Chiinika 19
19
1Naawen a weeni Moosis ale Aaron ayen, 2<<Kude ale magsi ni nye a ta va ŋmarisika sinsaŋŋa ate Naawen a weeni la, weeni Izirali demma ate ba ta naasari mɔnuŋ dii ale kan ta jomi yaase wari ate niiga diok an vi di ŋiri nya la a jam. 3Pa di a te kaabteerɔwa Eleaza, ni ta di a nyini ni boka jigini a nyini peelim a tɔgri di wa niŋ. 4Eleaza yaa tiak ziimu gela ale nandub a misi buyopɔi a tuk Tuka Viuku nansuiŋku nɔi geŋsa. 5Ase wa le kpesi a nya la, ba yaa ju naasanni gbanni ale di lammu ale di ziimu ale di poni po ŋantaŋa. 6Kaabteerɔwa a yaa pai nyunyoŋ diok ale kpaliok ale kɔb mɔnta a yuk ba vi naasanni ate ba ju la zuk. 7Kula ŋaaŋnyiŋ kaabteerɔwa a yaa sugri wa gattaŋa abe wa so wa nyiŋka ale nyiam. Wa yaa baga jam ba boka jigini kama, alege wa daŋ kama a ga paari wen siŋka. 8Nuru waai ale ju la ku a fɛ ate wa mɛ sugri wa gattaŋa abe wa so wa nyiŋka ale nyiam, wa mɛ a daŋ kama a ga paari wen siŋka.
9<<Nuru waai ale nala la yaa tigsi naasanni ate ba ju la buntuemmu a ta nyini ba boka jigini a dueni peelim kauk kuui ale nala la. Izirali naakuuni a dueni bu a magsi nya buui ale basi ate ba a nye cheri la tuima, dila ale ku basi ate ni nye cheri a nyini biem po. 10Nuru waai ale tigsi naasanni ate ba ju la buntuemmu la, ku a fɛ ate wa mɛ a sugri wa gattaŋa, wa mɛ a daŋ kama a ga paari wen siŋka. Kude ale chim ka ŋmarisi kaai ale ka beni a te Izirali demma ale nichamma ale bo ale ni la.
11<<Waai meena ale a tiri kpio la ale daŋka wadek a ta ga a paari daa ŋayopɔi. 12Ku a fɛ ate wa so wadek ale nyiamu daa ŋatawa danni ale daa ŋayopɔiwa danni, ate wa yaa nye cheri. Alege wa dan kan so wadek daa ŋatawa danni ale daa ŋayopɔiwa danni, wa kan nye cheri. 13Waai a dan tiri kpio ale zɛri an so wadega wa taŋ Naawen viuku kama. Nuru wala ba yeeri wa a ta nyini Izirali demma po a nyini. Dii nyiŋla ba an misi nya buui ale basi ate wa a nye cheri la a basi wa nyiŋŋa, wa daŋ kama, wa daŋka a va wadek.
14<<Sinsaga ale nna magsi chaab ale nuru kum viuk po. Nuru waai a dan jo viuku de po yaase waai a bo ku po wa daŋ ka wadek a ga a paari daa ŋayopɔi. 15Jaab meena ale bo ku po ate nanlik an lik wa nɔi la a daŋ kama.
16<<Nuru waai ale bo peelim la a dan tiri nuru waai ate ba ko ale gebik yaase waai ale kpi wen kum, yaase wa tiri nurubiik kobi yaa boosuk la a daŋ kama a ga paari daa ŋayopɔi.
17<<Ate nuru waai ale daŋ la a nye cheri la, nye buntuem a ta nyini cheri juka tiirimu jigini a nyo leŋ po a kpeeri nyanaliŋ a vi bu zuk. 18Nuru waai ale nala la ale wa pai kpaliok a lusi nyiamu po a misi viuku ale ŋantaŋa meena ale nuruma ale bo dula la. Ku a fɛ ate wa maa misi nuru waai ale tiri nurubiik kobi yaase boosuk yaase waai ate ba ko yaa wa kpi wen kum la mɛ. 19Nuru waai ale nala la ale wa misi waai ale daŋ la daa ŋata dai abe wa ŋman misi wa daa ŋayopɔiwa danni, daa ŋayopɔiwa danni wa yaa le nye cheri a nyini daŋta po. Nuru waai yaa le wa nye cheri la, ku a fɛ ate wa sugri wa gattaŋa abe wa so ale nyiam, junɔi dila wa le nala. 20Alege nuru waai ale daŋ la a dan zɛri an nye wadek cheri, ku a fɛ ate ni yeeri wa a ta nyini naakuuni po a nyini, dii nyiŋla wa taŋ Naawen yenni kama. Nya buui ale bu basi ate wa nye cheri la ba an pai bu misi wa, wa daŋ kama. 21Kude ka ŋmarisi kaai ale ka beni a te ba. Nuru waai ale a misi nya buui ale basi ate nuru a nye cheri la, ku a fɛ ate wa mɛ sugri wa gattaŋa. Nuru waai ale a tiri nya buui ale basi ate nuru nye cheri la ale daŋ kama a ga paari wen siŋka. 22Jaabuui meena ate nuru waai ale daŋ la a tiri la mɛ a daŋ kama, nuru waai ale a tiri wa la mɛ a daŋ ka wadek a ga a paari wen siŋka.>>
Currently Selected:
Chiinika 19: BWU
Highlight
Copy
Compare
Share
Want to have your highlights saved across all your devices? Sign up or sign in
© 2023, Ghana Institute of Linguistics, Literacy and Bible Translation
