Baheburania 2

Buuwonesi bwe kamaani

1Nashiryo ifwe khwaakha khukhwinaanayo naabi khu biindu bya ŋali byeesi khuwuliile, nio khulekhe khukoraanisibwa ta. 2Lwekhuuba noola shilomo shishalomebwa ni bamalayika shaba ni shisheene, ni khukhwoneka khwoosi ni bumiinyi byanyoola shitaambiso shishibyakhila. 3Nafwe khulinyala khuryeena khutitukha, noola sikhwinaanayo isi buwonesi bukhulu bufwaana buryo ta? Buwonesi makiboole bwanyoowa khulomewakho n'Umukasya, nio bwaŋaŋasibwa is'ifwe ni naabo babamuwulila. 4Wele umweene aloselakho bujulisi bweewe khu bye kamakaanga, ni bubonelo, ni bibiyaangisa bibiindi swa busa, ni biwaanwa by'Omwoyo Umukhosefu bibyakabibwa nga khuukana khweewe ni khuli.

5Lwekhuuba bamalayika sibali nibo beesi Wele awa khuwula shiibala isho shiitsya khwiitsa, sheesi khulomakho ta. 6#Zab 8.4-6Ne aliwo isi umuundu mutweela alomela ari,

“Umuundu niye shiina,

nio iwe khumushebulila.

Namwe Umwaana w'Omuundu iwe khumwinaanayo?

7Iwe wamubuumba khuutaambakho khakyeekhe khuuba nga bamalayika,

wamukwaarisa liyabi lye shiriifwa ni lukoosi.

8Waara bibiindu byoosi aasi e bikyele byeewe.”

Wele khuura bibiindu byoosi aasi e bikyele byeewe, mbaawo na shitweela sheesi Wele alekha khuura mu bunyala bweewe ta. Ni naari sikhubona nga bibiindu byoosi bili mu bunyala bweewe ta. 9Ne khubona Yesu uwakholewa nga ataambakho khakyeekhe khuuba nga bamalayika; ari niye wakwaarisibwa shiriifwa ni lukoosi, lwe khutaambisibwa khwe khuufwa, nio akile lwe bubweela bwa Wele, anyale khutsemakho khuufwa khulwa buli muundu.

10Lwekhuuba Wele shamwaakhila, nga khulweewe umweene, luundi nga mu niye buli shiindu shoosi shareewawo khufukiilila Yesu, uuli umweene umurakikhisi luundi umukhulu we buwonesi. Aryo aataambisibwa nio akile areere babaana bakali mu shiriifwa. 11Khulwekhuuba Yesu uyo ureera bukhosefu, ni naabo beesi areerera bukhosefu bali ni Wele nga Paapa waabwe. Shino nisho shishikila Yesu walekha khuwaambiwa tsisoni khubalaanga ari babandaaye ta. 12#Zab 22.22Niye aloma ari,

“Indirumbula lisiina lyoowo isi babandaayase.

Indiimba kimyeenya kye khukhubuyila iwe mu lubusano lwe bafukiilisi.”

13 # Isay 8.17; Isay 8.18 Luundi aloma ari,

“Indiira bubwiyikinwa bwase mu Wele.”

Naluundi ndi ari: “Bona ise ndi ano ni babaana beesi Wele aamba ise.”

14Lwekhuuba nga babaana ni bali ni kumubili ni kamafuki, ni naye aryo akabananila atweela ni nabo mu khuba umuundu, nio manya khuubirira mu ntsila ye khuufwa, anyale khuhesa kamaani ke khuufwa nga niko Sitaani. 15Ni mu maani kano anyale khukangulula ibo bababowebwa buulamu bwaabwe bwoosi nga barya khuufwa. 16#Isay 41.8,9Lwekhuuba mwilala sibali bamalayika nibo beesi ayeeta ta, ne njeeba babetsukhulu ba Iburayimu. 17Ni nashiryo aakha khuuba nga babandaaye beewe ni bali musaambo tsoosi, nio anyale khuuba Umusaayi ufuura bukhulu, uwe shiisa luundi umwiyikinwa mu bwakaanisi bwa Wele, lwe khuusikula babaandu mu byoonako byaabwe. 18Lwekhuuba niye umweene ataambisibwa mu khukhakibwa khweewe, naye aryo ari anyala khuyeeta ibo babaali mu khukhakibwa.

Currently Selected:

Baheburania 2: LPE

Highlight

Copy

Compare