Buraambi 16
16
Timosewo atsya ni Paulo ni Silasi i Derube
1Paulo ni Silasi boola i Derube ni Lisitura, ibweeneyo banyoolayo umuleekelwa lisiina lyeewe Timosewo. Timosewo yuno, maayi weewe aba umufukiilisi Umuyudaaya, ne paapawe aba Umuyonaani. 2Be buulebe be Lisitura ni Ikoniyo bamukanikhakho bulayi. 3Paulo wakana Timosewo amwitubaasekho, atsye ni naye. Aryo wamuyila wamusheba imbalu lwekhuba Bayudaaya boosi babaaba mu bifwo ibyo baaba bamanya bari paapawe wa Timosewo aba Umuyonaani. 4Ne ni baaba batsya nga babira mu biriimba, baboolela bafukiilisi khuwambatsaka ibyo byoosi bibyakhalibwawo ni Baarume, ni bakhulu babaaba mu Yerusalemu. 5Baryo bafukiilisi mu Yezu bawandalasibwa mu khufukiilila, baba nga belooselakho bukali buli shifukhu.
Paulo abonekhelwa mu Turowa
6Paulo ni baashe bakyeenda babira busa mu byaalo bye Firigiya, ni Galatiya, lwekhuba Umwoyo Umukhosefu abareesa khuboolela ilomo yoosi mu shiibala sha Asiya. 7Ne ni boola khu lwakha ni Misiya, batsemakho khuutsya i Bisiniya, ne Umwoyo wa Yezu walekha khufukiilisa ta. 8Baryo babira bubiri mu Misiya, bekhilila boola i Turowa. 9Ibweeneyo Paulo wafuna khubonekhelwa mu shilo, nga umusaani umu Masedoniya wemile amwikontselela ari, “Yambukha wiitse i Masedoniya, ukhuyeete.” 10Aryo Paulo n'amala khufuna khubonekhelwa khuno, weŋoonaŋoona khuutsya i Masedoniya, nga khwamanyile khuri, Wele wakhulaangile khubaboolela Kamakhuuwa Kamalayi.
Khushuukha khwa Lidiya mu Filipi
11Khuryo khambukha khurura i Turowa, khwatsya butysi i Samoturaki, ni shifukhu shishelakho khwoola i Neyapoli. 12Iyo khwamayo khwatsya i Filipi, shiriimba shikhulu she Masedoniya, shishaba shayilibwa ni Baroma. Ibweeneyo khwamenyayo khumala bifukhu bibyoolakho. 13Khu shifukhu sha Sabato, khwarura ibulafu we kumulyaango kwe shiriimba, khwatsya khu ndulo khwe luluutsi, esi khwambaasa khunyoolayo shifwo she khuloombelamo. Ibweeneyo khwekhala asi khwakanikha isi bakhasi, babaaba babusaane atweela. 14Mutweela khu bakhasi babaaba bakhurekeeresa lisiina lyeewe aba Lidiya, uwaba ama mu Siyatila. Umukhasi yuno aba umukulisi we tsingubo tsinandaafu, nalundi nga esaayatsaka Wele. Umukasya wamubimbula kumwoyo kweewe, khuwulilisa byoosi byeesi Paulo akanikha. 15Aryo nga niye nibe mu ntsu yeewe boosi babatisibwile, wakhwikontselela nga aloma ari, “Noola mwamboone nga nase ndi umufukiilisi mu Mukasya, ni mwiitse mwinjile mu ntsu yase mwikhalemo.” Wakhukhonjelesa aryo.
Khubowebwa khwa Paulo ni Silasi i Filipi
16Ulwo ni khwaba nga khutsya mu shifwo esi baloombatsakilamo Wele, umukhaana mutweela umukulwa, uwabakho shisaambwa she khulakula wakhwakanana, abe afunatsakila bakhulu beewe bibiindu bikali lwe khulakula khweewe. 17Umukhaana yuno walondelela Paulo atweela ni nafwe, nga alomela angaaki ari, “Basaani bano babakaanisi ba Wele uli Angaaki lukali, bababoolela inywe intsila ye buwonesi.” 18Umukhaana uyo wakholatsaka aryo khumala bifukhu bikali. Ne Paulo n'abona nga khuyokesa khukali, washuukha waloma shisaambwa shiibi ari, “Mu lisiina lya Yezu Kristu, ikhulakila ndi mururemo.” Mu mbuka nyeneyo shisaambwa shamururamo.
