Chiinika 18

1Naawen a weeni Aaron ayen, <<Fi ale fi nidoabilisaŋa ale fi Kowa dɔkku ale ni a nya Naawen yenni tuimaŋa zuk, a ni ba nin nye a kaasi di, ka fi ale fi nidoabilisaŋa nyiini ale ni a nya ase ba nin nye wari a kaasi kaabteerɔma. 2Ta fi Livai chaama a bo ni ŋiaka buuni po la ate ba gum fi po a maari fi ase fi ale fi nidoabilisaŋa a nin boro a yaa ni tom tuima nɔiyeŋka dakanni niŋ viuku po. 3Fi ale fi a nya ba zuk ate ba a tom tuka Viuku po tuimaŋa meena, alege ku a fɛ ate ba kan cheŋ moata ŋan baai ate ba ta tom Wen yenni po la yaase kuŋkuŋku. Ba dan nye dila, ba le fi meena ale kpi. 4Ba ale gum fi po a nya Tuka Viuku po tuimaŋa meena, waai a kan cheŋ moata fi ale bo juijui la.

5<<Fi ale magsi fi a nya Wen yenni tuimaŋa ale juka kuŋkuŋku tuimaŋa zuk ate suipuurum a kan ŋman jam Izirali demma jigi ya. 6Mi dek ale lueri fidek Livai chaama a ta nyini Izirali demma po ase tiirim la a te fu, baai ale pai badek a te Naawen ayen ba tom tuima tuka viuku po. 7Alege ka fi ale fi nidoabilisaŋa nyiini ale magsi ni a tom ase kaabteerɔba la a magsi chaab ale wa dii meena ale nye juka kuŋkuŋku zuk ate garuk panni a kasi la po. Mi ale a te fu kaabteerɔ tuini ase tiirim la. Nuru waai meena ale cheŋ a moata Naawen yenni la ku a fɛ ate ni ko wa.>>

8Naawen yaa weeni Aaron ayen, <<Mi dek ale te fu suik ayen fi a nya m tiiritaŋa zuk poom daa Izirali nidoabilisaŋa tuilum tiiritaŋa ate mi a te ni la m pai te fi ale fi nidoabilisaŋa ase ka ni dɛka jigi la ase ku ale poom ka ni charuk la. 9Nama ale ni soa tiiritaŋa kab tii ale ŋmasi ta tuilum la, tii ale kan nyo bolim po la. A nyini tiiritaŋa meena ate ba ta jam te mi ase tiirim tii ale ŋmasi ta tuilum la, ka ŋandiinta tiirim yaase biem tiirim yaase nyemagsika tiirim, kauk kula ka fi ale fi nidoabilisaŋa ale soa. 10Ni dɛ ti ase ŋan baai ale ŋmasi ta tuilum la, nidoa meena a dɛ ti. Ku a fɛ ate ni a nya ti ase tuilum ŋanta la.

11<<Ba dɛ mɛ ka fi ale soa, jabuui ate ba gaari a ta nyini tiirim tii meena ate ba zak sak a nyini Izirali demma jigi la. Mi a pai a te ka fi ale fi nidoabilisaŋa ale fi liema ase ni charuku ale poom ka diila. Waai meena ale bo fi yenni po a nala la a baga a dɛ ti kama.

12<<M te fu kpa naliŋka meena ale da paalik naliŋka meena ale ŋandiintaŋa ate ba te Naawen ase yɔna ŋaai ate ba dɛ niŋ a nya a nyini ba kpari ŋantaŋa po la. 13Tɛŋka meena yɔnaŋa ale dɛ niŋ bɛ la ate ba ta jam te Naawen la ka fi ale soa. Waai meena ale bo fi yenni po, a nala la a baga a dɛ ti kama.

14<<Jaabuui meena ale bo Izirali Tɛŋka po ate ba gaari wa a te Naawen la ka fi ale soa. 15Ba ni dɛ niŋ biak jabuui la, nuru yaase duŋ ate ba te Naawen la ka fi ale soa. Alege ku a fɛ ate fi da tuesi nidoabili sii meena ate ba dɛ niŋ a biak la ale duŋ kaai ale daŋ a dɛ niŋ a biak ja diok kuui la. 16Ase ba dan ta chiik yeŋ dekki, ku a fɛ ate ni tuni ka daka ligraŋa ale ka diila ase kpana ligbie dobrim bunu (5) la a magsi chaab ale Wen yenni magsika ale ka diila, kuui dobrim ale paari pisiye la.

