Wamagsima 8

1Yam abe le a wi la, be wom. Miŋ chakka abe le a lak ka lueluku la be wom. 2Guuku ale bo suiku jigini la, ate wa wari za suik magsaŋa po la. 3Tɛŋka nansuiŋku tuataŋa, suik kuui ale a jo la ate wa za a kaari ayen, 4<<Mi wi ni meena kama. M lak m lueluku a wi ka waai meena. 5A jɔk po yiila nyama a zamsi yam. Betta mɛ a zamsi popola.

6<<Ni wom mi dii nyiŋla m ta ka tuilum wie ayen m weeni sak ni. M le a weeni dii meena la ka wensie, 7mi ale biisi ka wensie. M nɔngbanni a kisi gaasa wie kama. 8M wieŋa ka wensie. Wari a ka di po a labri yaase a galiŋŋi. 9Mi wieŋa a nye ka jassi a te waai ale a miŋ wie kiri la, ŋa be lagri a doa a te baai ale ta wie miŋka yam la kama. 10Lueri m sinsaŋŋa abe fi basi kpana. Lueri wie miŋka abe fi ge basi ligmɔniŋ. 11Dii nyiŋla yam a ta dobrim a gaam tintain munta kama. Fi ale a yaali jabuui la an baga a magsi chaab ale bu.

12<<Mi yuei ale Yam, m be a bo ale ka baai popola ale a tom tuima la. M seba m le a cheŋ juijui a nya wie maŋsa la kama. 13Naawen yɔgsum chalika ale fi kisi biem. Mi a kisi kanjanta ale kayerinni ale biem suik ale bi kaasuŋ kama. 14Wie kiri kpabi miŋka ale nye niaka ka mi ale soa. Popo wie miŋka ale pagrim ka mi ale soa. 15Ka mi nyiŋ ale soa ate nalima a de ba naam. Ate niŋdeerɔba ale a weeni diila a chim wensie. 16Ka mi ale a maari niŋdeerɔba ate ba a tom ba tuima, ate nuru kpienta a bo wayɔrisima buusa. 17<<Baai meena ale a yaali mi la mi mɛ a yaali ba kama. Baai ale a gisi mi la ale sum a nya mu. 18Yam a ta jigsuŋ ale zula kama ale ŋman ta paaruŋ ale wensie. 19M tiiritaŋa a gaam ligmɔniŋ kama, kaai ale nyini bolim po la. M tutunaŋa a gaam kpana. 20Mi a cheŋ ka wayɔrisima po, a ta bo wensie suita po. 21Baai ale a yaali mi la ale nya paaruŋ. M le te ate ba nya ŋanta.

22Naawen a soa mu a nyini ka wa tuimaŋa piilimka po, wa le piilim nye dii dipodipo la. 23Bena ŋaai ale taam la ate ba wi mi, a nyini piilimka po, alege ate tɛŋka a piilim nyeka. 24Ba de ka niŋ a biak mi alege yaa nye nya kpientaŋa alege ate bulisaŋa nyaata a tɔŋ a yiti. 25Ba de ka niŋ a biak mi alege yaa nye gu kpienta ale gu fiisaŋa 26mi ale jam paari a boro la ale wa an diem a nye tɛŋzuk de ate ŋandiinta laŋsa mɛ a karo. 27Mi boro kama alege ate wa nye wenŋmazuk ale nye dindaanuŋ a gilim nyakpiemu. 28Mi boro kama alege ate wa nye chiŋmaaŋa wenzukku po ale nye nya tii ale bo tɛŋka a buli a nyini tɛŋka la. 29Mi boro kama ate wa nye ate nya kpientaŋa kpeglimka jigini, ayen ŋa kan wusi a gaam ŋa banaŋa. Ale boro ate wa nye tɛŋ zuk de nyubaŋa dindaanuŋtaŋa. 30Mi bo ale wa kama ase bi fiik la, wa jam a nya masim a nyini ka mi jigi daa meena, a kasim ta suipeentik a bo wa jigi. 31Ate yɔgyɔgla de m sui a peenti ale tɛŋka ate wa nye la. Nya mi ale a de masim ale nurubisaŋa dii ya!

32Ate dila nyiŋ, m bisaa, ni wom mu, dii nyiŋla baai meena ale a va mi suitaŋa la a ta suipeentik kama. 33Wom m wieŋa ate fi ta yam. Kan zɛri ŋa. 34Suipeentik a bo ka baai ale a wom mi la, baai ale kasim bo m tuoku nɔi ale baai ale kasim za m yenni peelimmu po a limisi mu la. 35Waai ale a nya yam la, a ta ka nyuvuri ate Naawen nisima a bo wa zuk. 36Baai ale kan ta mi la, a ta ka daanika a jam badek zuk. Baai meena ale kisi mi la a yaali ka kum.

Currently Selected:

Wamagsima 8: BWU

Highlight

Compare

Copy