Zakaria 12

1Naawen wari ale nna a ta va Izirali nyiŋ. Naawen dii ale nye wenzuk, ale ŋman dueni tɛŋzuk de nyubini la, ate ku nyini wadek po ate wa nye nurubiik chiik la, waai meena abe seba dila kama. Wa ale a weeni diila ale nna: 2<<Mi ale nye Jerusalem ase ka daam ale bo beerik po la: tɛŋ sii ale moata ka la a dan nyu, ba ale nyiem a ja kama ase danyuirisa la. Ba le gilim Juda ale Jerusalem a siti ba. 3Dai dila danni, tɛŋsaŋa meena ale ta ka chaab ale Jerusalem. Mi ale nye Jerusalem ase ka piuŋjaaliŋ kuui ale kaa choa la a te tɛŋsaŋa meena. Baai ale za ba voori ku la za ba kɔni ka badek. 4Dai dila danni mi ale nye kama ate wusuma kpaziita a nak ate baai ale ba dɔ ŋa la ale chim yesiŋsa.>> Ka Naawen ale weeni dila. <<Mi nina ale kasim a nya Juda demma zuk kama, alege mi ale nye ate tɛŋsaŋa meena wusumaŋa ninaŋa a yi. 5Kula nyiŋ Juda niŋdeerɔma ale weeni ba suiniima po ayen, <Jerusalem demma a ta pagrim la, dii nyiŋla Naawen Dii Ale A Dɛ Tugurik Tɔŋdɔma Niŋ La ale ka ba Wen la nyiŋ.>

6<<Dai dila danni mi ale nye Juda ase ka bolim ale bo daata po a dɛ diila, ate ba ŋman a nye ase bolim ŋiak ale chogsi ŋan kosa a dɛ diila. Bu za bu kasim a dɛ ka nuruma a gala ale a juga meena alege jaab a kan maa nye Jerusalem demma ale ba tɛŋka. 7<<Naawen ale dɛ ka niŋ a vari Juda demma a basi, ate Deevid ŋaaŋbisaŋa ale Jerusalem demma zula ŋaai ate ba za ba nya la a kan gaam Juda demma. 8Dai dila danni Naawen ale lik baai ale bo Jerusalem la kama, ate nuru baai ale wobsa a maa bo ba po la ale nya pagrim ase Deevid la, ate Deevid yenni ale dɛ ba niŋ ase Naawen Maarɔ la. 9Dai dila danni, mi ale kaasi tɛŋ kpieŋ sii meena ale ta chaab ale Jerusalem la kama.

10<<Ate mi ale pai chiik a basi Deevid yenni ale Jerusalem demma zuk, ka ale chim ka niauŋ ale puusa chiik. Ba ale nya mi, mi waai ate ba jam pai gbaluku a chub la,#12:10 Jɔɔn 20:37 ate ba ale kum ase waai ale a kum wa biik yeŋ nyiŋ diila, ate ba ale kum ka nna yegayega nna se waai ale a kum wa biik kpagi nyiŋ diila. 11Dai dila danni Jerusalem demma a za ba a kum ka nna yegayega. Kumsaŋa de za ŋa pagra kama ase Yadad Arimmon ale bo Megiddo peelimmu po la. 12Tɛŋka dɔkdemma wanyi wanyi ale ba pooba za ba kum kama: Deevid dɔkdemma ale ba pooba ale kum Natan dɔkdemma ale ba pooba mɛ ale kum. 13Livai dɔkdemma ale ba pooba ale kum, Simei dɔkdemma ale ba pooba ale kum, 14ale dɔkdemma baai meena ale tali la ale ba pooba meena ale kum.

Currently Selected:

Zakaria 12: BWU

Highlight

Copy

Compare