Baheburania 9

Khukhwisaaya khwe mu shiibala ni khwe mwikulu

1Indakaano iyanyoowa yaba ni bilakilo byayo bibiwaamba khu khwisaaya ni shifwo shifuura bukhosefu she mu shiibala. 2#Luky 26.1-30; Luky 25.31-40; Luky 25.23-30Mu weema iyareebwawo, mu khaseenge khakhanyoowa mwabamo shisiindi she taala, ni meetsa, ni kimikaati kikiwaanibwayo isi Wele. Shino shalaangibwatsaka bari, Shiifwo shikhosefu.

3 # Luky 26.31-33 Ne inyuma we ngubo iyatiimbibwa, yabayo khaseenge khakhalaangibwa bari, Shiifwo shishifuura bukhosefu. 4#Luky 30.1-6; Luky 25.10-16; Luky 16.33; Bala 17.8-10; Luky 25.16; Maka 10.3-5Mubweenemwo mwabamo shisheeso she zaabu, ni sanduuku iye'ndakaano iyabiimbiwakho ni zaabu tsimbeka tsoosi. Mu sanduuku yino mwabamo inyuungu iye zaabu iyabamo imaanu ni miimbo ya Aroni iyasisinakho kamaru, ni kamabaale kakaronebwakho kamakaambila. 5#Luky 25.18-22Khu ngaaki khwe sanduuku khwabakho bakerubi be shiriifwa, nga tsindaha tsaabwe tsabiimbilile shiifwo esi bibyoonako biyakhilwa. Ne bino ari sikhunyala khubikanikhakho mu bubalaayi ta.

6 # Bala 18.2-6 Ne bino byoosi ni byaamala khurekekhebwa biryo, basaayi benjilatsaka busheele mu khaseenge khakhanyoowa khukhola kimilimo kyaabwe kye khusaaya. 7#Lev 16.2-34Ne umusaayi ufuura bukhulu yenyene niye uwenjilatsaka mu khaseenge khe mukari ate nga enjilamo kumuluundi mutweela kwonyene buli mwiiko. Ne s'enjilatsakamo akhali ni kamalasile ta, keesi awanatsakayo khulwe bibyoonako byeewe umweene, ni khulwe bibyoonako byeesi babaandu babaandi baakhola mu khulekha khumanya ta.

8Ne mu shino Umwoyo Umukhosefu aboola ari, intsila ye khukhwinjila mu shifwo shifuura bukhosefu yaba ishiili khumanyisibwa ta, iweema iyanyoowa n'iba nga ishiliwo. 9Shino shifwaani shishokesanisa bisiintsa bya aluno ari, khumanyisa ndi biwaanwa ni tsisaayilo bibiwaanibwayo byaba sibinyala khupyeluusa kumwoyo kwooyo uwisaaya ta. 10Bilakilo bino byaba busa bye khuulya ni khuunywa, ni bibiindi bibiwaamba khu khupyeluusa kimibili. Bino byoosi byaba bilakilo bye khu ngaaki bibyaba biraamba khukhwoolesa imbuka ye bibiindu khukalusibwa bushaakha.

11Ne Kristo n'etsa nga umusaayi ufuura bukhulu, uwe bibiindu bilayi bibyamala khukhwiitsa, nga abira mu weema ifuura bukhulu luundi iyoolelela ilala, ikhaakholewa ni kamakhono kye babaandu ta, shishimanyisa ndi, iweema yino shiili niyo iye mu shiibala muno ta. 12Niye s'enjila mu shifwo shifuura bukhosefu ni kamalasile ke tsimbusi, namwe ke tsikhaafu ta, ne niye enjilamo kumuluundi mutweela kwonyene khulwa boosi ni kamafuki kakeewe kameene, aryo wakhunyoolela khusikulibwa khukhawawo ta.