17<<Alege ku a fɛ ate ni kan da tuesi naab yaase posuk yaase buuk ale dɛ niŋ a biak jabuui la, si ta tuilum kama ni misi si ziimu kuŋkuŋku zuk abe fi ju si kpaamu ase tiirim ate ba ju ale bolim la, ka nyum buui ale masa a te Naawen. 18Si lantaŋa ka nama ale soa ase kuusini ate ba zak a sak ase tiirim la ale kɔsukku ka fi ale soa. 19Jaabuui meena ate ba gaari a ta nyini tuilum tiiritaŋa ate Izirali demma a te Naawen la, m pai ba a te fi ale fi nidoabilisaŋa ale fi liema ase ni charuku ale ka diila. Ku ka nɔiyeŋ kaai ale a ben Naawen jigi nna ase yesa la a te fi ale fi ŋaaŋbisaŋa.>>

20Naawen yaa weeni Aaron ayen, <<Fi a kan nya nitalim ba tɛŋka po yaase fi nya charuk ba po, Mi ale fi nitalimu ale fi charuk Izirali demma po.

21<<Mi te Livaima piika meena Izirali tɛŋka po ase ba nitalim tuim ŋaai ate ba tom la nyiŋ diipo ate ba diem a tom Tuka Viuku po la. 22A nyini yɔgyɔgla de a cheŋ ku a fɛ ate Izirali demma waai a kan cheŋ moata Tuka Viuku, ba dan nye dila, ba le nya ba biemu ninam abe ba kpi. 23Ka Livaima ale magsi ba a tom tuimaŋa Tuka Viuku po, abe ba nya ku tutuna ase waai a nin nye kaasi ku. Ku ka ŋmarisi kaai ale ka beni a te gaŋ sii ale cheen la. Ba kan nya nitalim a ta nyini Izirali demma po. 24Mi te Livaima ka piika ate Izirali demma a te Naawen ase tiirim la ase ba nitalim la. Dila nyiŋ ate mi weeni ba ayen, <Ba kan nya nitalim a nyini Izirali demma po la.> >>

25Naawen yaa weeni Moosis ayen, 26<<Biisi a te Livaima a weeni ba ayen, <Ni dan tuesi piika a nyini Izirali demma jigi ate mi te ni ase ni nitalim la, ku a fɛ ate nama mɛ a tuni piik nitalim bula po a te Naawen ase tiirim la. 27Ni tiirimu ale nye ase ka ŋandiinta tiirim la a nyini ŋandiinta fɔbika jigi yaase da masik la a nyini daam ŋmiaka jigi. 28Suik kula po nama mɛ ale ta tiirim tii ate ni tuesi a ta nyini Izirali demma jigi ase piik la a jam Naawen niŋ. A nyini piika dɛ po, ku a fɛ ate ni pai Naawen dɛka jigini a te kaabteerɔwa Aaron. 29Ku a fɛ ate ni te Naawen wa dɛka jigini kauk kuui ale nala ale welema la a nyini jabuui meena po ate ba te ni la.>

30<<Weeni Livaima ayen, <Ase ni dan te kauk kuui ale nala la meena, ku le nye ni jigi ase ka ŋan baai ate ni ta nyini ŋandiinta fɔbika jigi yaase daam ŋmiaka jigi la. 31Nama ale ni yeeŋa demma a baga a dɛ tila meena kama kauk kuui meena, ku ka ni tutuna a magsi ni tuimaŋa Tuka Viuku po. 32Ase ni dan pai kauk kuui ale nala la a te ni an nye kaasi wanni de po, ate dila ale basi ate ni kan taŋ Izirali demma tuilum tiiritaŋa ate ni kan kpi.> >>

Currently Selected:

Chiinika 18: BWU

Highlight

Copy

Compare