Zakaria 9

1Naawen wanni a ta ka chaab ale Yadrak tɛŋka demma ate ku ale maa paari Damasikus mɛ dii nyiŋla nuruba ale Izirali buuni meena nina a doa ka Naawen zuk. 2Yamat tɛŋka mɛ ale nye bain ale ba mɛ la a gum du kama. Taaya ale Saidon ba ale ba tuimaŋa sebika mɛ ale maa gum du kama. 3Taaya demma a se ka parik kpieŋ a gilim ba tɛŋka ale ŋman tigsi kpana ase tana la ale nye ligmɔniŋ ase tanta ale bo suik po diila. 4Alege Nyɔnɔwa ale tuesi ba nitalimu abe wa kaasi wa pagrimu ale bo nyakpiemu nɔi la ate bolim ale dɛ wa a kaasi.

5Askelon ale nya ate yɔgsum a yik ba. Gaza ale nya ate ku ale te ba nyiŋdomma ate Ekron mɛ ale jɔk yiila. Gaza ale jɔk wa naawa, ate ba ale zɛri Askelon. 6Nicham ale kali Asdod ate mi ale gebi Filistia demma kanjantaŋa a basi. 7Mi ale pai ziim a nyini ba noaŋa po, ŋandiin tii ale ta kisuk la ba nyinaŋa po. Nuru baai ale za ba tali la za ba chim ka Wen nuruba. Ate ba ale chim Juda niŋdeerɔba, ate Ekron demma#9:7 Samuel 5:6-8 ale nye ase ka Jebus demma la. 8Alege mi ale maari m yenni demma mi ale nya ba zuk ate tugurik tɔŋdɔba a kan baga a jo ba po. Mi kan ŋman te ate waai a namsi m nuruma, dii nyiŋla mi a nya ba zuk kama.

9Dɛ masim nna yegayega Zayon Lie! Nuem ale masim Jerusalem Lie! Nya, fi naawa a cheena fi jigi, wa ta ka wayɔrisima ale varibasika, wa abe a nye ka nna ŋmam ale dɔ boniŋ kaai ale ka bonpaalik.#9:9 Matiu 21:5 10Mi ale tuesi wusum torokoma Ɛfraim jigi ale kpaliŋ wusumaŋa Jerusalem jigi, abe m wɛ kpaliŋka tommu. Wa ale mooli suiyɔgni a te tɛŋ kpieŋsaŋa. Wa naamu dɛka ale nyini nyakpiem a cheŋ nyakpiem, a ŋman nyini Benni a ga paari tɛŋzuk de kpeglimka. 11Alege nama, m nɔiyeŋka ziimu nyiŋ, m le yeeri ni ligrɔma vɔrup buui ate nyiam a ka bu po la a basi.

12Ni ŋman cheŋ ni yie pagrisaŋa. Nama ligrɔ baai ale ta yiila la. Yɔgyɔgla de m poom weeni kama ayen m le ŋman te ni ku naŋtuok nɔi buye a poom gaam dila. 13M le gbeeri Juda ase m le a gbeeri m tommu diila, abe m pai Ɛfraim a su bu po. Zayon m le pai fi nidoabilisaŋa a kpaliŋ ale Girik nidoabilisaŋa abe m nye ni ase kpaliŋ nyeerɔ gebik la.

14Naawen yaa ale jam ba jigi. Wa tommu penni ale cheŋ ase ka ŋmoruk nyaksika la. Nyɔnɔwa waai ale ka Naawen la peeri wa damuniŋka. Wa ale gɔk santiri kori vaataŋa po, 15ate Naawen Dii Ale A Dɛ Tugurik Tɔŋdɔma Niŋ La ale lik ba. Ba ale pai visiŋ tana a kaasi ba a nya nakdeka ba zuk. Ba ale kaari kpaliŋ po ase danyuirisa la, ate ba ale ko ba dachaasaŋa ate ba ziimu a sueri chin dii ate ba pai a misi kuŋkuŋku gugottaŋa la.

16Naawen ba Wen ale vari ba a basi da dila danni ase naapeerik ale vari wa piisa a basi diila. Ba ale nye ase ka tana naam zutɔk la ate ba zak a zaani ase daana tɛŋka zuk la. 17Ba nalimu nyiŋ nuruba ale yaali ayen ba a nya. Nidoabili paalisaŋa ale dɛ ŋanbie a nya pagrim ale nyiŋyɔgsa, ate nipokbili paalisaŋa ale nyu da paalib.

Currently Selected:

Zakaria 9: BWU

Highlight

Copy

Compare