Matayo 27

Yesu ayilibwa wa Pilato

(Mako 15.1; Luka 23.1-2; Yokana 18.28-32)

1Kumutikhinyi mu mamilimili, basaayi bakhulu boosi ni basakhulu be babaandu, bakhalilawo atweela bye khukhwiira Yesu. 2Baryo bamubowa, baamuyila, bamuwaanayo isi Pilato, uwaba gafana.

Khuufwa khwa Yuda

(Buraambi 1.18-19)

3 # Bur 1.18,19 Lwanyuma lwayo, Yuda uwalya mu Yesu luwomelo, n'abona nga bakhaliile Yesu kumusaango kwe khuufwa, kumutaambo kwaamuwaamba, wakobosela basaayi bakhulu ni basakhulu tsinusu tsana kamakhumi kataru. 4Waaloma ari, “Ise noonakile, lwekhuuba naaliilemo luwomelo umuundu ukhalikho ni kumusaango ta.”

Nabo baamwiilamo bari, “Ikwo musaango kweefwe? Ikwo musaango kwoowo.”

5Lwanyuma Yuda waatuuma tsinusu tsana mu Lisaayilo Likhulu, waarura waatsya wekoka.

6Basaayi bakhulu babukula tsinusu itso, baloma bari, “Shili she kumusilo khubukula tsinusu tsino khwatsira atweela ni biwaanwa mwibiikhilo lye Lisaayilo Likhulu, lwekhuuba tsili tsinusu tse kamafuki.” 7Ni nashiryo bakhalilawo atweela, batsikulamo kumukuunda kw'omubuumbi mweesi baasiikhatsakamo bakyeni. 8Isho nisho shishikila kumukuundakwo kwalaangiwa kuri, kumukuunda kwe kamafuki, khukhwoolesa ni shaleelo. 9#Zek 11.12,13Shino sholelesa ibyo bibyalomewa n'Umuŋoosi Yeremiya shiri, “Babukula tsinusu itso kamakhumi kataru, bukusi bw'oyo bweesi babaana ba Isiraeli balala bafukiilisana khuwayo khulweewe, 10batsiraambisa khutsikulamo kumukuunda kw'omubuumbi nga esi Umukasya andakila ise.”

Pilato areeba Yesu bireebo

(Mako 15.2-5; Luka 23.3-5; Yokana 18.33-38)

11Nga bili biryo, Yesu wemikha mu moni tsa gafana, naye gafana waamureeba ari, “Iwe niye umuyiinga we Bayudaaya?”

Yesu naye waamwiilamo ari, “Ee, shili nga iwe n'ulomele.”

12Ne mwiibyo byeesi basaayi bakhulu ni basakhulu bamuwabila, mbaawo sheesi elamo ta. 13Lwanyuma Pilato waamureeba ari, “Iwe s'uwulila bilomo bino byoosi byeesi bano bakhutsuntsumilisa ta?”

14Ne Yesu walekha khubakho ni she khukhwiilamo ta, ikhaba na shitweela ta, khukhwoolesa ni gafana naye weyaanga naabi.

Yesu bamukhalila kumusaango kwe khuufwa

(Mako 15.6-15; Luka 23.13-25; Yokana 18.39; 19.16)

15Ne buli mwiiko gafana aabatsaka ni saambo iye khuukangululila babaandu umubowe mutweela isi baakanatsaka alekhuulibwe khu shifukhu she Kamayiiya ke Khuubirakho. 16Ne khu mbuka iyo, baabayo n'umubowe abe uwamanyikhana naabi lwe buubi bweewe, uwalaangiwa Baraba. 17Awo boosi ni babuusana, Pilato wabareeba ari, “Naanu yeesi mukana imbalekhuulile; Baraba namwe Yesu ulaangibwa Kristo?” 18Lwekhuuba amanya ari lyaba libuba lilyakila bawaanayo Yesu isi niye.

19Ne Pilato ni ekhala khu shitsoloŋo she khuukhalilakho kimisaango, umukhasi weewe waamurumanila buurume ari, “Ukhakholakho shishiindu shoosi khu musaani uyo ukhalikho shiibi shoosi ta, lwekhuuba nataambisiwile naabi mu marooro mu shilo khulweewe.”

20Ne basaayi bakhulu ni basakhulu bakhonjelesa babaandu bari baloombe Pilato abalekhuulile Baraba, ne biire Yesu.

21Gafana waabareeba luundi ari, “Khu babaandu bano babili, mukana imbalekhuulile naanu?”

Nabo belamo bari, “Baraba!”

22Kila ndi Pilato waabareeba ari, “Ne Yesu ulaangiwa Kristo, imukhole ndyeena?”

Boosi belamo bari, “Mutsaangilile khu musalaba!”

