Chiinika 16
16
1Livai nidoabili jam le Koyat, Koyat nidoabili jam le Izyar, Izyar nidoabili jam le Koora, ale Aruben dɔkku dem gela, Eliab nidoabilisaŋa Datan ale Abiram, ale Pelet nidoabinni On a jam ka zula, 2a yaa yiti ta chaab ale Moosis. Izirali nuruba kobsiye ale pisinu baai ale ka naakuuni niŋdeerɔba ate ba seba a paari la ale jam maa boro, baai ate ba lueri ayen ba dɛ ba niŋ la. 3Ba yaa jam ase tigsuŋ la a yaa zɛri Moosis ale Aaron nɔi ale weeni ba ayen, <<Nama nye cheŋ ka niŋ, naakuuni meena a welema kama waai meena ate Naawen a bo le ba. Ka boa ate nama a zak nidek ŋmai gaam Naawen tigsuŋku?>>
4Ase Moosis ale ga wom di dɛ la, wa yaa lo pai nina a vuk tɛŋ. 5Wa yaa weeni Koora ale wa ŋaaŋviirɔma meena ayen, <<Saluik Naawen ale sak waai ate wa soa la ale waai ale welema la, abe wa basi ate nuru wala a jam moata wa. Nuru waai ate wa lueri la wa le basi ate wa moata wa. 6Fi Koora ale fi ŋaaŋviirɔma meena ku a magsi ni nye ka nna, pai ŋan baai ate ba pai a ju ŋan baai nyum ale masa la, 7ate chum fi pai bolim ale ŋan baai nyum ale masa la a nyo ba po a te Naawen. Nuru waai ate Naawen a lueri la ale chim waai ale welema la. Nama Livaima a nye cheŋ ka niŋ.>>
8Moosis a ŋman weeni Koora ayen, <<Yɔgyɔgla de ni wom nama Livaima. 9Ku an diem magsi a te nama, ase Izirali Wenni ale gaari nama a ta nyini Izirali naakuuni meena po a ta ni jam moata wadek ayen ni tom Naawen tuimaŋa wa viuku po, abe ni zaani naakuuni niŋ a sak ba ya? 10Wa ta ni ale ni Livai mbala meena a jam moata ka wadek, alege yɔgyɔgla de nama a yaali ni tuesi kaabka kpaŋtaŋa kama. 11Ku kan va Naawen yaalika ase fi ale fi ŋaaŋviirɔma meena ale jam jigi yeŋ la. Ka wana ale Aaron ate nama a ŋma wa?>>
12Moosis yaa tigsi Eliab nidoabilisaŋa, Datan ale Abiram alege ba weeni ayen, <<Ti kan jamu. 13Fi an ta ti a nyini tɛŋ kaai ate biisim ale siita a bo ka po la ayen fi ko ti kama gɔnni po la? Ate yɔgyɔgla de fi a yaali ayen fi chim naab tama zuwa? 14Fi an ta ti jam tɛŋ kaai ate biisim ale siita a bo ka po la yaase fi te ti tata yaase kaduksa. Fi ale baga yeeri nuruma de nina? Aaya, ti kan jamu.>>
15Moosis sui yaa ŋmasi puuri ate wa weeni Naawen ayen, <<Fi kan tuesi ba tiirimu. Mi an tuesi boniŋ ba jigi ya, yaa m nye ba kaasi ya.>>
16Moosis yaa weeni Koora ayen, <<Fi ale fi ŋaaŋviirɔma meena ale jam Naawen niŋ chum, fi ale ba ale Aaron. 17Nuru yeŋ a pai jabuui ate ba ta a ju ŋan baai nyum ale masa la a nyoro. Ŋantaŋa ate ba le pai ju bolimu la a paari ka kobsiye ale pisinu ate ba pai te Naawen. Nama ale Aaron mɛ a te.>> 18Dila nyiŋla nuru meena yaa pai wa jaamu ate wa ju bolim wa po la a nyo bolim ale ŋan baai nyum ale masa la du a yaa za ale Moosis ale Aaron Tuka Viuku nansuiŋku nɔi. 19Ase Koora ale jam tigsi wa ŋaaŋviirɔma meena ayen ba kan siak te ba Tuka Viuku nansuiŋku nɔi la. Naawen zulaŋa a yaa jam tigsuŋku meena jigi. 20Naawen yaa weeni Moosis ale Aaron ayen, 21<<Ni gaari nidek a nyini tigsuŋku po ate mi ale basi ate ba kpi a kpeglim.>>
22Alege Moosis ale Aaron yaa lo pai nina a vuk tɛŋ a yaa kaari ayen, <<Wen yaa, nurubisa meena chiisa Wen, fi sui ale puuri ale tigsuŋku meena ale nuru yeŋ biem nyiŋŋa?>>
23Naawen yaa biisi te Moosis ayen, 24<<Weeni tigsuŋku ayen ba cheŋ nakpiak ba kan moata Koora ale Datan ale Abiram viitaŋa.>>
25Moosis yaa yiti cheŋ Datan ale Abiram jigi. Izirali nisɔmma a jam va wa cheŋ kama. 26Wa yaa kaam tigsuŋku ayen, <<Ni forisi ga ŋaaŋ abe le ge nuru baataŋa de viitaŋa. Ni kan tiri jabuui meena ate ba soa la, ni kan tiri ba ŋantaŋa, kan daa di wa ale ko ni ba wabaataŋa nyiŋ.>> 27Dila nyiŋ ba yaa forisi cheŋ ale basi Koora ale Datan ale Abiram viitaŋa. Datan ale Abiram a yaa nyini peelim a za ale ba pooma ale ba bisaŋa ale ŋan fiisaŋa ba viitaŋa nansuiŋtaŋa nɔi.
