Baheburania 3

Yesu niye mukhulu khufuura Musa

1Ni nashiryo be buulebe bakhosefu babakabananila atweela ni nafwe mu khulaangibwa khwe mwikulu, ni mwomisile bibyambaaso byeenywe khu murume luundi umusaayi ufuura bukhulu uwe khufukiilila khweesi khubuula, nga niye Yesu. 2#Bala 12.7Niye aba umwiyikinwa isi uyo uwamurobola, nga Musa n'aba umwiyikinwa mu buraambi bwe mu ntsu ya Wele. 3Ne Yesu niye akhila shiriifwa shikali khufuura Musa, nga ni shili ndi, uyo uwombekha intsu ali ni shiriifwa khufuura intsu inyene. 4Lwekhuuba buli intsu ibakho n'umwombakhi wayo, ne umwombakhi wa byoosi niye Wele.

5Ne Musa aaba umwiyikinwa mu buraambi bwoosi bwe mu ntsu ya Wele nga umwakaanisi wamwo, nga akanikha khu biindu ibyo bibyaba bitsya khulomewakho lwanyuma. 6Ne Kristo aaba umwiyikinwa nga Umwaana ulolelela byoosi bye mu ntsu ya Wele. Ni nafwe khuli intsu yeewe, ni khuba nga khuwandalalila mu mwiyikino kweefwe ni kumwikhoyo.

7 # Zab 95.7-11 Nashiryo, nga Umwoyo Umukhosefu n'aloma ari,

“Shaleelo ni muwulile likono lyeewe.

8Mukhahandalasa kimyoyo kyeenywe ta,

nga esi mwaminyaalila khu shifukhu

she khukhakibwa nga muli mu mubiimbi.

9Ibweeneyo esi bakuuka beenywe bakhakilisila ise luundi bantsema,

ni mu miiko kamakhumi kane babona buraambi bwase.

10Nilwa shino nakhalalila kumuboolo ukwo, naloma ndi,

‘busheele baborokha mu ntsambaasa ye kimyoyo kyaabwe,

naluundi baakhumanya tsintsila tsase ta.’

11Nga ni netsuba mu lirima lyase ndi,

‘Sibalingila nakhafwiiti khoosi mu shifwo sheesi nandibaweele khuwolelamo ta.’ ”

12Bebuulebe, ni mubone muri, mwiliinda mulekhe khubamo na mutweela mus'iinywe uwe kumwoyo kumwonaki kukukhafukiilila ta, lukana kukukila umuundu wakwa waarura khu Wele umulamu. 13Nashiryo, ni mwisanemo kamaani mwenyene na mwenyene busheele, niiba nga iliyo shifukhu shishilaangibwa bari, “Shaleelo.” Nio ilekhe khubawo na mutweela khus'inywe uminyaala khulwe bubeeyi ni khulwe bubwoonaki ta. 14Lwekhuuba ifwe khwakabananila atweela ni Kristo, ni khuba nga khuwandalalila mu bwiyikino bweesi khwanyoowa khuuba nabwo, khukhwoolesa ikhumalilisa.

15 # Zab 95.7,8 Nga ni shilomewa shiri,

“Shaleelo ni muba nga mwawuliile likono lyeewe,

mukhahandalasa kimyoyo kyeenywe ta,

nga ni mwakhola mu bumiinyi bweenywe.”

16 # Bala 14.1-35 Ne banaanu nibo babaaminyaala ni baawulila likono lya Wele? Akhuba abo beesi Musa araangilila nga baama i Misiri ta? 17Banaanu ndi beesi Wele aarunyila khuumala kimiiko kamakhumi kane? Si bali abo baboonaka ta, ni kimilaambo kyaabwe kyasalanisibwila mu mubiimbi ta? 18Naluundi banaanu ndi beesi Wele etsubila ari sibalinjila na khafwiiti khoosi ta mu shifwo sheesi nandibaweele khuwolelamo, nga akhuba abo babaaminyaala? 19Ni nashiryo, khubona khuri, nibo sibaanyala khukhwinjila mu shifwo isho ta, lwe khulekha khufukiilila khwawe.

Currently Selected:

Baheburania 3: LPE

Highlight

Copy

Compare