Chiinika 15

1Naawen a weeni Moosis ayen, 2<<Biisi a te Izirali demma a weeni ba ayen, <Ase ni dan ga jo tɛŋka po ate mi a te ni ase yeri la ŋaaŋnyiŋ, 3a pai ni juka tiirita a te Naawen a ta nyini ni duŋsaŋa po ase ŋan baai nyum ale masa la, ba ka juka tiirita yaase kaabka, a magsi chaab ale pumpuulima yaase suiyɔgni tiirita diipo meena ale magsi la. 4Waai ale ta wa tiirimu jam la yaa le pai ŋandiinta tiirimu a te Naawen, zom naliŋ chin nɔi ale kpaam ale leŋ a lab bunaansi a pai bunyi a dam du. 5Waai ale ta pabiika a cheena ase juka tiirim la yaase kaabka la, a ta daam leŋ a lab bunaansi a pai bunyi a gum du ase nyuka tiirim la.

6<< <Ale padiak gomsi ŋandiinta tiirim, pai zonaliŋ chin nɔi a lab pi a pai buye, a pai kpaam leŋ a lab buta a pai bunyi a dam du, 7ale daam leŋ a lab buta a pai bunyi ase nyuka tiirim la a te Naawen ase nyum buui ale masa la.

8<< <Ase ni dan gomsi lalik paalik ase juka tiirim yaase kaabka, a magsi pumpuulima yaase suiyɔgni tiirita a te Naawen, 9ale lalik ta ŋandiinta tiirim zonaliŋ chin a lab pi a pai buta a dam kpaam leŋ geli du. 10Maa ta daam liŋ geli a jam ase nyuka tiirim la. Ku le chim ka tiirim ate ba nye ale bolim, nyum buui ale masa a te Naawen. 11Lalik kanyi meena yaase padiak, pabiik kanyi meena yaase buuk paaluk meena a magsi ni gomsi si nnala. 12Ni nye a te waai meena ase ni le gomsi a piisi diila.

13<< <Waai meena ale ka tɛŋ biik la, ku a fɛ ate wa nye wieŋa de suiku de po, ase wa dan ta tiirim ate ba nye ale bolim ase nyum buui ale masa la a jam te Naawen. 14Kude a cheŋ buuri ŋaai ale bo ŋaaŋ cheena la jigi, ase diipo meena ate nichaanɔ yaase waai meena ale bo ale ni la a dan te tiirim ate ba nye ale bolim ase nyum ale masa la a te Naawen, ku a fɛ ate wa nye ase nama ale nye diila degadega. 15Naakuuni ale ta ka ŋmarisi yena a te nama ale nichamma ale bo ale ni la. Kude ka ŋmarisi kaai ale ka beni a te gaŋ sii ale bo ŋaaŋ cheena la. Nama ale nichamma a magsi ka ni chim bunyi a te Naawen. 16Sinsak yena ale buusa yena ale magsi nama ale nichamma ale bo ale ni la a va.> >>

17Naawen a weeni Moosis ayen, 18<<Biisi a te Izirali demma a weeni ayen, <Ase ni dan jo tɛŋ kaai ate m ta ni a cheŋ la po, 19ate ni dɛ tɛŋka ŋandiintaŋa, Ni pai kauk a te Naawen ase tiirim la. 20Ni te maasidi a ta nyini ŋandiin tii ate ni dɛ niŋ nya tɛŋka po la ase tiirim la a ta nyini fɔbika jigini. 21A nyini ni gaŋsaŋa meena ale cheen la, ku a magsi ka ni te tiirimu de Naawen a ta nyini ŋandiin tii ate ni dɛ niŋ a nya la.

22<< <Yɔgyɔgla de, fi dan potim seba ale an ta wieŋa de ate Naawen a te Moosis la, 23Naawen wieŋa dinyi ate wa te ni a ta va wa zuk la, a nyini da dii danni ate Naawen a te ni la a ta ga paari gaŋ sii ale bo ŋaaŋ cheen la, 24ase ni dan kan seba ale nye ate naakuuni a zɛ ku nɔi po, naakuuni meena a magsi ba te ka lalik paalik a magsi juka tiirim ase nyum buui ale masa a te Naawen, a va chaab ale ŋandiinta tiirim ale nyuka tiirim ale buduk a magsi biem tiirim. 25Kaabteerɔwa ale wa nye biem duisi basika kaabka a te Izirali naakuuni meena ate ba nya vɔŋteka. Diila ba an potim seba ale nye ya, ba abe ta ba kaasuŋku a jam Naawen jigi kama ale juka tiirim ale biem tiirim. 26Izirali naakuuni meena ale nichamma ale bo ale ba la ale nya vɔŋteka dii nyiŋla nuruma meena a bo kaasuŋ kuui ate ba an potim seba ale nye kaasi la po kama.

27<< <Alege nuru yeŋ a dan kan potim seba ale nye kaasi, ku a fɛ ate wa te busari dii ale paari bein la a magsi biem tiirim. 28Kaabteerɔwa ale wa nye biem duisi basika a te Naawen dii ale kan seba ale nye biemu la nyin, ase ba dan nye biem duisi basika a te wala, wa yaa le nya vɔŋteka. 29Ku be ka sinsak yena a te waai meena ale kan potim seba ale tom a kaasi la, ku nyɔnɔwa dan ka tɛŋ biik yaase nichaanɔ ka sinsak yenaŋa.

30<< <Alege waai ale seba ale nye biem, wa dan ka tɛŋ biik yaase nichaanɔ a biisi kaasi Naawen, ku a fɛ ate ba yeeri wa a ta nyini wa nuruma po a nyini. 31Dii nyiŋla wa le zɛri Naawen wanni an va ŋa la, nuru wala ba yeeri wa, wa nuruma po a basi, wa kaasuŋku a va wa.> >>

32Ase Izirali demma ale diem jam bo gɔnni po la, ba yaa nya nuru ale wa boro yaali daata Vuusum Danni. 33Baai ale nya wa ale wa boro a yaa daataŋa la yaa ta wa jam Moosis ale Aaron ale tigsuŋku meena jigi, 34a yaa lik wa dii nyiŋla, ba potim jam diem zɛ ba le a ba nye wa ka diila. 35Naawen yaa weeni Moosis ayen, <<Ku a fɛ ate nuruwa kpi. Tigsuŋku meena a ta wa nyini peelim a yuk wa ale tana.>> 36Dila tigsuŋku yaa ta wa nyini ba tuka jigini a nyini peelim a yuk wa ale tana a ko, ase Naawen ale weeni Moosis diila.

37Naawen yaa weeni Moosis ayen, 38<<Biisi a te Izirali demma a weeni ba ayen, <Ni gaŋsaŋa meena ale kala ba jam la ni nye zuesa ni gattaŋa noaŋa ate garuk miik sobluk a bo zuesaŋa kunyi meena nyiŋ. 39Ni le ta zuesaŋa dɛ kama nya ate ni a teeri Naawen wieŋa meena ate dila ale basi ate ni a va ŋa ate ni kan taŋ nidek a va ni suiniima ale ni nina kɔrisa. 40Ate ni yaa le teeri a va m wieŋa meena a gaari nidek a te ni Wenni. 41Mi ale Naawen ni Wenni, waai ale ta ni a nyini Ejipiti po a nyini ayen m chim ni Wen la. Mi ale Naawen ni Wenni.> >>

Currently Selected:

Chiinika 15: BWU

Highlight

Copy

Compare