Aroom 2

1Dila nyiŋla, ni wanyi ka suik ate fi suok a dan nye wari a kaasi, fi bo wa buusa. Fi dan nye dila, fi ta ka kaasuŋ a jam fidek jigi dii nyiŋla, wie ŋaai ate fi ayen wa nye a kaasi la, fidek a tom ka ŋala dekdega. 2Tama abe seba kama ayen ku sum magsi ka Wen ta kaasuŋ a jam baai meena ale a tom dila la jigi. 3Alege fi dan bo baai ale a nye nyaŋa de la buusa alege fidek a tom ŋa, fi a poli ayen fi le baga chali be ate Wen kan nya fu a bo buusa? 4Yaa fi zɛri Wen nye maŋ kaai ale suiduŋ dii ale wa ale ŋman ta chichiiba ale fi diila kama, fi a poli ayen wa le kasim a nye ka dila a ta a cheŋ. Fi zɛ ayen Wen nye maŋka fi jigi a sak fu kama ayen fi basi fi tuimbaataŋa tomka? 5Ni tue kan wom. Ni sue be kan kaasi ale ni tuimbaataŋa. Ni a tom tuimbaata kama alege jaab kan daani ni, alege Wen suipuurumu ale wa wensie buusaŋa danni a dan paari ate wa ayen wa bo wensie buusa ale ni, wa sui le puuri ka nna yegayega ale ni ate wa te ni waalika. 6Da dila danni, Wen le tuni waai meena a magsi chaab ale ka ti wanyi wanyi ale tom diila. 7Baai meena ale ta chichiiba a tom tuimaŋsa a gisi zula ale nalim ale nyuvuri Wen jigi la, wa le te ba ka nyuvuri dii ale kan ta kpeglimka la. 8Alege baai ale a yaali badek nyaka mwuli ale a zɛri wensie suiku vaka ale kasim a tom tuimbaata daa meena la, Wen le basi ate wa suipuurumu a jam ba zuk. 9Ninam ale kumsa nna yegayega le jam baai meena ale a tom tuimbaata la jigi. Juuma le ba liŋ nya ninammu de ale kumsaŋa de ale ge ate baai mɛ ale kan daa Juuba la a nya ninammu de ale kumsaŋa de dila dekdega. 10Baai meena ale a tom tuimaŋsa la le nya zula ale nalim a boro ale suiyɔgni. Baai ale ka Juuba la le ba liŋ nya zulaŋa de ale nalimu de ale suiyɔgni de ale ge ate baai mɛ ale kan daa Juuba la, mɛ a nya. 11Boan nyiŋŋa, Wen ta ka nyeyeŋ Juuma ale baai mɛ ale kan daa Juuba la jigi.

12Baai ale kan daa Juuba la, a jam ka Moosis Sinsaŋŋa#2:12 Wen jam pai wa Sinsaŋŋa a te ka Moosis ayen wa pa te Izirali demma. Sinsaŋŋa de a bo ka Nyinika ale Kaabka ale Chiinika ale Teerika gbaŋsaŋa po. ate ba jam a tom tuimbaata. Ba an jam ta Moosis Sinsaŋŋa. Ba be le kpi kama alege Wen a kan pai wa Sinsaŋŋa a bo ba buusa. Alege Juuma a jam ta Moosis Sinsaŋŋa alege ba jam a tom ka tuimbaata. Ba mɛ be le kpi kama ate Wen pai wa Sinsaŋŋa a bo ba buusa. 13Nuruba dan wom ka wa Sinsaŋŋa nyiini ale kan va ŋa, ba kaasuŋku a diem bo ale ba kama, alege baai ale wom ŋa a yaa va ŋa la, wa kan ŋman nya ba kaasuŋku. 14Baai ale kan daa Juuba la, bala an nya Moosis Sinsaŋŋa alege ba suiniimaŋa a dan basi ate ba a tom Sinsaŋŋa ale a weeni dii ayen ba va la, badek suiniima ale a te ba Sinsaŋŋa. 15Ba nyeka a sak kama ayen Wen ŋmarisi wa Sinsaŋŋa a nyo ka ba suiniima po. Ba popolaŋa mɛ ale a bo ba buusa a weeni a sak ba ase ba kaasi yaa ba an kaasiya. 16Da dii danni ate Wen le bo ba buusa la, le nye ka dila. Wa le pai nuru meena wasusuŋŋa a ta ŋa nyini peelim niŋ ate Yeezu Kirisita bo ba buusa. Wen wamaŋsaŋa ate mi a sak nuruba ale a sak ti diila ale la.

