Buraambi 17
17
Paulo ni Silasi mu Sesalonika
1Paulo ni Silasi ni baaba nga babirire mu Anfipoli ni Apoloniya, boola i Sesalonika, shiriimba shishabamo intsu iye khukhwisaayilamo iye Bayudaaya. 2Paulo wenjila mu ntsu iye khukhwisaayilamo tsana, nga niyaba isaambo yeewe, wakhaandisana ni babaandu khu byaronebwa bikhosefu, khumala bifukhu bya Sabato bitaru nga bilondekhana. 3Aryo waba nga abasontsoola, lundi nga abaŋaŋasa ari Kristu aba ali ni khutaambisibwa, ni khulamukha khukhwaama mu bafu. Lundi wabaloma ari, “Yezu yuno isi imbaboolelakho niye Kristu.” 4Balala khu Bayudaaya bakhonjelesebwa betubaasa khu Paulo ni Silasi. Ni Bayonaani nabo swa busa, babaaba besaaya Wele, ni bakhasi bakalikho busa babaamanyikhana nabo babetubaasakho.
5Ne Bayudaaya babaandi libuba lyabawamba, babusanisaka babaandu babakyeendaana busa be mu shiriimba, betubaasa atweela, benyusa shisaayumba mu shiriimba. Bekhuula, baatsya bebotokhelela intsu ya Yasoni, nga baweentsa Paulo ni Silasi, bari babareere isi lituuli lye babaandu. 6Ne ni balekha khubanyoola ta, bakhweeselesa Yasoni ni be buulebe babaandi, babayila isi bawuli be shiriimba, nga balomela angaaki bari, “Basaani bano babareera shisaayumba mu shiibala shoosi, bona, boolele ni nahano, 7ni Yasoni wabakaanile mungo mweewe. Boosi balikhukhola bibikhaandisana ni kamakaambila ka Kayisaali nga baloma bari, ‘Aliwo Umuyiinga ukuundi ulaangiwa bari Yezu.’ ” 8Bilomo bino ni byawuliilikhana, lituuli lye babaandu ni bawuli be shiriimba bakwamo isundakilisi. 9Bawuli baloma Yasoni ni baashe bari buli mutweela umweene eyimilile. Baryo babalekhuula baatsya.
Baarume nga bali mu Berowa
10Antsye ni bwelabula, be buulebe barumana Paulo ni Silasi khuutsya i Berowa. Nabo nga ni boolayo, benjila mu ntsu iye Bayudaaya iye khukhwisaayilamo. 11Ne Bayudaaya be Berowa baaba balayi khufuura be Sesalonika, lwekhuba baaba be kimyoyo kimyaangu khufukiilila shilomo sha Wele, lundi buli shifukhu nga bemenielesa bibyaronebwa bikhosefu, khubona oba nga Paulo ni Silasi byeesi baloma bya ŋali. 12Ni nashiryo, bakali khu nibo bafukiilila, ni bakhasi Bayonaani babamanyikhana bakalikho busa, ni basaani nabo bafukiilila. 13Ne Bayudaaya be mu Sesalonika ni bawulila bari Paulo aba aboolela shilomo sha Wele mu Berowa namwo, beetsayo nayo khukosaasa babaandu ni khukhwinyusa shisaayumba. 14Khaangukho be buulebe bakaanisa Paulo khu ndulo khwe nyaantsa bari atsye, ne Silasi ni Timosewo barama i Berowa. 15Balebe babarongesakho Paulo bamwoolisa i Asene. Ne ni baaba nga belayo, baatsya ni burume bubwama isi Paulo nga buloma buri Silasi ni Timosewo bamwitubaasekho khangu nga ni banyala.
Paulo nga ali mu Asene
16Lutweela Paulo nga ali mu Asene, waliindile Silasi ni Timosewo, kumwoyo kweewe kwamutsiina, nga waboone shiriimba shetsuule bifwaani byeesi babaandu baamwo besaayatsaka. 17Aryo wakhandisanaatsaka ni Bayudaaya ni Bayonaani babaaba besaaya Wele mu ntsu iye khukhwisaayilamo, atweela ni mwikaantso. Na buli shifukhu wakholatsaka aryo isi babaandu beesi akananatsaka ibweeneyo. 18Babaandu babaandi be kamakyesi babalaangiwa bari ba Epikuriyo ni babaandi ba Sitoyiki, bamwakaanana barakikha khukhaandisanatsaka ni naye.
Babandi khu nibo baloma bari, “Uwilomalomayu aloma shiina?”
