Zakaria 8

1Naawen Dii Ale A Dɛ Tugurik Tɔŋdɔma Niŋ La wanni yaa ŋman pilim jam mi jigi. 2Ka Naawen Dii Ale A Dɛ Tugurik Tɔŋdɔma Niŋ La ale weeni diila ale nna, <<Mi a dɛ ka nyuri nna yegayega a te Zayon, nyuri nna yegayega ale kasim a dɛ mu ta va ba nyiŋ.>> 3Naawen ale weeni diila ale nna: <<Mi ale ŋman jam Zayon ate m boka jigini ale chim Jerusalem tɛŋka. Ate ba ale wi Jerusalem tɛŋka ayen Wensie Tɛŋ ate ba ale wi Naawen Dii Ale A Dɛ Tugurik Tɔŋdɔma Niŋ La guuku ayen tuilum guuku.>>

4Naawen Dii Ale A Dɛ Tugurik Tɔŋdɔma Niŋ La ale a weeni diila ale nna: <<Nidoa baai ale nipok baai ale kpaŋ paari la a za ba kali ka Jerusalem suitaŋa nɔi ate ba wanyi wanyi za wa ta ka dachek dii nyiŋla ba kpaŋ kama ate chelim a toa a te ba. 5Nidoabili paalisa ale nipokbili paalisa ale za ba bo tɛŋ kpieŋka suitaŋa niŋsa a diini ale chaab.>>

6Naawen Dii Ale A Dɛ Tugurik Tɔŋdɔma Niŋ La ale a weeni diila ale nna: <<Ku za ku chim ka wakinkagli a te tɛŋka demma baai ale za ba tali la po, alege ku ale chim wakinkagli a te mi?>> Naawen Dii Ale A Dɛ Tugurik Tɔŋdɔma Niŋ La ale weeni dila.

7Ka Naawen Dii Ale A Dɛ Tugurik Tɔŋdɔma Niŋ La ale a weeni diila ale nna: <<Mi ale vari m nuruma baai meena ale bo yontidi po tɛŋka kori ale yeniŋ la a basi. 8Mi ale ŋman ta ba jam Jerusalem ate ba ale kali dula. Ba ale chim m nuruba ate mi ale ta wensie ale wayɔrisima ale ba ase ba Wen la.>>

9Naawen Dii Ale A Dɛ Tugurik Tɔŋdɔma Niŋ La ale a weeni diila ale nna: <<Nama baai yaa le a wom wie ŋaai ate biisiteerɔma baai ale jam boro diipo ate ba jam dueni nyubini ayen ba sɛ Naawen Dii Ale A Dɛ Tugurik Tɔŋdɔma Niŋ La yenni la, ni te ate ni nisima a pagra ate ni baga a sɛ Wen yenni a tuk. 10Piilimka po tutuna a jam karo a te nuru yaase duŋŋa. Waai an jam baga a tom wa tuima ale nalim wa dachaasa nyiŋŋa, diila m basi kama ate nuru meena a ta chaab ale wa vaanchoa. 11Alege yɔgyɔgla de mi a kan ŋman nye m nuru baai ale tali tɛŋka po la ase m le jam a nye ale ba diila.>> Naawen Dii Ale A Dɛ Tugurik Tɔŋdɔma Niŋ La ale weeni diila ale la.

12<<Binni ale nyini a chim nalimnyiini, ate tiimu ale yɔni bu yɔnaŋa, ate tɛŋka ŋankpaantaŋa ale bɛ, ate wenŋmazukku maglimu a lo. Mi le pai ŋantaŋa de meena ale tali la a te nuruma de ale tali la. 13Nama Juda ale Izirali demma ale chim kikaasa tɛŋsaŋa po la, mi ale vari ni basi ate nama ale chim niauŋ nuruba. Ni be kan chali yɔgsummoa alege ni te ate ni nisima a pagra.>>

14Naawen Dii Ale A Dɛ Tugurik Tɔŋdɔma Niŋ La ale a weeni diila ale nna: <<Ase mi ale jam poli ayen m ta kaasuŋ a jam ni jigi ate m poom kan sak jiirim maga mɛ ale ni la diipo ate ni koma a jam nye ate m suinni a jam puuri ale ba la,>> Ka Naawen Dii Ale A Dɛ Tugurik Tɔŋdɔma Niŋ La ale weeni nna, 15<<Dila nyiŋ, yɔgyɔgla de m ŋman poli kama ayen m ŋman nye wamaŋsa a te Jerusalem ale Juda. Ni kan chali yɔgsummoa. 16Ni magsi kama ayen ni nye nna: Ni a biisi wensie ale chaab abe ni a bo wensie buusa ni buusa yieŋa po. 17Kan poli ayen fi nye fi vaanchoa biemmoa, kan yaali venta pɛka. Mi a kisi wieŋa de kama,>> Naawen ale weeni diila.

18Ate Naawen Dii Ale A Dɛ Tugurik Tɔŋdɔma Niŋ La wanni ŋman jam mi jigi, 19Ka Naawen Dii Ale A Dɛ Tugurik Tɔŋdɔma Niŋ La ale weeni diila ale nna. <<Chiisa sinaansiwa po ale sinuwa po ale siyopɔiwa po ale piika po ate ni nyiem a bobi nɔi la a za ku chim ka suipeentik tigi a te Juda. Dila nyiŋla ni be yaali wensie ale suiyɔgni.>>

20Ka Naawen Dii Ale A Dɛ Tugurik Tɔŋdɔma Niŋ La ale weeni diila ale nna, <<Nuru boari ale bo tɛŋ kpieŋsa po la ale za ba jam 21ate tɛŋka choa nuruba ale weeni tɛŋ yoŋ dem ayen, <Te ti cheŋ a ga puusi Naawen Dii Ale A Dɛ Tugurik Tɔŋdɔma Niŋ La abe ti ŋman gisi wa. Mi mɛ dek mɛ a cheŋ kama.> 22Ate nuru boari ale satɛŋ sii ale pagra la ale jam Jerusalem a gisi Naawen Dii Ale A Dɛ Tugurik Tɔŋdɔma Niŋ La abe ba ŋman puusi wa.>>

23Nya kude ate Naawen Dii Ale A Dɛ Tugurik Tɔŋdɔma Niŋ La a weeni ayen, <<Va ŋala po nidoaba pi a nyini biisa meena ale tɛŋ kpieŋsa po la, ale yik Juu denɔ garuk nɔi nna giŋgiŋ a weeni ayen, <Basi ate ti cheŋ ale fu, dii nyiŋla ti wom kama ayen Wen a bo ale fu kama.> >>

Currently Selected:

Zakaria 8: BWU

Highlight

Copy

Compare