Hagayi 1

Khukhwoombekha Lisaayilo Likhulu bushaakha

1 # Ezira 4.24—5.2; 6.14 Aabawo imbuka indweela, nga umusaani isi balaanga bari Dariyusi ali umuyiinga uwa Pasiya. Mu mwiiko kweewe kukuukhola khabili kwe buyiinga, khu shifukhu shishinyoowa, mu mweesi kukuukhola khasesaba kwe Bayudaaya, Umukasya waasiindikha buurume, nga akanikha khuubirira mu muŋoosi Hagayi. Buurume buno bwaba butsya isi Zerubabeli uwaba abe uuli gafana uwa Yuda, nga ali umwaana uwa Sheyalityeli; ni isi Yoswa uwaba umusaayi umukhulu, nga ali umwaana uwa Yehozadaki.

2Umukasya umunyali uwa byoosi, waalomela Hagayi ari, “Babaandu bano baloma bari imbuka inyene iye khukhwoombekhelamo Lisaayilo Likhulu bushaakha, ishiili khukhwoola ta.” 3Ne Umukasya waasiindikha buurume buno isi babaandu, nga bubirira mu muŋoosi Hagayi, nga buloma buri: 4“Bona babaandu baase bamenya muntsu tsindayi naluundi tsiimiliwu, ne Lisaayilo Likhulu lyaayikela busa likubili. 5Nashiryo, ari inywe ni mubone bibiindu bibiili khuubakholikhakho. 6Mulikho mumiitsa biilyo biikali, ne mukyesa bikyeekhe biri. Bye khuulya ni bye khuunywa byeesi muli ni nabyo, sibibamala ta. Ikhaba nga muli ni bikwaaro, ne shitweela busa imbewo ibakhuuna. Kumukheemba kweesi mufuna khukhwaama mu buraambi bweenywe, sikubamala mu byeesi mwikoomba ta.

7“Inywe nimubone bibiindu bibiili khuubakholikhakho. 8Ni muniine mu lukiingi mutsye mureme kimisaala, mwombakhe Lisaayilo Likhulu bushaakha. Isho kane shibanyalise inywe khukhuuntsisaayilamo ise, naluundi nio shinyalise khukhuusangaasa ise.

9“Inywe mwasuubila likyesa liikali, ne mwaamisamo bikyeekhe biri. Naluundi ni mwareera bye likyesa lyeenywe isi ise, ise nakila lyaakoraanawo. Shiina kila ise nakhola isho? Ise nakhola isho khulwekhuuba mwalekha Lisaayilo khuuba likubili, ne inywe mwaayiwaambila mu khumiliyisa tsiintsu tsyeenywe. 10Isho nisho shishikila mwaalekha khuuba n'ifula ta, naluundi mwaalekha khuukyesa byeesi mumiitsa ta. 11Ni nashiryo ise naalakiile indi kane abewo simiyu, nga mbaawo ifula mu mikuunda kyeenywe, ni mu bilimwa byeenywe, ni maayilwe keenywe ta, ikhaba khu baandu ni khu bisolo. Abe mwaakharaamba, mbaawo sheesi kane mwaamisemo ta.”

Babaandu baloondelela Likaambila lya Wele

12Nio lwanyuma, Zerubabeli ni Yoswa, atweela ni babaandu boosi abe babaamala khuukobola khukhwaama i Babulooni, baaloondelela byeesi Umukasya aabalomela khuukhola, nga abirira mu muŋoosi Hagayi. Shino shaakila babaandu beesamo Umukasya shiriifwa. 13Lwanyuma Hagayi waawa babaandu buurume bubwaama isi Umukasya, nga aloma ari, “Ise imbasuubisa indi kane imbe ni nanywe.” 14Nashiryo Umukasya waabaramo boosi kumwooyo kwe khuuraamba ni kamaani. Muno nga nimwo mumuuli Zerubabeli, uwaba gafana uwa Yuda, ni Yoswa, abe uli umusaayi umukhulu, ni babaandu boosi abe babaakobola khukhwaama mu bubowe. Boosi baatsya baraamba khu Lisaayilo ly'Omukasya. 15Nashiryo, nga biifukhu kamakhumi kabili na bine, bye kumweesi kukuukhola khasesaba, mu mwiiko kweene kukuukhola khabili mu buwuli bw'omuyiinga Dariyusi, baarakikha buuraambi.

Currently Selected:

Hagayi 1: LCE

Highlight

Copy

Compare