Maak 3

1Yeezu yaa ŋman cheŋ ga jo ba tuka dɔkku po. Nuru wanyi ale jam bo dula ate wa nisa kpi. 2Baai ale jam bo dula la, yaa limisi ayen ba nya ase Yeezu le tebi yaase wa kan tebi nuruwa nisaŋa Vuusum Danni ate ba nya suik a ŋma wa. 3Yeezu yaa weeni nuru waai ate wa nisaŋa a kpi la ayen, <<Jam de.>> 4A yaa alege a weeni nuruma ayen, <<Nama seba Sinsaŋŋa kama. Ku magsi ayen ni tom ka tuimaŋsa yaa tuimbaata ni Vuusum Danni? Ni te nuruba nyuvuri yaa ni ko ba?>> Ba yaa goori nna chorototo. 5Yeezu sui yaa puuri ale ba ate wa gisi nya ba ale su kaasuŋ dii nyiŋla, ba tueŋa a kpari kama ate ba ka siaka ale wa. Wa yaa weeni nuruwa ayen wa teeri wa nisaŋa. Wa yaa teeri wa nisaŋa a deri ta nyiŋyɔgsa. 6Farisiima yaa yiti a nyini peelim. Ba ale Ayerod nuruma a yaa tigsi chaab a poli suik kuui ba le ba va a ko Yeezu la.

7Yeezu ale wa ŋaaŋviirɔma yaa nyini dula jigini a ŋman cheŋ nyakpiemu nɔi. Nuruba yegayega a nyini Galili tɛŋka po a va wa ŋaaŋ. 8Ba gela a nyini Jerusalem ale Judia tɛŋsaŋa po. Ba gela mɛ a nyini Idumia ale tɛŋ sii meena ale bo Jodan beli ŋaaŋnyiŋ la. Ba gela mɛ a nyini tɛŋ sii ale gilim Taaya ale Saidon la. 9Nuruma ale piisi la nyiŋ wa yaa weeni wa ŋaaŋviirɔma ayen ba yaali ŋaaruŋ a te wa, ate nuru boanni kaa tusi wa. 10Yeezu a tebi nuruba yegayega dula jigini. Ka dila ale soa ate ba a tusi chaab ayen ba paari a tiri wa nya la. 11Baai ate chichirik baata a bo ba po la ale nya wa la, ba yaa lo tɛŋ a kaari yegayega a weeni wa ayen, <<Fi ka Wen Nidoabinni.>> 12Alege wa kaam ti kama ayen ti kan weeni a sak waai ya wa ale ka waai la.

13Yeezu ale wa ŋaaŋviirɔma yaa cheŋ ga jueli guuk kunyi zuk. Wa ale jueli nueri la, wa yaa wi nuru baai ate wa a yaali ayen ba jam wa jigi la ate ba sum jam wa jigi. 14Wa jam lueri ka nuruba pi ale baye a ta nyini nuru baai meena ate wa wi la po ayen ba jam va wa. Wa yaa weeni ba ayen, <<M lueri ni kama ayen ni kasim bo ale mu. M le tom ni mɛ ate ni nyini peelim a mooli Wen wieŋa ate nuruba wom. 15M be le te ni pagrim ate ni baga a yiak chichirik baata nuruba po a basi.>> 16Wa nuruma pi ale bayewa yue ale Simon waai ate Yeezu a te wa yuei paali ayen Piita la, 17ale Jeemsi ale wa suoku Jɔɔn. Jeemsi ale Jɔɔn a jam ka Zebedi nidoabilisa. Yeezu yaa ŋman te ba yuei paali ayen Boanejisi. Di kiri ale Nanpansa Nidoabilisa. 18Yeezu yaa ŋman lueri Andiru ale Filip ale Batolomiu ale Matiu ale Tomasi ale Jeemsi waai ale jam ka Alfiyus nidoabinni la ale Tadiusi ale Simon waai ale jam a nye ayen Juuma a nya badek zuk la, 19ale Judas Iskariot, nuru waai ale wa ta Yeezu a ga bobri sak la.

20Yeezu yaa kuli yeri, ate nuru boari a ŋman tigsi, ate wa le wa ŋaaŋviirɔma an baga dɛ ya. 21Yeezu dɔkku demma ale wom dila la, ba yaa nyini ayen ba gisi a yik wa, dii nyiŋla nuruba ale jam a weeni ayen, <<Wa zukku a tagri kama.>>

22Sinsak sagrɔma yaa nyini Jerusalem tɛŋka po a jam weeni chaab ayen, <<Chichirik baataŋa meena kpagni Beelzebu ale bo wa nyiŋka po a kasim a te wa pagrim ate wa baga a yiak chichirik baata nuruba po a basi.>>

23Yeezu yaa wi Sinsak sagrɔma ate ba jam wa tɛŋ ate wa yaa magsi wamagsima a sak ba ale bek ba ayen, <<Sitaana a nye ka sɛ a baga yiak wadek tomteerɔma a basi? 24Naam a dan lab buye a ta chaab, naam bula a kan zaani. 25Yeri yeŋ dem a dan ta kpaliŋ ale chaab, ba le waaŋ ka chaab. 26Dila nyiŋla Sitaana ale wa tomteerɔma a dan ta chaab, wa naamu a kan baga a zaani a beni. 27<<Suik kula po waai abe dan kan yik pagrɔ a bobiya, wa le nye ka sɛ a jo wa yenni po a zu wa ŋantaŋa? 28<<Ni basi ate m weeni nya kude a sak ni ayen, Wen le vɔŋ waai meena wabaata ale ba biisi kaasuŋ a te ba kama. 29Alege wa kan vɔŋ a te waai ale a lɛ Wen Chiika la, dii nyiŋla, wabiokku de a boro kama taam wuu.>> 30Wa weeni ba wieŋa de kama, dii nyiŋla nuruma ba gela a weeni kama ayen, <<Wa ta ka chichirik biok wa po.>>

31Ku ŋaaŋnyiŋ ate Yeezu suataŋa ale wa mawa a yaa jam za peelim a wi wa. 32Nuru boari ale jam za gilim wa a yaa weeni wa ayen, <<Fi mawa ale fi suataŋa a za peelim a yaali fu.>>

33Wa yaa bek ba ayen, <<Ka wana ale mi ma? Be ka bana ale mi suata?>>

34Wa yaa cheem a nya ba meena ale kala a gilim wa la a yaa weeni ba ayen, <<Ni nya, ka mi ma ale mi suata ale nama. 35Waai meena ale a tom dii ate Wen a yaali la, bala ale mi ma ale m toaba ale m suata.>>

Currently Selected:

Maak 3: BWU

Highlight

Copy

Compare