13 # Lev 16.15,16; Bala 19.9,17-19 Lwekhuuba noola kamalasile ke tsimbusi ni ke tsiwuunwa, ni likokhe lye tsikhaafu tsitsokhebwa lyawanyibwatsaka khuubo babaaba babonaki, nio babe bakhosefu khu ngaaki, 14kamafuki ka Kristo umweene uwehaanayo isi Wele mu Mwoyo ukhawawo, nga s'alikho ni likoondo lyoosi, shikalifuurira ilala khusiinga kimyoyo kyeefwe ni khurusamo bibikholewa bibikhuyila mu khufwa, nio manya nafwe khwisaayatsake Wele weefwe Umulamu ta?

15Ni lwe lomo yino, Kristo niye umurume we ndakaano imbya nio ibo babaalaangibwa ni Wele banyale khufuna busikha bukhawawo bweesi babalomela mu ndakaano iyanyoowa, khukhwaama nga niye n'afwa nga shisikulo khuwonesa babaandu khukhwaama mu byoonako byaabwe, bibyakholebwa nga bashiili aasi e ndakaano iyanyoowa.

16Lwekhuuba awo aali indakaano iye shilaamo, aakha khuubawo khuufwa khwooyo uwashikhola, nio shanyala khukhwoolelesebwa. 17Lwekhuuba indakaano iye shilaamo she busikha shireebwa mukhola nga umuundu uwashikhola wafiile, ne nga sishinyala shareebwa mukhola nga uyo uwashikhola ashiili mulamu ta.

18Shikila indakaano iyanyoowa siyanyala khuraamba akhali kamafuki ta. 19#Luky 24.6-8Aryo Musa wasontsoola babaandu buli likaambila liliili mu makaakambila ni liloma. Nio lwaanyuma wabukula kamalasile ke tsikhaafu ni tsimbusi, atweela ni kameetsi, ni bubwooya bubesemu, ni shishangwe, wakawanyaka khu burone bweene, ni khu baandu boosi, 20nga aloma ari, “Kano niko kamafuki ke ndakaano yeesi Wele abalakila inywe khuwaamba.” 21#Lev 8.15Ni musaambo niyo ndweela, awanyaka kamafuki khu weema atweela ni khu biindu byoosi bibyaba biraambisibwa mu khwisaaya. 22#Lev 17.11Mwilala khulondekhana ni kamakaambila, buli shiindu shoosi shipyeluusibwa ni kamafuki, naluundi akhali khuutsukha kamafuki, s'abawo khukhwiyakhilwa khwe bibyoonako ta.

Isaayilo ya Kristo irusawo bibyoonako

23Nashiryo shiba shilayi shifwaani busa sh'ebyo bye mwikulu byaŋoonebwa musaambo yino iye tsisaayilo, ne bibiindu bye mwikulu bibyeene bikana khuŋoonebwa ni tsisaayilo tsitsifuurisa tsino. 24Lwekhuuba Kristo s'enjila mu shifwo shifuura bukhosefu shishakholebwa ni kamakhono kye babaandu busa ta, shishiili busa shifwaani she shiifwo shisheene sha ŋali ta, ne niye atsya mwikulu mubweene, esi ari abonekhela khulweefwe mu moni tsa Wele. 25Akhuba ndi atsya mwikulu khukhwiwaanayo kimiluundi mikali ta, nga esi umusaayi ufuura bukhulu n'enjilaatsaka mu shiifwo shifuura bukhosefu buli mwiiko, nga atsyatsakamo ni kamafuki kakakhaaba kakeewe kameene ta. 26Isho shimanyisa shiri khali Kristo wataambisibwa kimiluundi swa busa khukhwaama khu khubuumbibwa khwe shiibala. Ne ari niye abonekha kumuluundi mutweela khulwa boosi ibumaliliso we shiibala khurusawo bibyoonako lwe khukhwiwaanayo umweene.

27Ne nga ni shareebwawo shiri babaandu khuufwa bafwe, bafwa kumuluundi mutweela, lwanyuma lwayo kumusaango. 28#Isay 53.12Kristo naye aryo, n'amala khukhwiwaanayo kumuluundi mutweela lwe khukhwityuukha bibyoonako bye bakali, alibonekha kumuluundi kwe khabili, akhuba lwe khukhwityuukha bibyoonako luundi ta, ne khureera buwonesi isi ibo babamuliindilila.

Currently Selected:

Baheburania 9: LPE

Highlight

Copy

Compare