17Nama baai ate mi a biisi ale ni la, a wi nidek ayen ka Juuba. Ni kasim a poli kama a weeni nidek ayen, <<Tama ta Moosis Sinsaŋŋa kama. Dila nyiŋla, Wen a vari ti a basi kama.>> Ni a nak ka kuusa ale ni ale ka dii ale Wen la. 18Nama dek abe seba Wen ale a yaali ayen ni a tom tuimaŋsa diila kama, dii nyiŋla ni zamsi Sinsaŋŋa po ayen fi lueri dii ale nala la a tom. 19Fi seba chak ayen, fi baga a chim nuru waai ale cheŋ be Wen suiku po la kpagi kama. Fi a nye ase ka bolim la a te baai ale bo legini po la. 20Fi a weeni ayen fi baga nuru baai ale ka betta ale bi paaluk la a sak kama. Fi be seba fi popo a chak ayen, fi ale ta Wen Sinsaŋŋa la, fi ta yam meena ale wensie meena kama. 21Nyaŋa de meena abe dan ka wensie ale fi waai ale a sak nuruba la, ka boa ate fi kan sak fi dega? Ti a sak nuruba a weeni ayen, <<Kan zu>>, alege fidek a zu? 22Fi a sak nuruba a weeni ayen, <<Kan nye kaboŋsa.>> Alege mi le bek fu ayen fidek a nye yaa fi kan nye? Fi kisi bɔgta kama alege mi ale bek fu ayen, <<Fidek a zu ŋanta a ta nyini weleŋsa jigi a nyini yaa fi kan zu a ta a nyini? 23Fi ta zupagruk kama ale Wen Sinsaŋŋa, alege a kaasi ŋa. Kaasika de a basi ate Wen a nya chivie yaa wa kan nya?>> 24Ba be ŋmarisi Wen gbaŋka po kama ayen, << Baai ale kan daa Juuba la, a kaasi Wen yuei kama nama Juuma nyiŋ.>>#2:24 Azaya 52:5

25Nama Juuma dan gebi ni yoaŋa ale a va Moosis Sinsaŋŋa,#2:25 Piilimka 17:10-14 ni yoaŋa gebika ta kiri kama. Alege ni dan a kaasi wa Sinsaŋŋa ni a nye ase ni an gebi ni yoaŋa kama la. 26Nuruba abe dan kan gebi ba yoa ale ge a va dii ate Moosis Sinsaŋŋa a weeni ayen nuruba a nye la, Wen le nya ba ase ba gebi ba yoaŋa kama la. 27Nama ta Moosis Sinsaŋŋa kama ate ŋa ŋmarisi dua. Ni be a gebi ni yoaŋa mɛ kama. Alege Sinsaŋŋa ate ni ta la ale ni ale a gebi ni yoaŋa la, ni kan diem a va Moosis Sinsaŋŋa ale a weeni diila. Alege baai ale kan gebi ba yoaŋa la, bala gela a va Moosis Sinsaŋŋa ale a weeni diila kama alege ba ka ŋa. Ba be ale a nye nna la a basi kama ate ba biisi a gaam nama Juuma. 28Basi ate m bek ni beŋŋa de ayen, ka wana dek ale potim ka Juu? Ka waai ale gebi wa yoari la ale Juu? Nuru peelim nyeka nyiini a kan sak kama ayen nuru wala a sum ale Juu. Ku be daa fi nin gebi fi yoari ale a sak ayen fi sum ka Juu. 29Alege waai ale sum ka Juu la ale waai ale va Sinsaŋŋa a ta nyini wa suinum po la. Ku kiri mɛ ale fi an gebi ka fi yoanni nyiini ayen ku sak ayen fi sum ka Juu alege ku kiri ale, fi pai ka fi suinummu a te Wen. Gebika abe ka gebi kaai ate Wen Chiika a gebi fi suinummu la, daa fi nyiŋka wari ya. Nuruwa de choa abe kan nya pimpauk nuruba jigi, alege ka Wen pimpauk nyiini ate wa a nya.

Currently Selected:

Aroom 2: BWU

Highlight

Copy