Maak 4

1Yeezu yaa ŋman jam Galili nyakpiemu nɔi a sak nuruma Wen wie. Nuruma a jam piisi ka nna yegayega a za gilim wa ate wa yaa yiti jo ŋaaruŋ po a kala. Ŋaaruŋku a jam bo ka nyiamu po alege ate nuruma a za nyiamu nɔi. 2Wa yaa magsi wamagsima a sak ba wie nna yegayega ayen, 3<<Ni wom mi nalimnyiini. Nuru wanyi ale jam nyini cheŋ wa yuk ŋanbie. 4Wa yaa ale boro a yuk la, bieŋa gela a yaa lo suik niŋ ate nuinsa a deri jam pisi ŋa meena, 5ŋa gela mɛ a lo tintana po. Ŋa yaa nyini nna nwuli, dii nyiŋla tantaŋa an jam soa diiya dula jigini. 6Kantueŋka ale jam nak ŋa la, ŋa yaa deri kɔ, dii nyiŋla ŋa naŋsaŋa an jam baga a siŋ paari nyiamoa. 7Ŋa gela mɛ a lɔ munsa po a yaa nyini. Munsaŋa mɛ a nyini a geri ŋa ate ŋa an jam baga a biaya. 8Ŋa gela mɛ a lɔ tɛŋ naluŋ po a nyini a chim a biak a bɛ nalimnyiini. Ŋaai ta bie pisita. Ŋa gela mɛ pisiyuebi. Ŋa gela mɛ ta kook.>>

9Yeezu yaa weeni ayen, <<Waai ale ta tue a wom la, a wom mi nalimnyiini.>>

10Wa ale jam kala wadek wa nyiini la, baai ale jam a maa va wa ale wa ŋaaŋviirɔma pi ale bayewa la, a yaa bek wa ayen, <<Fi wamagsimaŋa kie ale boa?>> 11Wa yaa weeni ba ayen, <<Wen basi kama ayen ni seba wa naamu wasusuŋŋa, alege nuru yonta jigi m sinsaŋŋa a chim ka wamagsima, a te ba. 12<Ba a nya ale a nya alege ba kan nya, ba a wom ale a wom alege ba kan miŋ ŋa, dii nyiŋla, ba dan nya ale miŋ ŋa, ba le tagri ba wabaata popolaŋa kama ate Wen vɔŋ a te ba.> >>#4:12 Azaya 6:9-10

13Yeezu yaa bek ba ayen, <<Nama an baga wamagsini de kiri a miŋi? Ni be dan kan baga wamagsini de kiri a miŋi, ni yaa be le nye ka sɛ a baga a miŋ ŋa chaaba? 14Nuru waai ale nyini boro a yuk wa ŋanborintaŋa la, ku a nye se ka Wen wieŋa ate nuruba a sak la. 15Bie ŋaai ale lɔ suiku po la, a nye se ka baai ale wom wa wieŋa, alege ate Sitaana nyiem deri jam a yeeri ŋa nwuli a ta nyini ba suiniima po a nyini la. 16Bie ŋaai mɛ ale lɔ tintanaŋa po la, a nye se ka baai ale wom wa wieŋa ate ba sue a peenti, 17alege ate Wen wieŋa a kan jo ba suiniimaŋa po nalimnyiini la. Ba yaa va maga dega, alege ninam a dan yik ba, ba Wen wieŋa vaka nyiŋ, ba nyiem a deri pai ŋa vaka a basi. 18Bie ŋaai mɛ ale lɔ munsaŋa po la, a nye se ka baai ale wom Wen wieŋa 19alege tɛŋka po wieŋa popolaŋa ale ba ligra yaalika yegayega ale ba ŋanta yaalika, ŋala meena a dɛ ka Wen wieŋa ate wamaŋ an baga a nyini ŋa po a nyini. 20Bie ŋaai mɛ ale lɔ tɛŋ naluŋku po la, a nye se ka baai ale wom Wen wieŋa ate ŋa jo ba suiniima po nalimnyiini la. Ba a nye se ka ŋantaŋa ale nyini a yaa biak a bɛ ate ŋa gela a ta bie pisita, ŋaai mɛ pisiyuebi, ŋaai mɛ bie kook diila.>>

