1 Yokana 5

Khuufukiilila mu Mwaana wa Wele

1Buli muundu yeesi ufukiilila ari, Yesu niye Kristo, aba wasaalikha ni Wele. Na buli muundu yeesi ukana Paapa aba akana n'umwaana weewe naye. 2Ni khuba nga khukana Wele, luundi khwakhola byeesi kamakaambila keewe kaloma; ikhwo khuba nikhwo khweesi khumanyila khuri khukana babaana ba Wele. 3#Yok 14.15Khuukana Wele, nikhwo khuwulilatsaka kamakaambila keewe, ni kamakaambila keewe kano sikali kamasiro ta. 4Lwekhuuba buli muundu uwasaalikha ni Wele, awula shiibala. Ifwe khuwula shiibala lwe khufukiilila khweefwe. 5Ne naanu unyala khuwula shiibala, khurusakho uyo ufukiilila ari, Yesu niye Umwaana wa Wele?

Bujulisi bubuwaamba khu Yesu Kristo

6Yesu Kristo oyu niye uweetsa nga abirira mu meetsi ke khuubatisibwa khweewe naluundi nga abirira mu mafuki ke khuufwa khweewe. Ne niye sishili bari etsa nga abirira mu meetsi ke khuubatisibwa ako konyene ta, ne ni kameetsi ni khuutsukha kamafuki. N'Umwoyo niye uuwa bujulisi ari bino bili bya ŋali. Lwekhuuba Umwoyo niye Ŋali. 7Waliwo bataru babaawa bujulisi khu shiindu shino, nibo bano; 8Umwoyo, kameetsi, ni kamafuki, naluundi bataru bano bafukiilisana. 9Noola khufukiilila bujulisi bwe babaandu, bujulisi bwa Wele nibwo buukhulu khuuminyisa, lwekhuuba buli bujulisi bweesi awa bubuwaamba khu Mwaana weewe. 10Buli muundu yeesi ufukiilila Umwaana wa Wele, aba ni bujulisi buno mu mwoyo kweewe. Ne uyo ukhafukiilila Wele ta, aba wakalusile Wele khuuba umubeeyi, lwekhuuba aba wakhufukiilila bujulisi bweesi Wele awa bubuwaamba khu Mwaana weewe ta. 11#Yok 3.36Ni bujulisi tsana nibwo buno: Wele wakhuwa ifwe buulamu bukhawawo ta, ni bulamu ubwo buli mu Mwaana weewe. 12Buli muundu yeesi uli n'Umwaana, ali ni bulamu, ne uyo yeesi ukhali n'Umwaana wa Wele ta, s'ali ni bulamu ubwo ta.

Buulamu bubukhawawo ta

13Ise mbaronela bilomo bino, inywe babafukiilila mu lisiina ly'Omwaana wa Wele, nio munyale khumanya muri, muli ni bulamu bukhawawo ta. 14Buno nibwo bubwiyikinwa bweesi khuli nabwo nga khwisyeenda aambi ni Wele, khuri ni khuloomba shishiindu shoosi nga khuukana khweewe ni khuli, akhuwulila. 15Ne ni khumanya khuri Wele akhuwulila ifwe mu buli shoosi sheesi khuloomba, khumanya khuri khwafunile byeesi khumuloombele.

16Umuundu yeesi n'abona yaayawe nga akhola shishoonako shikhalimuyila mu khuhela ta, aakha amuloombele, ni Wele kane awe umuundu uyo bulamu. Shino shiwaamba khuubo bonyene babaakhola shishoonako shikhabayila mu khuhela ta. Iliwo shishoonako shishiyila umuundu mu khuhela. Isho sishili nisho sheesi inomakho ndi umuundu aloombe isi Wele ta. 17Buli shiindu shoosi shishiili she bubwoonaki shiba shishonako, ne iliwo shishonako shikhayila umuundu mu khuhela ta.

18Ifwe khwaamanya khuri umuundu yeesi uwasaalikha ni Wele, s'eloosela mu khwonaka ta, lwekhuuba Umwaana wa Wele amuliinda bulayi, ni Sitaani s'amukholakho bukosi ta. 19Ifwe khwaamanya khuri, khuli babaana ba Wele naluundi khuri, shiibala shoosi shili aasi e bunyala bwa Sitaani.

20Naluundi khwaamanya khuri, Umwaana wa Wele waamala khaale khukhwiitsa, waakhuwa ifwe khuumanya, nio nafwe khumanye uyo uuli uwa ŋali; niye Umwaana weewe Yesu Kristo. Uyo niye Wele uwa ŋali, luundi niye ali bulamu bukhawawo ta.

21Baana baase, ni mwiliinde mwabeene buulayi isi ba wele be bubeeyi.

Currently Selected:

1 Yokana 5: LPE

Highlight

Copy

Compare