Matayo 14

Khuufwa khwa Yokana Umubatisa

(Mako 6.14-29; Luka 9.7-9)

1Mu bifukhu ibyo, Herode umuwuli, waaba nga awulilaka lubuyi luluwaamba khu Yesu. 2Kila alomela babakaanisi beewe ari, “Oyu niye Yokana Umubatisa! Waalamukhile khukhwaama mu bafu, nisho shishikila akhola bye kamakaanga bino byoosi.”

3 # Luka 3.19,20 Shino shaba shiryo lwekhuuba Herode makiboolekho, awaamba Yokana Umubatisa wamubowa, wamura mu mapuusu. Herode akhola shino khu lwa Herodiya, umukhasi wa wandaaye Filipo. 4#Lev 18.16; 20.21Yokana Umubatisa alomela Herode ari, “Shili she kumusilo iwe khuyila Herodiya, umukhasi wa wandaayo.” 5Aryo Herode wakana khukhwiira Yokana, ne warya lwe kamatuuli ke babaandu, lwekhuuba babaandu bambaasa Yokana khuuba umuŋoosi.

6Shifukhu shoola khweesi Herode akabulilakho kamayiiya khu shifukhu she kamasaalikha keewe. Umukhaana wa Herodiya weetsa washinila iburaangisi waabwe, wekhoyesa naabi Herode. 7Ni abweene awo, Herode wamulomela nga etsuba ari, “Kane ikhuwe shishiindu shoosi sheesi kane unoombe.” 8Ne umukhaana n'amala khuboolelwa ni maayi weewe shiina she khuloomba, waaloma ari, “Khu saawa yino, ingana wumbe kumurwe kwa Yokana Umubatisa nga kuli khu lweelo.” 9Umuyiinga kumutaambo kwamuwaamba lukali, ne lwekhuuba etsubila mu moni tse bakyeni beewe boosi beesi aba nabo khu mayiiya, walakila ari bawe umukhaana kumurwe kwa Yokana Umubatisa nga n'aloomba. 10Aryo walakila baatsya bakhalakho Yokana Umubatisa kumurwe mu mapuusu. 11Kumurwe tsana bakureera khu lweelo, bakuwa umukhaana, n'umukhaana naye wakuyilila maayi weewe. 12Baleekelwa ba Yokana beetsa basuta kumulaambo kweewe, bakuyila, bakusiikha. Lwanyuma baatsya baboolela Yesu byoosi bibyakholekha.

Yesu aliisa babaandu bikana biraano

(Mako 6.30-44; Luka 9.10-17; Yokana 6.1-14)

13Aryo Yesu n'awulila bino bibiwaamba khu Yokana Umubatisa, waarurayo iyo, wambukhila mwikhoŋolo, waatsya iyo yenyene, mu shiifwo mumukhali babaandu ta. Ne kamatuuli ke babaandu ni kawulila karyo, bamaka mu biriimba nga bakyeenda khumuloondakho. 14Ne Yesu n'amala khurura mwikhoŋolo, waabona lituuli lye babaandu bakali, wabawaambila shiisa, wawonesa ibo boosi babaaba balwaale.

15Ne antsye ni bwaba nga bwilabula, baleekelwa beewe beetsa is'ali bamuloma bari, “Ano khuli mu mubiimbi, naluundi antsye bona bulikho bwilabula, siibula babaandu batsye beweentsele bye khulya mu byaalo esi kane babinyoole.”

16Yesu naye wabeelamo ari, “Babaandu bano sibaakha khuutsya ta. Inywe mwabeene ni mubawe shakhulya shishiiliwo balye.”

17Nabo baleekelwa bamwiilamo bari, “Ano khuliwo ni kimikaati kiraano kyonyene, ni tsinyeeni tsibili.”

18Lwanyuma Yesu wabeelamo ari, “Ni mubindereere ano.” 19Aryo kila alakila babaandu khukhwikhala aasi khu bunyaasi. Waabukula kimikaati tsana kiraano, ni tsinyeeni tsibili, waakalama mu ngaaki mwikulu, waasiima Wele. Aryo waamenyulamo kimikaati, waakiwa baleekelwa beewe, baakikabila babaandu. 20Babaandu boosi baalya, bekura. Lwanyuma baleekelwa ba Yesu baabuusanisa buubuya bubwarama, betsusa bibiipo liikhumi na bibili. 21Buukali bwe babaandu boosi babaalya baaba boola basaani bikana biraano (5,000), nga akhurakho bakhasi ni babaana ta.

Yesu akyeendela khu meetsi

(Mako 6.45-52; Yokana 6.15-21)

22Khaangukho Yesu waalakila baleekelwa beewe khuuniina mu likhoŋolo, ari baraangile batsye shanjelekha we nyaantsa, nga niye n'ashiiramakho inyuma amale khusiibula lituuli lye babaandu. 23Ne lwanyuma n'amala khusiibula babaandu, waaniina khu lukiingi khuuloomba. Ne antsye ni bwelabula, waaba nga ali yenyene ibweene iyo. 24Ne khu mbuka nyene yino, likhoŋolo lyaba lyaamalile khukhwoola akari khu nyaantsa khukhwaama khu lwoomu, nga liyiyaanisibwa ni khuutumbuukha khwe kameetsi, ni mbewo ingali nga ibawuutsa khuubaama ibweeni.

25Mu shilo isho, akari e tsisaawa nga sheenda namwe liikhumi na tsibili tse kumutikhinyi, Yesu umweene weetsa isi bali nga akyeendela khu meetsi. 26Ne baleekelwa ni baamubona nga akyeendela khu meetsi baarya naabi, nga baloma bari, “Bona shisimu.” Baryo bahariina lwe khuurya khukali.

27Ni abweene awo, Yesu waabaloma ari, “Mukheyembelela ta. Ise niye Yesu. Mukharya ta.”

28Lwanyuma Petero wamuloma ari, “Musakhulu, noola iwe niye, indakile niitse is'uli nga injendela khu meetsi.”

29Yesu waamulomela ari, “Ni wiitse.” Aryo Petero waarura mwikhoŋolo, wakyeendela khu meetsi nga atsya isi Yesu. 30Ne Petero n'abona imbewo iye kamaani, waarya, aryo, waarakikha khukhwisiikha mu meetsi. Ne welootsa khaangu ari, “Umukasya, n'umbonese.”

31Khaangukho Yesu waakolola kumukhono kweewe, waamukumila, nga aloma ari, “Iwe nga uli ni khufukiilila khufwiiti. Lwashiina wikanakaane?”

32Baryo Yesu ni Petero baniina mwikhoŋolo, ni mbewo yakama. 33Baryo ibo babaaba mwikhoŋolo, bamwisaaya nga baloma bari, “Ilala iwe uli Umwaana wa Wele.”

Yesu awonesa balwaale i Genesareeti

(Mako 6.53-56)

34Baryo Yesu ni baleekelwa beewe ni baamala khukhwambukha inyaantsa, boola khu lwoomu i Genesareeti. 35Ne babaandu b'eyo ni bamwofwasa nga niye Yesu, barumanisaka mu byaalo byeeyo bibihesanewo isi buli muundu, khureera balwaale boosi isi Yesu. 36Baryo baamwikontselela bari balwaale abo batiilekho butiili khu ndulo khwe ngubo yeewe. Baryo boosi babaatiilakho baawonesebwa.

Currently Selected:

Matayo 14: LPE

Highlight

Copy

Compare