23Pilato waabareeba luundi ari, “Ne lwashiina? Shiibi shiina sheesi akholile?”

Ne nabo belamo ni kamaani koosi bari, “Mutsaangilile khu musalaba!”

24 # Maka 21.6-9 Ne Pilato n'abona nga bahandalale naabi, bakana khusoolana busoolani, wabukula kameetsi, wasaaba kamakhono keewe mu moni tse babaandu boosi nga babona, nga aloma ari, “Ise sindikho ni kumusaango kwoosi lwe kamafuki k'omusaani yuno ta, ukwo musaango kweenywe!”

25Ne babaandu boosi belamo bari, “Kha kumusaango kwe kamafuki keewe kube khwiifwe ni khu baana beefwe!”

26Aryo Pilato waabalekhuulila Baraba, ne waalakila ari Yesu bamukhupe tsimiimbo, lwanyuma waamuwaanayo isi bali bamutsaangilile khu musalaba.

Basilikhale batsekhelela Yesu

(Mako 15.16-20; Yokana 19.2-3)

27Lwanyuma basilikhale ba Gafana baayila Yesu khu lwaanyi lwe kimisaango, baabuusaasa lituuli lye basilikhale boosi khumwibotokhelela. 28Baryo baamwaabulamo tsingubo tseewe, baamukwaarisa ingubo imbesemu. 29Baalukha lihabi lye kamawa, baalimukwaarisa khu murwe kweewe, baamura imiimbo mu mukhono kweewe kumulayi. Lwanyuma baafukhama aasi iburaangisi weewe, bamwoonela bari, “Mulembe iwe umuyiinga we Bayudaaya!” 30Baryo baamufuutsila kamare, baamurusakho imiimbo isi baara mu mukhono kweewe, baamukhupa khu murwe kimiluundi mikali. 31Ne ni baamala khumwoonela baryo, baamwaabulamo ingubo tsana imbesemu, baamukwaarisa bikwaaro byeewe bibyeene. Lwanyuma baamuyila khuumutsaangilila khu musalaba.

Yesu bamutsaangilila khu Musalaba

(Mako 15.21-32; Luka 23.26-43; Yokana 19.17-27)

32Ne ni baaba nga barura ibulafu, baakanana umusaani uwe Kurene, uwalaangiwa Simoni; baamuwanyiinya khuusuta kumusalaba kwa Yesu. 33Baryo boola mu shiifwo shishilaangibwa bari Gologosa (kamakhulu kaasho bari shiifwo she shiwaanga). 34#Zab 69.21Abweene awo baawa Yesu iviini khuunywa, nga bakitubaasilemo indule naabi, na namuusakho, wekaana khukinywa. 35#Zab 22.18Ne ni baamala khumutsaangilila khu musalaba, bakabanana bikwaaro byeewe, nga bakhupa khakokha 36Lwanyuma lwayo, bekhala awo khumulolelela. 37Ne angaaki e kumurwe kweewe barawo burone bubuloma buri, OYUNO NIYE UMUYIINGA WE BAYUDAAYA. 38Aabawo ni banuuli babili babaatsaangililwa ni naye, mutweela khu mukhono kweewe kumulayi, n'ukuundi khu mukhono kweewe kumunyeletsi.

39 # Zab 22.7; 109.25 Babaandu boosi babaaba babirawo basisiikha kimirwe kyaabwe, nga bamufwotsola, 40#Mat 26.61; Yok 2.19nga baloma bari, “Iwe abe unyala khusaambula Lisaayilo Likhulu, walyombekhela luundi mu bifukhu bitaru, yiwonesa wamweene khubone! Ari yiikha urure khu musalaba khubone, noola uli Umwaana wa Wele!”

41Ni musaambo niyo ndweela basaayi bakhulu nabo, ni baleekeli be kamakaambila ka Musa, ni basakhulu nabo, bamwoonela nga baloma bari, 42“Aawonesatsaka babaandi, ne bona s'anyala wewonesa umweene ta! Mbo niye umuyiinga wa Isiraeli, ari ni eekhe khukhwaama khu musalaba, ni nafwe kane khumufukiilile. 43#Zab 22.8Mbo niye eyikina Wele, ari lekha Wele amuwonese noola namukana, lwekhuuba niye aloma ari, niye ali Umwaana wa Wele.”

44Ni musaambo niyo ndweela, banuuli ibo babatsaangililwa ni naye atweela nabo bamwoonela naabi.