21Yeezu yaa bek ba ayen, <<Nuru a dan toati zeuŋ wa pai ka chin a vuk ku? Yaase wa a pai a zaani ka gaduok tɛŋŋa? Aaya, wa a pai ku a zaani ka jaab zuk ate ku a nya dɔkku po meena.#4:21 Nya fotowa, Matiu 5:15. 22Wari dii meena ale chim wasusugi la, a kan ŋman chim wasusugi nuruba jigiya. Wari dii meena ale lik doa la, le nyini peelim ate nuruba nya. 23Dila nyiŋ, nama baai ale ta tue a wom la, ni wom mi nalimnyiini.>>

24Wa ŋman pilim weeni ba ayen, <<Ni kpesi ni dek ale dii ate ni a wom la. Magsi kaai ate fi pai a magsi ŋanta a te nuru la, magsi kala dekdega ate Wen le pai magsi a te fi me, ate ku poom gaam taam. 25Nuru waai nisa po ale ta la, Wen le ŋman te wa ŋanta yegayega a gum du, alege waai nisa po ale kan ta la, Wen le ŋman tuesi jaab fiik kaai ate wa poom ta la kama.>>

26Ate wa jam weeni ayen, <<Wen naamu a nye ase ka nuru ale pai ŋanbie a yuk waaŋ tɛŋ diila. 27Daa meena ate wa gɔ a yiti la, wa zɛ ŋantaŋa ale nye dii a nyini ale a chim la. 28Ka tɛŋka ale wuuk bieŋa ate ŋa a nyini ale chim alege a ta bie. Zabuli ale liŋ a chim, a pak a paari kiŋkari, a yaa ga a biak alege ate bieŋa a yaa ga kpeglim. 29Ŋa yaa ale bɛ a ga nueri la, nuruwa yaa pai wa gebik a ta cheŋ wa talimu po a ga che dii nyiŋla, ŋa cheka paari kama.>>

30Yeezu yaa ŋman bek ba ayen, <<Ti le pai ka boa a magsi chaab ale Wen naamu? 31Bu a nye ase ka nna la. Ase nuru ale pai, mastad#4:31 Mastad ka biri fiik. biri a bori la. Binni a pɔsima kama a gaam tɛŋzuk bie meena. 32Wa yaa pai di a bori ate di nyini chim ti kpiem a ta naŋsa ale yɔgsum nna yegayega ate nuinsa a kali si zuk a yɔk tugta.>>

33Wamagsima ŋa chaab ate Yeezu a jam magsi a sak nuruba la ale nna. Wa jam magsi ka ŋa chaab nna yegayega a gum du ayen baai ale ta Wen yammu la a baga a miŋ a chak. 34Wa an jam biisi wari dinyi la ale nuruba alege kan magsi wamagsini. Alege, wa ale wa ŋaaŋviirɔma a dan jam boro badek ba nyiini, wa nyiem a weeni wa wamagsimaŋa kie a sak ba kama.

35Dila danni junɔi Yeezu yaa weeni wa ŋaaŋviirɔma ayen, <<Ni te ti taam nyakpiemu kauk kunkula.>> 36Wa ŋaaŋviirɔma yaa basi nuru boanni ale cheŋ ga jo Yeezu ale kali ŋaaruŋ kuui po la ayen ba cheŋ. Nuruba ba gela mɛ a jo ŋaaruŋta a maa va ba ŋaaŋ. 37Ba ale a cheŋ la, va kpioŋ yaa jam a nak ba ŋaaruŋku nna yegayega ate nyiamu mɛ a yiti a jueli ŋmai. Bu yaa jo ba ŋaaruŋku po ate ku a nye ku siŋ nyiamu tɛŋ. 38Yeezu a jam dua ŋaaruŋku po ba ŋaaŋ a kpagli ka dafieluk a goa. Wa ŋaaŋviirɔma yaa nak wa a yiti a bek wa ayen, <<Sagrɔ, fi niŋ ka ale ti ni wari nyiamu po?>>

39Wa yaa yiti wa goomu jigini a zaani ŋmai weeni vioku ayen ku basi abe nyiamu mɛ a nye balaa. Vioku yaa deri basi ate nyiamu mɛ a baliŋ. 40Yeezu yaa bek wa ŋaaŋviirɔma ayen, <<Ka boa ate nama a chali yɔgsummoa? Nama diem ka siaka?>>

41Ku yaa cha ba ate ba a bek chaab ayen, <<Nuruwa de, ka wana ate wa baga a biisi ale viok ale nyiam ate ba a wom wa nɔiya?>>

Currently Selected:

Maak 4: BWU

Highlight

Copy

Compare