Matayo 22

Lusimo lwe kamayiiya ke bukhwaale

(Luka 14.15-24)

1Yesu waakanikha luundi ni nabo musimo, waabaloma ari, 2“Buyiinga bwe mwikulu bufwaananisibwa n'umuyiinga uwaŋoonaŋoona kamayiiya ke bukhwaale bw'omwaana weewe umusiinde. 3Lwanyuma waarumana babakaanisi beewe khuutsya khulaanga ibo babalaangiwa khu mayiiya ke bukhwaale, ne nibo baleakha khukana khukhwiitsa ta. 4Luundi ndi waarumana babakaanisi babaandi nga aloma ari, ‘Ni mutsye muboolele abo babalaangiwa muri, ise naŋoonaŋoonele kamayiiya kaase, tsikhaafu tse kiminaawa tseriiwile. Bibiindu byoosi byaŋoonaŋoonewele. Ari ni mwiitse khu mayiiya ke bukhwaale.’ 5Ne nibo balekha khukhwinaanayo ta, baryo betsiilakila mu ntsila tsaabwe tsitsiindi: mutweela waatsya mu mukuunda kweewe, ukuundi waatsya mu bye bukusi bweewe. 6Ne babaaramile bawaambaka babakaanisi abo baababirisaka buubi, babeeraka. 7Umuyiinga yuno lirima lyamuwaamba, warumana liiye lyeewe, wahesaka babeeri ibo, woosha ni shiriimba shaawe.

8“Lwanyuma waloma babakaanisi beewe ari, ‘Kamayiiya ke bukhwaale kamaŋoonaŋoone, ne ibo babalaangiwa sibaakhila ta. 9Nashiryo, ni mutsye mu mikhoosi esi kyakananila, mulaange boosi beesi kane muboneyo, beetse khu mayiiya.’ 10Baryo babakaanisi baatsya mu mikhoosi, baabuusanisa boosi beesi baanyalisa khuunyoolayo, baabi atweela ni baalayi, litiilo lye kamayiiya lyetsulamo bakyeni.

11“Ne umuyiinga ni enjila khuubona bakyeni, waabonamo umusaani uwaba waakhukwaara ingubo iyaakhila kamayiiya ke bukhwaale ta. 12Kila amureeba ari, ‘Mulebe, winjiile uryeena ano nga s'uli ni shikwaaro shishaakhila kamayiiya ta?’ Ne umusaani waasila busa. 13#Mat 8.12; 25.30; Luka 13.28Lwanyuma umuyiinga waaloma babakaanisi beewe ari, ‘Ni mumubowe kamakhono ni bikyele, mumutuume ibulafu mu shilima. Ibweene iyo iliiba khukhwaantsuwa ni khukhwilumaka kameeno.’ 14Lwekhuuba babalaangibwa bakali, ne baarobolemo bakyeekhe.”

Shireebo shishiwaamba khu bye kumusolo

(Mako 12.13-17; Luka 20.20-26)

15Lwanyumakho, Bafarisaayo baatsya bekutila atweela isaambo yeesi kane bawaambilise Yesu mu bilomo. 16Baryo kila bamurumanila baleekelwa baabwe atweela ni baloondeleli ba Herode, nga baloma bari, “Umuleekeli, ifwe khwamanya nga iwe uli umuundu uwa ŋali, luundi uleekela intsila ya Wele nga wimikha mu muŋali ilala, luundi s'unikinisibwa ni babaandu ta, lwekhuuba siwinaanayo khu mbonekha ye babaandu ta. 17Aso khuboolele, iwe waambaasa urye? Shilayi khuuwa kumusolo isi Kayisaali namwe ta?”

18Ne Yesu waba nga waamanyile buubi bwaabwe, waabaloma ari, “Inywe babeeyi, lwashiina muweentsa khukhukhakilisa ise? 19Ni muntsokese lipeesa lyeesi muweelamo kumusolo.” Baryo bamureerera idinari. 20Kila ndi wabareeba ari, “Shifwaani shino, ni buronekho buno, bya naanu?”

21Nabo bamwiilamo bari, “Bya Kayisaali.”

Yesu naye wabeelamo ari, “Aso, bya Kayisaali, ni mubiwe Kayisaali, ni isi Wele naye mumuwe bye bwa Wele bweewe.”

22Baryo boosi ni bawulila shino belaliila busa. Lwanyuma bamulekha, baatsya.

