Matayo 20

Lusimo lwe baraambi mu mukuunda kwe kimisabibu

1Yesu waaboolela lusimo luluundi ari, “Buyiinga bwe mwikulu bufwaananakho n'umuundu uwaba mweene mukuunda, uwarura kumutikhinyi, mu mamilimili, khuutsya khupangisa babaandu bamuraambile mu mukuunda kweewe kwe kimisabibu. 2Naye aryo n'amala khufukiilisana ni nabo khubasasula i Dinari ndweela iyaba kumukheemba kwe shifukhu, wabarumana mu mukuunda kweewe kwe kimisabibu. 3Ne n'arura luundi khu saawa iye khataru, waabona babaandu babaandi beemile awo mu khatale nga mbaawo sheesi bali khukhola ta. 4Nabo waabaloma ari, ‘Ni nanywe ni mutsye muraambe mu mukuunda kwase kwe kimisabibu, nase kane imbasasule shishaakhila.’ 5Nabo baryo baatsya.

“Waarura luundi khu saawa iye khasesaba, ni khu saawa iye shisheenda, waakhola shishiindu sheene nisho shitweela. 6Ne luundi ndi khu saawa iye liikhumi na ndweela, waanyoola babaandi nga beemile awo busa, nabo waabaloma ari, ‘Lwashiina inywe mwemile ano busa nga mbaawo sheesi mukhola shifukhu shoosi ta?’ 7Nabo baamwiilamo bari, ‘Lwekhuuba mbaawo umuundu yeesi ukhupaangisile ta.’

“Naye waabaloma ari, ‘Ni nanywe ni mutsye muraambe mu mukuunda kwase kwe kimisabibu.’ ”

8 # Lev 19.13; Maka 24.15 “Buryo antsye ni bwoola angoloobe, umweene mukuunda tsana waalomela umuraambisi weewe ari, ‘laanga baraambi ubasasule kumukheemba kwawe, nga unyoowela khu beetsile lwanyuma, umaliliseyo ni babanyoowele.’ 9Ne abo babasimama khuuraamba khu saawa iye liikhumi na ndweela ni beetsa, buli mutweela waafuna i Dinari iyaba kumukheemba kwe shifukhu. 10abo nabo babaanyoowa khupaangisibwa ni beetsa, bambaasa bari batsya khufuna khufuurisakho. Ne buli mutweela khu nibo waafuna i Dinari nyene ndweela. 11Ne ni baamala khufuna, beŋuluŋuunyila umweene mukuunda 12nga baloma bari, ‘Bano babeetsile lwanyuma baraambila isaawa ndweela yonyene, waabalekhaasa ni nafwe, khukhurekanile ni busiro bwe shifukhu shoosi kumuumu nga kukhwoosha?’

13“Ne naye welamo mutweela khu nibo ari, ‘Mulebe, ise nakhukhubirisa buubi ta. Simufukiilisaane ni nase i dinari ndweela iye shifukhu? 14Bukula kumukheemba kwoowo utsye. Ise ngana khuuwa ukuundi yuno umumalilisi nga iwe. 15Wambaasa ise siindi ni bunyala khukhola byeesi ingana ni tsinusu tsase? Namwe undola ise imoni imbi lwe buulayi bwase?’ ”

16 # Mat 19.30; Mako 10.31; Luka 13.30 Yesu waamalilisa ari, “Baryo baamalilisi baliiba babaanyoowa, ni babaanyoowa, baliiba baamalilisi.”

Yesu akanikha luundi khu bye khuufwa khweewe

(Mako 10.32-34; Luka 18.31-34)

17Lwanyuma Yesu n'aba nga aniina i Yerusalemu, waayila baleekelwa liikhumi na babili andulo, waabaloma ari, 18“Bona ari khuniina i Yerusalemu, ne Umwaana w'Omuundu balimuwaanayo isi basaayi bakhulu, n'isi baleekeli be kamakaambila ka Musa. Nabo balimukhalila kumusaango kwe khuufwa, 19naluundi bamuwaaneyo isi Banaambo#20.19 Bano baaba Baroma babaaba bawula Yuda mu biseela ibyo. khuumutyabila, bamukhupe, luundi atsaangililwe khu musalaba. Ne khu shifukhu she khataru, alilamusibwa khukhwaama mu bafu.”

Maayi uwe babaana babili aloomba Yesu

(Mako 10.35-45)

20Lwanyuma maayi we babaana ba Zebedaayo weetsa isi Yesu ni babaana beewe, waafukhama aasi nga alikho ni sheesi akana khuumuloomba.

21Yesu waamureeba ari “Ukana shiina?”

Naye welamo Yesu ari, “Fukiilisa uri babaana baase bano boombi kane bekhale, mutweela khu mukhono kwoowo kumulayi n'ukuundi khu mukhono kwoowo kumunyeletsi mu Buyiinga bwoowo.”

22Yesu wabeelamo ari, “Inywe simumanya sheesi muloomba ta. Inywe munyala khuunywa khu shikhopo she butsiina sheesi ise intsya khunywakho?”

Nabo bamwiilamo bari, “E e khunyala.”

23Yesu waabaloma ari, “Ilala khu shikhopo shase she butsiina mulinywakho, ne bye khukhwikhala khu mukhono kwase kumulayi, namwe khu munyeletsi, shiili ise ukhukaba ta. Biifwo ibyo byaabo beesi Paapa wase amala khubiŋoonaŋoonela.”

24Ne baleekelwa babaramile liikhumi ni bawulila shino, bakhalalila babili bano, babaaba wandaaye ni wandaaye. 25#Luka 22.25,26Yesu wabalaanga boosi atweela is'ali, waabaloma ari, “Mwamanya muri bawuli be Banaambo babayila ni kamaani. Ni baraangilisi baabwe be angaaki babaabakho ni bunyala. 26#Mat 23.11; Mako 9.35; Luka 22.26Ne mus'iinywe singene shibe shiryo ta. Akhali ndi buli muundu yeesi ukana khuuba umukhulu mwiinywe, aakha khuuba umwakaanisi wenywe, 27ni nooyo ukana khuuba unyoowa mwiinywe aakha khuuba umwakaanisi weenywe. 28Nga ni shili ndi Umwaana w'Omuundu s'etsa khukhwakaanisibwa ta, ne njeeba khukhwakaanisa, ni khuwaanayo bulamu bweewe khuuba she khusikula lwe khuwonesa bakali.”

Yesu awonesa basaani baabofu babili

(Mako 10.46-52; Luka 18.35-43)

29Ne Yesu ni baleekelwa beewe ni baaba nga barura mu Yeriko, lituuli lye babaandu bakali lyamuloondakho. 30Ne aabawo basaani baabofu babili babaaba bekhaale khu ndulo khwe ntsila, ni baawulila bari Yesu alikho abirawo, baalomela angaaki bari, “Umukasya, Mwitsukhulu wa Dawudi, khuwaambile shiisa!”

31Ne lituuli lye babaandu lyaabarafuyila, nga babaloma bari basile busa, ne baabofu beloosela khuulomela angaaki bari, “Umukasya, Mwitsukhulu wa Dawudi, khuwaambile shiisa.”

32Kila Yesu weema, wabalaanga. Waabareeba ari, “Mukana ise imbakholele shiina?”

33Nabo baamwiilamo bari, “Umukasya, khukana tsimoni tseefwe tsibimbukhe.”

34Yesu wabawaambila shiisa, waatiila khu moni tsaabwe. Lubaluba, baanyalisa khuubona, baamuloondelela.

Currently Selected:

Matayo 20: LPE

Highlight

Copy

Compare