, kwe kumwiiko mweene ukwo, Umukasya waakanikha luundi isi Hagayi, nga amuwa buurume ayilile babaandu tsana nibo batweela. 2Umukasya waamulomela ari, “Tsya uboolele Zerubabeli, gafana wa Yuda, ni Yoswa umusaayi umukhulu, ni babaandu boosi uri, 3#Ezira 3.12‘Iliwo khus'iinywe umuundu uwabonakho Lisaayilo Likhulu amataayi ni shiriifwa shalyo? Ne ari ni muliloleelela, libabonekhela liryeena? Ari libonekha nga shishiindu shishikhalimwo ta.’ 4Ne ari Zerubabeli, ni Yoswa, ni babaandu mweesi, mukharya ta. Muli ni khuuba baanyindaalifu, murakikhe buuraambi ubwo, khulwekhuuba ise samweene Umukasya, indi ni nanywe, kane imbayeete. 5#Luky 29.45,46Inywe nga mwaama mu Misiri, ise nabasuubisa indi ikhaabatsake ni nanywe. Ni nashiryo, mukharya ta, khulwekhuuba ise ndiwo ni nanywe.

6 # Heb 12.26 “Khulwekhuuba mu mbuka ikhali iye aleeyi ta, ise ingana khunikinisa likulu, ni shibala, n'inyaantsa. 7Kane ise indengaase kamanaambo koosi, nio akile bye buyiindifu byaabwe bireerebwe ano, ni Lisaayilo lino likhetsulemo bye buyiindifu. 8Ifeetsa yoosi n'izaabu yoosi, bye khu shibala khuno, bili bibyase. 9Lisaayilo lishaakha kane libe ni shiriifwa shishiminyisakho she litaayi. Naluundi babaandu baase kane babe ni buyiindifu, bamenye mu lukoosi.”

Umuŋoosi ereebakho isi basaayi

10Khu shifukhu shishikhola kamakhumi kabili na bine, mu mweesi kwe shisyeenda, kweesi balaanga bari Kisilefu, mu mwiiko kukuukhola khabili nga Dariyusi ali umuyiinga, Umukasya waakanikha isi Hagayi luundi. 11Waalomela Hagayi ari, “Khayo basaayi bakhalewo khu biwaamba khu lomo yino: 12N'iiba bari umuundu waabukuule inyama ikhosefu khukhwaama khu yeesi bakholeele Umukasya isaayilo, waakisutila mu ngubo yeewe, ne ingubo iyo yetiila khu mukaati kwoosi, namwe tsinyanyi, namwe khu viini, namwe khu mafura ke kuusaala ku olivu, namwe khu shilyo shoosi, bibiindu ibyo nabyo biikela biikhosefu?” Lwanyuma basaayi beelamo bari, “Taawe, sibiikela biikhosefu ta.”

13 # Bala 19.11-22 Kila lwanyuma Hagayi areeba ari, “Ne n'iiba bari umuundu ulikho bunyaalu khulwe khukhwitiila khu mufu, ni etiila khu biindu ibyo, nabyo bikela binyaalu namwe ta?” Basaayi beelamo bari, “Bibiindu ibyo biikela binyaalu.”

14Nashiryo Hagayi waaloma ari, “Umukasya aloma ari linaambo lyoosi lili lye saambo iyo. Buli buraambi bweesi linaambo likhola, na buli sheesi bawaanayo, byoosi bibiilikho bunyaalu, sibifukiilisibwa mu moni tsy'Omukasya ta. 15Ne khukhwaama ari, bibiindu bitsya khushuukhakho bibatsiile buulayi. Nga abe mushiili khurakikha khukhwombakha Lisaayilo ta, 16abe bibiindu sibili khuubatsiila buulayi ta. Abe uri mutsya khukyesa biilimwa nga mweyikinile muri munafunamo tsikilo bitoondo bibiili (200), mwaafuna shitoondo shitweela (100). Abe uri mutsya mu lisuuriro lye viini nga mweyikinile muri munafunamo tsi lita shitoondo shitweela, mwafunamo kamakhumi kane konyene. 17Amataayi ise nabasiindikhila inywe ikhuungu iye kamaani, ni kamararara khukhwoonakisa ibyo byoosi byeesi abe mukhakakho khuumiitsa. Ne shitweela busa mwaalekha khukhwibiiyisa mukobola isi ise Umukasya ta. 18Shifukhu she shaleelo shili she kamakhumi kabili na bine, she kumweesi kukuukhola syeenda. Khu shifukhu khuno nikhwo khweesi mumaliilisiile kumusiingi kwe Lisaayilo. Kane mubone bibiindu nga ni kane bibe khukhwaama khu shifukhu she shaleelo. 19Ikhaba nga mushiili khukyesa byeesi mwamiitsa ta, ni kimizabibu, ni kimisaala kimifiki ta, ne khukhwaama lwe shaleelo, kane ise imbawe inywe tsiikhabi.”

Bisuubiso by'Omukasya isi Zerubabeli

20Khu shifukhu sheene isho nga kabili na bine, Umukasya waakanikha isi Hagayi luundi nga aloma ari, 21“Tsya uboolele Zerubabeli, gafana uwa Yuda uri, Umukasya ali aambi akana khutengaasa likulu ni shiibala, 22afuure kamanaambo koosi ni baawuli baako. Ali aambi akana khwoonakisa kamaani ke buyiinga bwe kamanaambo, onakise kamakaali kaabwe ke mu busoolo ni basilikhale babaakaraambisa. Kane tsiŋwaaŋwa tsifwe, akile basilikhale babatsiikhalakho bakwe aasi, barakikhe khukhwiirana bonyene na bonyene. 23Khu shifukhu isho, ise Umukasya, ikhaakhuwaambe iwe Zerubabeli, umwaana uwa Sheyalityeli, khuukhola kumulimo kwe buwuli mu lisina lyase. Umukasya aloma ari, niye umweene waakhuroboore iwe.”

Currently Selected:

Hagayi 2: LCE

Highlight

Copy

Compare