Bye khuulamukha khukhwaama mu bafu

(Mako 12.27-28; Luka 20.27-40)

23 # Bur 23.8 Khu shifukhu sheene isho, Basadukaayo, nga nibo babaloma bari mbaawo khulamukha mu bafu ta, beetsa isi Yesu. Nabo beetsa khumureeba shireebo. 24#Maka 25.5Bamureeba bari, “Umuleekeli, ifwe Musa akhulomela ari, ‘Noola umusaani wafwiile busa nga akhusaala babaana ta, wandaaye aakha khukhwiila khu namulekhwa, amusaalile babaana.’ 25Ari iweefwe iyo, yabayo be buulebe musaafu. Umukiboole wakhwa umukhasi, ne wafwa nga akhusaala lisaaye ta, walekhela wandaaye weewe umukhasi. 26Shishiindu sheene nisho shitweela shakholekha khuwe khabili, n'uwe khataru, khukhwoola khuwe kumusaafu. 27Lwanyuma lwa boosi khuufwa, umukhasi naye wafwa. 28Aso, nga yoolele ikhulamukha khwe baafu, umukhasi yuno aliiba mweene wa naanu, khu be buulebe bano musaafu? Lwekhuuba boosi baaba ni naye nga umukhasi waabwe.”

29Yesu wabeelamo ari, “Inywe muborokha lwekhuuba simumanya bibyaronebwa bikhosefu namwe kamaani ka Wele ta. 30Lwekhuuba babaandu ni baba nga balamukha khukhwaama mu bafu, sibayila bakhasi, namwe sibakhwalikhisibwa ta, ne boosi baliiba nga bamalayika mwikulu. 31Ne ibyo bibiwaamba khu khulamukha khukhwaama mu bafu, simwasomatsakakho byeesi Wele abalomela ari, 32#Luky 3.6‘Ise ndi Wele wa Iburayimu, Wele wa Isaaka, luundi Wele wa Yakobo?’ Niye s'ali Wele we baafu ta, ne ali Wele we balamu.”

33Lituuli lye babaandu ni bawulila baryo, beyaanga busa khuleekela khweewe.

Likaambila lilifuura bukhulu

(Mako 12.28-34; Luka 10.25-28)

34Nabo Bafarisaayo ni bawulila bari Yesu wabunisile Basadukaayo, babuusana atweela. 35Mutweela khu nibo uwaba umuleekeli we kamakaambila ka Musa, waakhaka Yesu nga amureeba shireebo, nga aloma ari: 36“Umuleekeli, likaambila shiina lilifuura bukhulu mu makaambila koosi?” 37#Maka 6.5Yesu waamwiilamo ari, “Kanatsaka Umukasya Wele woowo, ni kumwoyo kwoowo kwoosi, ni bulamu bwoowo bwoosi, ni kamakyesi koowo koosi. 38Lino nilyo likaambila linyoowa lilifuura bukhulu. 39#Lev 19.18Ni lye khabili lilifwaananakho ni nalyo nilyo lino: kanatsaka umwesanwa woowo, nga iwe ni wikana wamweene. 40#Luka 10.25-28Mu makaambila kano koombi, nimwo mweesi kamakaambila koosi, ni khuleekela khwe baŋoosi bimile.”

Shireebo shishiwaamba khu Kristo

(Mako 12.35-37; Luka 20.41-44)

41Bafarisaayo ni baaba nga baabusaane atweela, Yesu wabareeba shireebo ari, 42“Kristo, inywe mumwaambaasakho murye? Niye Umwaana wa naanu?”

Nabo bamwiilamo bari, “Niye Umwitsukhulu wa Dawudi.”

43Naye Yesu waabaloma luundi ari, “Ne lwashiina Dawudi, nga Umwoyo Umukhosefu amuraangilila, amulaanga ari, ‘Umukasya?’ Lwekhuuba niye amulomakho ari,

44 # Zab 110.1 ‘Umukasya aaloma Umukasya wase ari:

Yikhala ano khu mukhono kwase kumulayi,

khukhwoolesa ise n'ikhaare basiku boowo asi we bikyele byoowo.’

45“Aso, noola Dawudi amulaanga khuuba ‘Umukasya,’ anyala aryeena ndi khuuba umwitsukhulu weewe?”

46Ne mbaawo na mutweela yeesi uwanyala khumwiilamo ta, ni khukhwaama khu shifukhu isho, mbaawo n'umuundu na mutweela uwamutsaalatsaalila khumureebaka bireebo luundi ta.

Currently Selected:

Matayo 22: LPE

Highlight

Copy

Compare