19Ne bakhulu b'omukhaana yuno ni baabona nga isaambo yaawe iye khufunatsaka bibiindu bikali yaweelewo, bawamba Paulo ni Silasi, babasindikhilisa, babayila mwikaantso isi bawuli. 20Babareera mu moni tse bakayi, baloma bari, “Basaani bano Bayudaaya benyusile shisaayumba mu shiriimba sheefwe, 21nga baleekela tsisaambo tse mbikho, isi ifwe Baroma khukhanyala khufukiilila namwe khwalondelela ta.” 22Lituuli lye babaandu nalyo lyabetubaasakho khuluumba Paulo ni Silasi. Baryo bakayi balakila bari babafuule tsingubo tsaawe, babakhupe tsimiimbo. 23Ne lwanyuma lwe khubakhupa naabi, babatuuma mwipuusu, balakila umuliindi khubaliindila ilala. 24Naye ni baamala khumulakila baryo, umuliindi wabara mu khaseenge khe mukari, wababowela bikyele byaawe khu bitsaangi.
25Ne shiilo khukari, Paulo ni Silasi ni baaba nga baloomba, nga beembila Wele kimyeenya, ni babowe babaramile nga babarekeeresile. 26Khangukho abawo khunikina khwe shiibala khukali, khukhwanikinisa lipuusu na musiinji kweene. Lubaluba, tsintsitsi tsoosi tsekuliwawo, ni kiminyololo kikyaba khu buli mubowe kyakangulukha. 27Ne umuliindi n'asisimukha mwiilo, wabona nga tsintsitsi tsoosi tsekuliwilewo, niye wambaasa ari babowe boosi batitukhile batsiile. Aryo kila asowolayo lurima lweewe nga akana eyire. 28Ne Paulo walomela angaaki ni likono likali ari, “Ukhikhola buubi bwoosi ta! Bona ifwe fweesi khuli ano.”
29Umuliindi waloomba ari bamureerere itaala. Wenjila mukari khaangu, wakwa asi e bikyele bya Paulo ni Silasi, nga nanikina busa. 30Aryo wabarusa ibulafu, wabaloma ari, “Basakhulu, ise nakhila khukhola shiina nio imbonesebwe.”
31Nabo Paulo ni Silasi bamwiilamo bari, “Fukiilila mu Mukasya Yezu, ni nawe kane uwonesewe, iwe wamweene atweela ni be mu ntsu yoowo boosi.” 32Baryo bamuboolela niye shilomo sh'Omukasya, ni naabo boosi babaaba mu ntsu yeewe. 33Mu saawa nyene iyo iye shiilo, umuliindi wabayila, wabasiinga kamakoontsyo, lwanyuma khaangukho niye ni be mu ntsu yeewe boosi babatisibwa. 34Aryo umuliindi uyo wabareera mu ntsu yeewe, wabawa bye khulya, niye ni be mu ntsu yeewe boosi bekhoya, lwekhuba boosi baaba bafukiilile mu Wele.
35Ne ni bwasha kumutikhinyi, bakayi barumana basilikhale baawe, nga babaloma bari, “Ni mulekhuule basaani ibo batsye.”
36Umuliindi we lipuusu waboolela Paulo bilomo ibyo ari, “Bakayi balakiile bari, iwe ni Silasi, mulekhuulibwe mutsye. Aso, ni murure, mutsye mu lukoosi.”
37Ne Paulo wabaloma ari, “Bakhupiile ifwe mu moni tse babaandu, nga bashiili khukhuwotsesakho ta, akhaba nga ifwe khuli Baroma, bakhutuuma mwipuusu. Ne ari bakhurusamo mu shimoonyo baryeena? Taawe, babeene ni beetse bakhurusemo.”
38Basilikhale belayo baboolela bakayi bilomo bino. Ne ni bawulila bari Paulo ni Silasi bali Baroma, besindukha naabi. 39Ne babeetsayo, babekoontselela babeyakhile, babarusa mwipuusu, babaloomba baamukhe shiriimba. 40Lwanyuma Paulo ni Silasi nga barurire mwipuusu, baatsya benjila mu ntsu ya Lidiya. Mubweenemwo, bakanana ni bafukiilisi, bababoolela bilomo bibisamo kamaani. Lwanyuma benyukha baatsya.
Currently Selected:
Buraambi 16: LCE
Highlight
Copy
Compare
Share
Want to have your highlights saved across all your devices? Sign up or sign in
Lumasaaba Catholic Bible © The Bible Society of Uganda, 2017.
