Yiila 145

145

1M Wenni yaa, waai ale ka naab la, m le zak fu a zaani. M le pak fi yuenni taam wuu. 2Daa meena mi le pak fu abe m zak fu yuenni a zaani taam wuu.

3Naawen a zuak ka yega, ale magsi pimpauk, wa le zuak diila nuru an baga a miŋi. 4Gaŋ kanyi ale pak fi tuima a te ka choa, ba le weeni fi tuim kpiema a sak. 5Ba le weeni fi naamu zulaŋa ale nalimu mɛ, be poli fi wakinkagla tuimaŋa zuk. 6Ba le biisi fi tuim kpiema wari ate m mooli fi tuim kpiemaŋa a te. 7Ba le dɛ fi wamaŋsaŋa yegayega tigi, abe ba yi fi wayɔrisimaŋa yiila ale suipeentik.

8Naawen ka niarɔ ale ta jiirim, wa sui kan kpabi a puuri ale jigsi ale ŋmanteka. 9Naawen a nala kama a te waai meena, wa ta jiirim kama ale waai meena ate wa nye la. 10Naawen yaa, baai meena ate fi nye la ale pak fu, fi bisaŋa ale zak fi yuenni a zaani. 11Ba le weeni fi naamu zulaŋa abe ba biisi fi pagrimu wie, 12ate waai meena a seba fi pagrim tuimaŋa ale fi naamu zulaŋa nalimu. 13Fi naamu ka naam buui ale boro wuu, fi pagrimu abe boro ka dila a cheŋ gaŋsa meena po. Naawen a ta wensie kama ale wa pumpuulimaŋa meena, ale a yaali baai meena ate wa nye la. 14Naawen a yik baai meena ale a lo la kama ale a zak baai meena ale koori tɛŋ la a zaani. 15Waai meena nina a nya ka fi jigi, ate fi a te ba ŋandiinta diipo ale magsi la. 16Fi lak fi nisa kama a basi ate javuk meena a chak.

17Naawen ka wayɔrisima nyɔnɔ suita meena po ale a yaali baai meena ate wa nye la. 18Naawen a moata baai meena ale a wi wa la kama, baai meena ale a wi wa ale wensie la. 19Baai meena ale a chali wa la, wa a nye ba le a yaali diila kama, wa a wom ba kumsa kama ale a vari ba a basi. 20Naawen a limisi baai meena ale a yaali wa la kama, alege wabaata nyama wa le kaasi ba meena.

21Mi nɔnni ale biisi a pak Naawen. Basi ate jaab meena Naawen nye la a pak wa tuilum yuenni taam wuu.

Currently Selected:

Yiila 145: BWU

Highlight

Compare

Copy