1 Petero 4

Buulamu bubushuukhile

1Aso, khukhwaama nga Kristo n'atsiinisibwa mu mubili, nanywe ni mwikumise mu myoyo kyeenywe, mube n'intsibaasa nga isi niye aaba ni nayo. Lwekhuuba buli muundu utsiinisibwa mu mubili kweewe aba saashikholakana luundi ni shishoonako ta. 2Ni khukhwaama abweenewo, umuundu uyo s'amenya luundi bulamu bweewe buburamileyo bwe mu shiibala lwe khukhwiwuuma khwe kumubili ta, ne lwe khuukhola ibyo byeesi Wele akana. 3Lwekhuuba khaale mwamala imbuka yeenywe nga mukhola bibiindu ibyo byeesi Banaambo bakana khukhola. Bulamu bweenywe bwaba bwe buyeyani, khukhwiwuuma, bumeesi, kimikhoyo kye shiibala, kamayiiya ke bisaambwa, ni by'embikho bye khukhwisaaya bifwaani. 4Ne ari Banaambo beyaanga lwe khuubona nga simwitubaasa ni nabo mu bulamu bwe bumoyaani naluundi bubukhomyaasa ta. Isho shaakila babaakhoma inywe. 5Ne baliiwotsakho babeene isi uyo uwilekekhele khuukhalila baalamu ni baafu kumusaango. 6Ni lwe lomo yino, kila kamakhuuwa kamalayi kaboolelwa ikhaba n'isi bafu nabo, nio ikhaba nga kumusaango kwabakhalilwa mu mubili nga babaandu, ne mu mwoyo babe balamu nga Wele umweene n'ali umulamu.

Babiikhi baalayi be biwaanwa bya Wele

7Intsakamo iye bibiindu byoosi ili aambi. Ni nashiryo, ni mube babetsililisi, mube meeso nio munyale khuloomba. 8#Nikh 10.12Ne khufuura byoosi, ni mukanane mwenyene na mwenyene, lwekhuuba khuukana khubiimba khu byoonako bikali. 9Ni mwikhoyanatsakile muungo mweenywe akhali khukhwiŋuluŋuunya khwoosi ta. 10Buli muundu n'araambise shiwaanwa sheesi aaweebwa khukhwakaanisa babaandi, nga babiikhi baalayi be bubweela bwa Wele bubuukhali butweela ta. 11Buli muundu yeesi uboolela aakha khuuboolela bilomo bya Wele. Na buli uyo yeesi uwakaanisa, aakha khukhwakaanisa ni kamaani keesi Wele amuwa, nio akile mu biindu byoosi Wele aboolelesewe khulwa Yesu Kristo. Umweeneyo aweebwe shiriifwa ni kamaani, biilo ni biilo. AMIINA.

Khuutsiinisibwa lwe khuuba umufukiilisi mu Kristo

12Bakanwa baase, mukheyaanga lwe khuutsiinisibwa khuukali khukhuuboolelekho nga khubakhakilisa ta. Shino shikhafwaana nga shishiindu shikyeni ta. 13Ne ni mwikhoye lwekhuuba mulikho mukabananila atweela ni Kristo mu khutsiinisibwa khweewe, nio kumwikhoyo kweenywe kube kumukali naabi nga shiriifwa sheewe shabonekhele. 14Ne nga muli ni khabi ni muba nga mukhomewa lwekhuuba muli ba Kristo! Shino shimanyisa shiri Umwoyo wa Wele uwe shiriifwa ali khwiinywe. 15Ni muba nga mutsiinisibwa, shikhaba nga ndi umuundu yeesi khwiinywe alikho atsiinisibwa lwekhuuba ali umwiiri, namwe umwiifwi, namwe ukhola buubi, namwe uwikhupila mu bye baashe ta. 16Ne umuundu yeesi n'ataambisibwa khulwekhuuba ali uwa Kristo, akhawaambiwa kamaŋaanyu ta, ne n'abuyile Wele lwe lisiina lya Kristo.

17Ari imbuka ye khuukhala kimisaango yoolile, ili khuutsya khurakikha ni be mu ntsu ya Wele. Ne kumusaango ukwo ni kurakikha ni nafwe, intsakamo yaabo babaakhawulila kamakhuuwa kamalayi, iliiba iryeena? 18#Nikh 11.31Nga ni sharonebwa shiri,

“Ni shiba nga shili shihangafu babaandu bakwalaafu khuuwonesebwa,

ne shiliiba shiryeena isi babaakharya Wele ta, baboonaki?”

19Ni nashiryo abo babaatsiinisibwa nga khuukana khwa Wele ni khuli, ni beloosele khukhwiwaanilayo ilala kimyoyo kyaabwe isi umubuumbi, luundi beloosele khuukhola biilayi. Wele niye alyoolelesa sheesi aasuubisa.

Currently Selected:

1 Petero 4: LPE

Highlight

Copy

Compare