Khuufwa khwa Yesu

(Mako 15.33-41; Luka 23.44-49; Yokana 19.28-30)

45Khukhwaama khu saawa iye khasesaba tse mwihangilwe, khukhwoola khu saawa iye shisheenda, shishiilima shikali shaakwa khu shiibala shoosi. 46#Zab 22.1Ne khu saawa awo nga sheenda, Yesu waalila ni likono lye angaaki nga aloma ari, “Eli, Eli, lama sabakusani?”#27.46 Bilomo bino byaba mu Luheburaniya. (Kamakhulu kaasho kari, “Wele wase, Wele wase, lwashiina iwe untsantsukhile ise?”)

47Batweela khu baandu babaaba beemile awo ni bawulila baryo, baaloma bari, “Bona ari alaanga Eliya.”

48 # Zab 69.21 Lubaluba mutweela khu nibo waatimaka, waabukula shishaangwe, waashitsukhamo iviini indule naabi, waashira khu lukholo, waashira imunwa wa Yesu ari anywe. 49Ne babaaramile boosi baaloma bari, “N'umulekhe abe. Ari khakhuliinde khubone noola Eliya kane eetse amuwonese.”

50Ne lwanyuma nga Yesu waaliliile angaaki ni likono likali, waalekhuula kumwoyo kweewe.

51 # Luky 26.31-33 Khu mbuka nyene iyo, ingubo iyaba yaatiimbibwa mu Lisaayilo Likhulu, yonuukhamo kimiluundi kibili, khukhwaama khu ngaaki khukhwoola aasi. Shibala shoosi shaanikina, ni kamabaale kaatikhakamo. 52Tsiŋani tsaabalukhaka, ni kimibili kye babaandu bakhosefu babaafwa khaale kyaalamusibwa. 53Ne ni baamala khuurura mu ŋani lwanyuma lwe khuulamukha khwa Yesu khukhwaama mu bafu, baatsya mu shiriimba shikhosefu, babonekhela babaandu bakali.

54Umusilikhale umukhulu ni babaandi babaaba baliindile Yesu, ni baabona khunikina khwe shiibala, ni bibiindi bibyakholekha, baarya naabi, baloma bari, “Ilala umusaani yuno abeele Umwaana wa Wele.”

55 # Luka 8.2,3 Bakhasi bakali babaaba nga beemile aleeyikho, balolelela bibyakholekha byoosi. Nibo babaloondelelatsaka Yesu khukhwaama i Galilaaya, nga bamwakaanisa. 56Mu nibo mwabamo Malyamu Magadalena, Malyamu Maayi wa Yakobo ni Yusufu, ni maayi we babaana ba Zebedaayo.

Khuusiikhibwa khwa Yesu

(Mako 15.42-47; Luka 23.50-56; Yokana 19.38-42)

57Ne antsye ni bwaba nga bwilabula, abawo umusaani umuyindifu uweetsa khukhwaama i Alimaseya, lisiina lyeewe bari Yusufu, naye uwaba waayikela umuleekelwa wa Yesu. 58Nga waatsiile isi Pilato, waamuloomba amuwe kumulaambo kwa Yesu. Ni Pilato waalakila ari bakumuwe. 59Aryo Yusufu waayila kumulaambo, waakubowa mu ngubo, imiliwu iwaanga imelamela. 60Waakwalisa mu ŋani yeewe umweene imbya yeesi aayaba mu lwaanda. Waayilingisa libaale liboofu, waalira khu mulyaango kwe ŋani, waarurawo waatsya. 61Malyamu Magadalena ni Malyamu ukuundi baaba bekhaale mu shiifwo shishilolelaniile ni ŋani.

Umuliindi uwaba aambi n'iŋani

62Khu shifukhu shisheelakho, nisho shifukhu shishiila khu she khukhwiŋoonaŋoona, basaayi bakhulu ni Bafarisaayo baabuusana isi Pilato, baamuloma bari, 63#Mat 16.21; 17.23; 20.19; Mako 8.31; 9.31; 10.33,34; Luka 9.22; 18.31-33“Musakhulu, ifwe khushebulila nga umubeeyi yuno ashiili mulamu aaloma ari, ‘Lwanyuma lwe bifukhu bitaru, indilamukha mu bafu.’ 64Nashiryo, lakila baliindiile ilala ŋani, khukhwoolesa khu shifukhu she khataru. Manya lukana baleekelwa beewe banyala beetsa beeba kumulaambo kweewe, lwanyuma baboolela babaandu bari walamusiwile mu bafu. Ni khuwoombesa khuno khwe lwanyuma kane khube khuubi naabi khufuurisa khuukiboole.”

65Aryo Pilato waaloma ari, “Mbo muli ni baliindi basilikhale, ni mutsye muliindile ilala iŋani nga ni munyala.”

66Nabo baryo baatsya, baliindila ilala iŋani, barakho ni khabonelo khu libaale, luundi barakho ni baliindi.

Currently Selected:

Matayo 27: LPE

Highlight

Copy

Compare