Matayo 15

Khuuleekela khwe bakuuka

(Mako 7.1-13)

1Lwanyuma Bafarisaayo ni baleekeli be kamakaambila ka Musa baama i Yerusalemu, beetsa isi Yesu baamureeba bari, 2“Lwashiina baleekelwa boowo bafuniaaka bye tsisaambo tse basakhulu tsikhale? Lwekhuuba sibasaaba kamakhono#15.2 Bayudaaya baabatsaka ni kamakaambila kamarafu kakawaamba khu khusaaba mu mukhono nga umuundu ashiili khulya biilyo ta. nga batsya khulya ta.”

3Yesu wabeelamo ari, “Ni nanywe lwashiina mufuniaaka likaambila lya Wele lwe khuukana khuwaamba tsisaambo tseenywe tsikhale? 4#Luky 20.12; Maka 5.16; Luky 21.17; Lev 20.9Lwekhuuba Wele aloma ari, ‘Yiisatsakamo paapawo ni maayi woowo lukoosi,’ luundi ari, ‘Umuundu yeesi ukhomaka paapawe ni maayiwe, akhila khukhwiribwa.’ 5Ne inywe muloma muri umuundu yeesi uloma paapawe namwe maayiwe ari, ‘Shoosi sheesi naandikhuweele khuukhuyeeta, shili shiwaanwa sha Wele.’#15.5 Abe mu Shiyudaaya nga umuundu walomele ari shishiindu shili shiwaano isi Wele, aba sashikaba isi umuundu ukuundi ta. 6Uyo uloma aryo bari s'akhiile khukhwiisamo paapawe, namwe maayiwe shiriifwa ta. Musaambo iyo inywe mufuniaaka likaambila lya Wele lwe khuukana khuuwaamba tsisaambo tseenywe tsikhale. 7Inywe babeeyi babemiliisa khu ngaaki, Yisaaya umuŋoosi s'abalomakho bulayi inywe nga n'aloma ari,

8 # Isay 29.13 ‘Babaandu bano baantsisamo ise shiriifwa ni kiminwa busa,

ne kimyoyo kyaabwe kiindi aleeyi naabi.

9Bamala busa imbuka yaabwe khukhuuntsisaaya,

nga baleekela kamakaambila ke babaandu busa khuuba niko ka Wele.’”

Bibiindu bibikalusa umuundu khuuba umunyaalu

(Mako 7.14-23)

10Yesu walaanga babaandu waabaloma ari, “Ni muwulile mumanye byeesi ise inoma. 11Akhuba shishiindu shishinjila mukhanwa kh'omuundu nisho shishimukhola waba umunyaalu ta, ne isho shishirura mukhanwa nisho shishonakisa umuundu.”

12Lwanyuma baleekelwa bamwiitsayo bonyene bamuloma bari, “Wamanyile nga Bafarisaayo shibabirisile buubi nga ni bakhuwuliile ukanikha uryo?”

13Naye Yesu wabeelamo ari, “Buli kusaala kwoosi kweesi Paapa wase uwe mwikulu akhabyaala, kulikhuuliwa ni tsinandila tseene. 14#Luka 6.39Ni mubalekhe mukhabenaanayo ta. Nibo bali baraangilisi baabofu busa babaraangilila baabofu bashaabwe. Lwekhuuba umubofu mutweela n'araangilila umubofu washe, boombi bakwa mwilowo.”

15Petero welamo ari, “N'ukhusontsoole lusimo lweesi ulomile.”

16Yesu wabareeba ari, “Ni nanywe si muli ni kamakyesi ta? 17Si mumanya muri shishiindu shoosi shishinjila mukhanwa, shitsya busa munda, lwanyuma sharura ibulafu shaatsya mu khayu ta? 18#Mat 12.34Ne bibiindu bibyaama mukhanwa nibyo byaama mu mwoyo, bino nibyo bibyoonakisa umuundu. 19Lwekhuuba mu mwoyo nimwo mumwamamwo bibyambaaso biibi, bubwiiri, buyeyani, khukhwikoomba khuubi, bubwiifwi, buwombesi, ni khufwotsola. 20Bibiindu bino nibyo bibyoonakisa umuundu, ne khuulya busa nga mbakhusaaba kamakhono sikhwonakisa umuundu yeesi ta.”

