Wamagsima 9

1Yam a sɛ bu yenni. Bu ti bu zaŋŋa ŋayopɔiwa a zaani. 2Bu nye ka ŋandiinta tigi kpienni, a dam daata a magsi nyuka ale zaani ŋandiinta a magsi dɛka. 3Bu tom ka bu tomteerɔma ayen ba ga wi waai meena ate wa jam. Bu zaani ka tɛŋka ŋmazuimaŋa a wi ba. 4<<Waai ale jɔk po yiila la, basi ate wa viriŋ a jo dela!>> waai ale a yaali popola la wa weeni ayen. 5<<Jam a dɛ m ŋandiintaŋa, abe ni nyu daamu ate m dam la. 6Basi fi jɔk po yiila nyeelaŋa abe fi piilim boka, a nye dii ale di basi ate fi miŋ wie la.>>

7Fi dan sak waai ale koosi a la nuruba la fi a nya ka leeta, fi be dan toariŋ gaasa nyɔnɔ wa ale lɛ fu. 8Kaa toariŋ waai ale koosi a la nuruba la, wa le nye ate fi sui puuri. Toariŋ nuru waai ale ta yam la ate wa le yaali fu. 9Sak yam nyam, ate ba ta yam a gum ba yammu po. Te wayɔrisima nyama sinsaga ate ba zamsi a ŋman gum du.

10Dii nyiŋla, ka Naawen yɔgsum chalika ale yam nyubini. Fi dan seba waai ale welema la a ta ka buusa maŋsa a jam. 11Yam ale nye ate fi daaŋa a piisi, abe fi nya bena a gum fi nyuvunni po. 12Fi miŋ yam, ku a maari ka fidek. Fi koosi yam a la, ka fidek ale za fi jam a nam.

13Nipok beruk a ta ka nuemka. Wa zɛ jaaboa alege wa zɛ ayen wa zɛ. 14Wa kali ka wa tuoku nɔi nna wen wen ya a nya tɛŋ kpieŋka. 15Wa wi ka nuru baai ale va suik a taam, ate ba nina a muni ale ba tuima. 16<<Jam jo bo ale mu,>> Wa a weeni ka baai ale jɔk poi yiila la ale baai ale a silim wensie buusa boka la, wa a weeni ayen, 17<<Zum nyiam a yɔk ka zuzuk ate ŋandiinta zu dɛka a nala.>> 18Baai ale a siak wa wiika la a zɛ ayen wa ta ka kpilima ŋandiinta a bo wa yenni po. Waai ale ga a jo wa yenni po la a bo ka kpiluŋ.

Currently Selected:

Wamagsima 9: BWU

Highlight

Compare

Copy