Matayo 21

Yesu enjila mu Yerusalemu ni shiriifwa

(Mako 11.1-11; Luka 19.28-40; Yokana 12.12-19)

1Ne ni baaba nga bali aambi khukhwoola i Yerusalemu, beetsa i Betifage, khu lukiingi lwe Kimizeyituni. Yesu warumana babili khu baleekelwa beewe, 2nga abaloma ari, Ni mutsye mu shaalo shishibali ibweeni, khaangu akho kane munyoole isikilya nga baakibowele ni nyana yayo. Mutsabule, mutsinderere. 3Ne umuundu yeesi n'abalomayo ilomo yoosi, mumuloma muri, “Umukasya niye utsikana, ni naye kane atsakaanise khaangu akho.”

4Shino shakholekha khukhwoolelesa shishakanikhibwa khuubirira mu muŋoosi shiri,

5 # Zek 9.9 “Boolela shiriimba sha Sayuuni muri,

‘Bona umuyiinga woowo etsa is'uli,

umuwolu luundi nga etsila khu sikilya

ni khu nyana ye sikilya.’ ”

6Baleekelwa baatsya, baanyoola nga Yesu n'abalomela. 7Baryo baareera isikilya, ni nyana yayo, baatsibiimbakho tsingubo tsaabwe, naye Yesu wekhalakho. 8Lituuli lye babaandu bakali baala tsingubo khu ntsila, ne babaandi barema tsisakya khu bisaala, baala khu ntsila.#21.8 Yino yabatsaka isaambo yeesi babaandu Bayudaaya bakaanilatsakamo umuundu uwe shiriifwa. 9#Zab 118.25,26Lituuli lye babaandu babaaba baraangiile, ni naabo babaaba baamuloondelekho, baayokesela angaaki bari: “Hosana#21.9 Hosana, shamanyisa shiri “N'ukhuwonese,” ne khufuurisa shiraambisibwa khumanyisa khuruuya Wele. isi Umwitsukhulu wa Dawudi, ali ni khabi uyo uwitsila mu lisiina ly'Omukasya. Hosana, angaaki lukali.”

10Aryo Yesu ni enjila mu Yerusalemu, shiriimba shoosi shayeŋanisibwa, nga baloma bari, “Naanu uyu?”

11Kamatuuli ke babaandu belamo bari, “Oyu niye Umuŋoosi Yesu, uwama mu Nazareesi mu Galilaaya.”

Yesu atsya mu Lisaayilo Likhulu

(Mako 11.15-19; Luka 19.45-48; Yokana 2.13-22)

12Yesu wenjila mu Lisaayilo Likhulu lya Wele, waatimisa waarusa ibulafu ibo boosi babaaba bakulaanilamo. Waafumalikhaka tsimeetsa tsaabo babaaba bakulaanisa tsinusu, ni bitsoloŋo byaabo babaakulisa kamawuusi. 13#Isay 56.7; Yer 7.11Yesu waabaloma ari, “Sharonebwa mu byaronebwa bikhosefu shiri, ‘Intsu yase kane ilaangibwatsake intsu iye khuloomba, ne inywe mwakikalusile khuuba lifuluma lye banuuli.’ ”

14Lwanyuma, baabofu ni baaleme beetsa is'ali mu Lisaayilo Likhulu, waabawonesa boosi. 15Ne basaayi bakhulu ni baleekeli be kamakaambila ka Musa bakhalala naabi ni babona bibiindu bye kamakaanga byeesi Yesu akhola, ni babaana nga bayokesela angaaki mu Lisaayilo Likhulu bari, “Hosana isi Umwitsukhulu wa Dawudi.”

16 # Zab 8.2 Kila bareeba Yesu bari, “Uwulila byeesi babaana bano baloma?”

Yesu wabeelamo ari, “E e, nawuliile. Ne simwasomatsakakho muri, ‘khukhwaama mu khanwa khe babaana ni baŋaalye, wayiŋoonaŋoonela lubuyi?’ ”

17Aryo Yesu waabalekha, waarura mu shiriimba, waatsya i Besaniya esi akonela shiilo isho.

Yesu awuuma kusaala ku Figi

(Mako 11.12-14,20-24)

18Kumutikhinyi mu mamilimili, Yesu aaba elayo mu shiriimba, intsala abe ilikho imulya. 19Aryo nga waaboone kusaala ku Figi khu ndulo khwe ntsila, watsyakho, ne waalekha khunyoolakho shishiindu shoosi ta, akhali kamasaafu konyene. Kila Yesu waaloma kusaala ari, “Kusaalawe, s'ukane waanatsakekho bibyaano luundi ta.” Ni abweene awo, kusaala kwaaniaalilawo.

20Ne baleekelwa ni baabona shino beyaanga naabi nga baloma bari, “Kusaala ku figi kuno kunialile kuryeena khaangu akho?”

21 # Mat 17.20; 1 Kor 13.2 Yesu wabeelamo ari, “Ilala ise imbaboolela inywe ndi, ni muba ni khufukiilila, mwalekha khwikanakana ta, munyala khukhola isho shishikholewele khu kusaala ku figi kuno kwe bibyaano, ni khulooselakho, munyala khuloma lukiingi luno muri, ‘Wamweene sutikha busa utsye, wituume mu nyaantsa,’ ni nasho shilikholebwa. 22Ni muba ni khuufukiilila, muliweebwa shoosi shoosi sheesi mukana mu khuloomba khweenywe.”

Shireebo shishiwaamba khu bunyala bwa Yesu

(Mako 11.27-33; Luka 20.1-8)

23Yesu wenjila mu Lisaayilo Likhulu, ne n'aba nga aleekela, basaayi bakhulu ni basakhulu be babaandu beetsa is'ali, bamureeba bari, “Uli na bunyala shiina bubukhukholisa bibiindu bino? Naanu uwakhuwa bunyala buno?”