Khuufukiilila khw'omukhasi uwe Kanani

(Mako 7.24-30)

21Yesu waarurayo iyo, waatsya mu byaalo bye Tuulo ni Sidoni. 22Ibweene iyo umukhasi umu Kanani wamayo, weetsa is'ali, welootsa ari, “Umwitsukhulu wa Dawudi, n'umambile shiisa, umukhaana wase walwaalile lukali, kimisaambwa kimutaambisa.”

23Ne Yesu waalekha khumwiilamo ta. Kila baleekelwa beewe bamwiitsayo baloma bari, “N'uwoone umukhasi uyu atsye, lwekhuuba wakhulondelele nga ayokesa lukali.”

24Yesu wabeelamo ari, “Ise Wele anduma isi kamasheese kakaakoraana ke mu ntsu ya Isiraeli konyene.”

25Ne umukhasi weetsa waakwa aasi mu bikyele byeewe, waamwikontselela ari, “Umukasya, n'unjeete.”

26Yesu welamo ari, “Sishili shilayi khubukula biilyo bye babaana wabituumila tsiimbwa ta.”

27Umukhasi naye welamo ari, “Ni abweene Umukasya, ne ni tsiimbwa natso tsilya buubuya bubuukwa khukhwaama khu meetsa ye bakoosi baatso.”

28Yesu welamo ari, “Mukhas'iwe khufukiilila khwoowo nga khukali! Aso, khashikholekhe is'uli nga n'uloombile.”

Ni mu saawa nyene iyo, umukhaana weewe wawona.

Yesu awonesa babaandu bakali

29Yesu waarurayo waatsya nga abirira khu ndulo khwe inyaantsa iye Galilaaya. Lwanyuma waniina khu lukiingi wekhala aasi. 30Kamatuuli makali ke babaandu keetsa is'ali nga bareera baleme, baabofu, babaayikila, bawawuma, ni babaandi swa busa, baabara abikyele byeewe; naye Yesu waabawonesa boosi. 31Lituuli lye babaandu lyelaliila busa, nga ni baabona bawawuma nga bakanikha, babaayikila nga bakwalaalile, baaleme nga bakyeenda, ni baabofu nga babona. Baryo boosi baabuyila Wele wa Isiraeli.

Yesu aliisa babaandu bikana bine

(Mako 8.1-10)

32Yesu walaanga baleekelwa beewe beetsa is'ali, waabaloma ari, “Ise nasasiile babaandu bano, lwekhuuba babeele ni nase ano khumala bifukhu bitaru, nga sibalikho ni sheesi baliilekho ta. Ni nase shingana khubasibula nga bali ntsala busa baryo ta, lukana banyala baakwa mu ntsila.”

33Baleekelwa beewe bamureeba bari, “Ifwe kane khwamise eena biilyo mu mubiimbi muno byeesi khunyala khwaliisila babaandu bano boosi?”

34Yesu wabareeba ari, “Ne muli ni kimikaati kyeenga?”

Nabo bamwiilamo bari, “Kili musaafu, ni bunyeeni bukyeekhe buri.”

35Yesu walakila babaandu bekhale aasi. 36Lwanyuma wabukula kimikaati ikyo musaafu, ni bunyeeni ibwo. Ne lwanyuma nga waamalile khubiloombela ikhabi wabimenyulamo, wawa baleekelwa, ni baleekelwa nabo babikabila babaandu. 37Babaandu boosi baalya, khukhwoolesa ni bekura. Lwanyuma baleekelwa babuusanisa buubuya bubwarama, bwetsula bibiipo musaafu. 38Bukali bwe babaandu babaalya baaba basaani bikana bine (4,000), nga akhurakho bakhasi ni babaana ta. 39Lwanyuma nga Yesu waasibuule babaandu khuutsya, umweene waaniina mwikhoŋolo, waatsya mu shaalo sha Magadani.

Currently Selected:

Matayo 15: LPE

Highlight

Copy

Compare