Kila babaandi baloma bari, “Afwana nga ukanikha khu ba wele banaambo beesi ifwe khukhamanya ta.” Baloma shino lwekhuba Paulo aba akanikha khu Yezu, ni khu khulamukha khwe baafu.
19Baryo bamuwamba bamuyila mu lubuusano lukhulu lwa Areopago, bamuloma bari, “Khunyala khwamanya khuleekela khuno khushaakha khweesi uli khulomakho nga ni khuli? 20Lwekhuba ulikhukhureerera indeekela ikhali iya busheele ta mu maru keefwe. Shikila khukana khumanye, bibiindu bino bimanyisa shiina?”
21Ne babaandu be mu Asene boosi atweela ni bakyeni beene babamenyatsakayo, bamalatsaka imbuka yaawe nga bakanikha, namwe nga bawulilisa shilomo shishiiba shetsilewo shishaakha. 22Lwanyuma Paulo weema akari mu lubuusano lwa Areopago, waloma ari, “Babaandu be mu Asene, mu buli saambo yoosi, ise mbabona inywe nga muli babaandu babakana i diini naabi. 23#Makh 13.1Lwekhuba ni mbeele nga injendakyeenda mu shiriimba sheenywe, imboone bibiindu byeesi mwisaaya. Aliwo esi inyoolele shisheeso shisharonebwakho shiri, ‘Sha wele ukhamanyikhana ta.’ Ni nashiryo, abe sheesi mwisaaya nga akhumanya ta, niye umweeneyo isi ise intsya khubaboolelakho. 24#1 Bay 8.27; Isay 42.5; Bur 7.48Niye Wele uwabuumba shiibala ni bibilimo byoosi, niye Umukasya we likulu ni shiibala. Lundi niye s'amenya mu mesaayilo kakombakhiwa ni kamakhono ke babaandu ta. 25#2 Mak 14.35Nalundi niye s'ekoomba babaandu khumuwa bibiindu, wafwaana nga utaamba shishiindu shoosi ta. Lwekhuba niye umweene uwa babaandu boosi bulamu, ni kumuuya kweesi baheela, ni khubawa buli shiindu shoosi shishiindi. 26#2 Mak 7.23Khurura mu mundu mutweela esi abuumba, Wele abuumba kamanaambo koosi kaketsuule babaandu, nga akana babe khu shiibala shoosi, nga umweene wamalile khukhalawo bisiintsa ni tsintsakha tse khukhwikhala khwawe.
27 #
Makh 13.6-9
“Wele akhola shino ari nio bamuweentsatsake, manya osi bamwababekho, lundi bamunyoole, akhaba nga s'ali aleeyi na buli mutweela khusiifwe ta. 28Lwekhuba khubirira mu niye khuba balamu, khwakyeenda, lundi khwabawo. Nga mutweela khu baroni beenywe n'aloma ari,
‘Ifwe khuli lisaaye lyeewe.’
29“Nashiryo, ifwe ni khuli lisaaye lya Wele sikhwakha khwambaasa khuri Wele ali shishiindu nga izaabu, namwe ifeeza, namwe libaale lilyakhengebwa ni buyungubafu, ni kamakyesi ke babaandu taawe. 30Aso, bisiintsa ibyo bye khaale, bye khulekha khumanya, Wele s'abilolelesa ta, ne ari alakila babaandu boosi isi bali khukhwibiiyisa bibyonako byaabwe. 31Lwekhuba wamala khaale khurawo shifukhu she khukhalilakho shiibala kumusaango kwe bukwalaafu, nga araambisa umuundu eesi umweene arobola. Lundi arawo shishiŋaŋasa isi babaandu boosi nga amulamusa khukhwaama mu bafu.”
32Ne ni bawulila Paulo nga akanikha khu khulamukha khwe baafu, balala khu nibo bamutsekhelela busa, ne babaandi baloma bari, “Khukana khukhuwulila lundi khu lomo yino.” 33Abweenewo, Paulo wabaruramo, watsya. 34Balala khu basaani bababawo betubaasa khu Paulo, bafukiilila mu Yezu. Mu nibo mwabamo Diyonisiyo, uwaba mutweela khu be mu Areopago, n'umukhasi lisiina lyeewe bari Damari, atweela ni babaandu babaandi.
Currently Selected:
Buraambi 17: LCE
Highlight
Copy
Compare
Share
Want to have your highlights saved across all your devices? Sign up or sign in
Lumasaaba Catholic Bible © The Bible Society of Uganda, 2017.