28Ate Moosis yaa weeni ayen, <<Kude ale ku basi ate ni seba ayen ka Naawen ale tom mu ayen m nye wieŋa de meena ku daa mi dek popola. 29Ase nuruma de a dan kpi waai meena ale a kpi diila, dan ka di Naawen an tom mi. 30Alege ase Naawen a dan ta wapaali jam ate tɛŋka a lagri a nɛ ba ale jabuui meena ate ba soa la, ate ba siŋ vɔrumu po vuta dila ale basi ate ni seba ayen Nuruma de an nye Naawen magsi ya.>>
31Wa le biisi wieŋa de meena a ga nueri la tɛŋka kauk kuui ate ba za la a yaa na lagri 32a nɛ ba ale ba yeeŋa demma ale Koora nuruma meena ale ba ŋantaŋa meena. 33Ba jam siŋ vɔrumu po ka vuta ale ŋantaŋa meena. Tɛŋka a jam lik ba a basi du kama ate ba kpi cheŋ alege naakuuni. 34Ba le kaari la Izirali demma meena ale za gilim ba la a yaa chali ga nakpiak ale na nna yegayega ayen, <<Tɛŋka a yaa ka nɛ tama kama.>>
35Ate bolim yaa jam nyini Naawen jigi a dɛ nuruba kobsiye ale pisinu baai ale jam boro a nye ŋan baai nyum ale masa tiirim la a ko.
36Naawen yaa weeni Moosis ayen, 37<<Weeni Aaron nidoabinni Eleaza, kaabteerɔwa ate wa yeeri ŋan baai ate ba ta a ju bolim wa po la a ta nyini bolimu po a nyini a kati bolim kaalaŋa a waaŋ, ŋantaŋa ate ba a ju bolim ba po la a ta tuilum kama. 38Nuru baai ale tom kaasi la ŋan baai ate baa ju bolim ba po la, ni jaŋsi ba a mati a pai ba pati lik juka kuŋkuŋku zuk diila ba jam pai ba ta ka Naawen niŋ ate ba ta tuilum. Basi ate ba chim daana a te Izirali demma.>>
39Kaabteerɔwa Eleaza a yaa tuesi kutuk mɔnuŋ ŋan baai ate ba cheem bolim ba po, ate baai ate bolimu a dɛ ba ko la a ta jam la, wa jam basi ate ba jaŋsi ba a mati kama a vi juka kuŋkuŋku zuk, 40ase Naawen ale sak wa a ta va Moosis zuk la. Kude yaa ku a teeri ka Izirali demma ayen waai an magsi ya, ka Aaron dɔkku po nyiini ale magsi ba ju ŋan baai nyum ale masa la Naawen niŋ, kan daa di wa le kpi ase Koora ale wa ŋaaŋviirɔma la.
41Dai dii ale pai saŋ la Izirali naakuuni meena yaa jaa ŋma Moosis ale Aaron ayen, <<Ni ko Naawen nuruma.>>
42Alege ase tigsuŋku ale tigsi chaab a ŋma Moosis ale Aaron ale tulim a tuk Tuka Viuku nyiŋla, ku an beni ya, chiŋmari yaa lik dula jigini ate Naawen zulaŋa a yaa jam dula. 43Moosis ale Aaron a yaa cheŋ Tuka Viuku nɔi, 44ate Naawen yaa weeni Moosis ayen, 45<<Nyini tigsuŋku po a ga nakpiak ate m basi ate ba kpeglim bunyi.>> Ate ba yaa jam lo pai nina a vuk tɛŋ.
46Moosis yaa weeni Aaron ayen, <<Pa fi jabuui ate fi ta a ju bolim la a nyo ŋan baai nyum ale masa la du, a moak bolim juka kuŋkuŋku zuk a nyoro a nye nwuli a ga tigsuŋku jigi a nye biem duisi basika a te ba. Suipuurum ale nyini Naawen jigi a jam, nyiŋtuilaŋa a piilim kama.>> 47Aaron yaa nye dii ate Moosis a weeni wa la, a yaa chali jo tigsuŋku suŋsuŋ. Nyiŋtuilaŋa a poom ŋaam piilim kama alege Aaron a pai ŋan baai nyum ale masa la a te a nye biem duisi basika a te ba. 48Wa jam za ka ŋanvutaŋa ale kpiema suŋsuŋ ate nyiŋtuilaŋa a basi. 49Alege nuruba tusa pi ale ŋanaansi ale kobsiyopɔi (14,700) ale jam kpi nyiŋtuilaŋa nyiŋ a gum baai ale jam kpi Koora nyiŋla. 50Aaron yaa ŋman cheŋ Moosis jigi Tuka Viuku nansuiŋku nɔi dii nyiŋla nyiŋtuilaŋa a jam basi kama.
Currently Selected:
Chiinika 16: BWU
Highlight
Copy
Compare
Share
Want to have your highlights saved across all your devices? Sign up or sign in
© 2023, Ghana Institute of Linguistics, Literacy and Bible Translation