24Yesu wabeelamo ari, “Nase kane imbareebe shireebo shitweela. Ne nga mwantsililemo, nase kane imbaboolele bunyala nga ni buli bubungolesa ise bibiindu bino. 25Khubatisibwa khwa Yokana Umubatisa khwaama eena? Khwaama mwikulu namwe khwaama mu baandu?”

Baareebana bonyene na bonyene nga baloma bari, “Ni kane khulome khuri, khwaama mwikulu, kane akhureebe ari, ‘Ne shiina kila mukhaamufukiilila?’ 26Ne ni kane khulome khuri, khwaama mu baandu, khurya lituuli lye babaandu, lwekhuuba boosi baamanya bari, Yokana Umubatisa aaba umuŋoosi.” 27Ni nashiryo beelamo Yesu bari, “Sikhumanya ta.”

Yesu naye wabeelamo ari, “Ni nase singene imbaboolele bunyala ni buli bubuungolesa bibiindu bino ta.”

Lusimo lwe basooleli babili

28“Inywe mwaambaasa murye? Aabawo umusaani mutweela, uwaba ni babaana beewe basooleli babili. Waatsya isi unyoowa waamuloma ari, ‘Mwaana wase, tsya uraambe mu mukuunda kwe kimisabibu shaleelo.’ 29Umwaana yuno welamo ari, ‘Shinatsya ta.’ Ne lwanyuma webiiyisa mu mwoyo kweewe, waatsya. 30Lwanyuma umusaali tsana waatsya isi uwe khabili, waamulomela aryo, nga n'alomela uwanyoowa. Umusooleli yuno welamo ari, ‘E e paapa.’ Ne walekha khuutsya khuraamba ta.”

31Kila Yesu abareeba ari, “Khu babili bano, naanu uwakhola sheesi paapa waabwe akana?”

Nabo belamo bari, “Uwanyoowa.”

Yesu waabaloma ari, “Ilala imbaboolela ndi, babuusanisi be kumusolo, ni bamalaaya balikho babanyoowa inywe khukhwinjila mu Buyiinga bwa Wele. 32#Luka 3.12; 7.29,30Lwekhuuba Yokana Umubatisa etsa isi muli khubokesa intsila ye bukwalaafu, ne inywe mwalekha khumufukiilila ta, ne babuusanisi be kumusolo ni bamalaaya bamufukiilila. Ne akhaba nga mwabona muryo, simwakyelawo mwebiiyisa, mwamufukiilila ta.”

Lusimo lwe balimi mu mukuunda

(Mako 12.1-12; Luka 20.9-19)

33 # Isay 5.1,2 Yesu waababoolela lusimo luluundi ari: “Aabawo umusaani mweene mukuunda, uwabyaalamo kumusabibu kweewe. Waakusirira lumako khuukubotokhelela, wayabilamo lirokelo lye viini, wombekhamo kumunaala. Lwanyuma wapaangisisa kumukuunda tsana isi baalimi, aryo waamawo, waatsya mu shiibala she aleeyi. 34Imbuka ye likyesa ni yoola, waarumana babakaanisi beewe isi baalimi, ari bamuwekho bibyaano byamwo.

35“Ne baalimi bawaamba babakaanisi beewe, mutweela baamukhupaka, ukuundi baamwiira, n'uwe khataru baamukhupa kamabaale. 36Luundi ndi waarumanayo babakaanisi babaandi, babafuurakho babaanyoowa. Ne nabo baabakhola baryo nga babaanyoowa. 37Lwanyuma waabarumanila umwaana weewe umweene, nga aloma ari, ‘Manya lukanile kane besemo umwaana wase shiriifwa.’

38“Ne balimi ni baabona umwaana w'omweene mukuunda, bekuta bonyene bari, ‘Mbo oyu niye umusikha, yiitsa khumwiire, khuyile busikha bweewe.’ 39Baryo baamuwaamba, baamutuuma ibulafu we kumukuunda, baamwiira.”

40Ulwo Yesu waabareeba ari, “Nga umweene mukuunda weetsile, baalimi abo alibakhola aryeena?”

41Nabo baamwiilamo bari, “Babaandu baabi abo, alibahesa, ni kumukuunda akupaangise isi balimi babaandi, babaalimuwa bibyaano byeewe mu mbuka inyene iye likyesa.”

42 # Zab 118.22,23 Aryo kila Yesu abaloma ari:

“Mwaakhusomatsakakho bibyaronebwa bikhosefu bibiloma biri,

‘Libaale lyeesi babombekhi bekaana,

lyashuukha lyekyela khuuba kumurwe kwe musoonda.

Umukasya umweene niye uwakhola shino,

luundi shiyaangisa mu moni tseefwe.’

43“Nashiryo, imbaboolela ndi, Buyiinga bwa Wele bulibarusibwakho inywe buweebwe linaambo lilinyala lyaana bibyaano bilayi. 44Umuundu yeesi ukwa khu libaale lino alifuniakikhaka busa, ne uyo esi lilikwakho, lilimubulyungulaka busa.”

45Baryo basaayi bakhulu ni Bafarisaayo nga baawuliile tsisimo tsa Yesu tsino, baamanya bari aaba ali khuubaloma khu nibo. 46Baryo baakhakakho naabi khuuweentsa imbuka bamuwaambe, ne baarya kamatuuli lwekhuuba babaandu bamwaambaasa khuuba umuŋoosi.

Currently Selected:

Matayo 21: LPE

Highlight

Copy

Compare