Maika 6

1Wom Naawen ale a weeni diila. <<Ni yiti zaani, ni weeni ni wanni ate guutaŋa wom. Ni basi ate pinaŋa a wom ni ale a yaali ayen ni weeni diila. 2Guutaŋa, ni wom, Naawen ale ta dii a weeni ayen ni nye kaasi la. Ni wom, nama tɛŋ nyuba ŋaai ale boro taam wuu la. Diila Naawen a ta ka wari ale wa nuruma. Wa pai ka wari a ta chaab ale Izirali.

3<<M nuruba, ka boan wari ate m pai nye ni? M te ni ka boan jiboa? Ni tulisi mu. 4M ta ni nyini Ejipiti ale ŋman da tuesi ni a nyini yɔntidi tɛŋ po. Mi jam tom Moosis ate wa dɛ ni niŋ, a ŋman tom Aaron ale Miriam. 5M nuruba, ni teeri Moab naawa Belak ale jam zɔk dii ayen wa nye la, ate Biio nidoabinni Balaam a jam tulisi diila. Ni teeri ni suiku chelimu a nyini Sittim a ga paari Gilgal ate ni baga a miŋ Naawen wayɔrisima tuimaŋa ale ka dii la.>>#6:5 Chiinika 22-24

6Ka boa ate m le ta jam Naawen niŋ abe m koori wenŋmazukku Wenni niŋŋa? M jam wa niŋ ale ben yeŋ naabisa juka tiirita? 7Naawen sui ale peenti ale padaasa tusa ale kpaam bela tusa pi (10,000)? M pai m bikpagni a nye kaabka m wabaataŋa nyiŋŋa, m le liŋ biak waai la m chiika biem nyiŋŋa?

8Nuru, wa sak fu ka dii ale nala la. Be ka boa ate Naawen a yaali a nyini fi jigi yaa? Fi nye a magsi abe fi a yaali jiirim abe fi yik fidek a cheŋ ale fi Wenni.

9Ni wom! Naawen a wi ka tɛŋ nummu, ate fi daa chali wa yuenni yɔgsum ka yam. <<Ni zuli tachekka ale waai ale lueri ka la. 10Gaasa yeri yaa, mi diem za m baŋ ni varuk ŋantaŋa ale ni ŋanmagsin gelaŋa ale ka kisuk la kama? 11M siak a te nuru waai ale ta venta ŋanmagsinta ale venta boorik kaai dobrim ale kan daa wensie la ayen ku magsi yaa? 12Wa nuru baai ale jigsi la ka wɔkwɔk nuruba. Wa nuruma ka velimvendisa ale a paasi nuruba. 13Dila nyiŋ m piilim kama ayen m kaasi fu, fi wabaataŋa nyiŋ. 14Fi ale dɛ alege fi kan chagi. Fi puuka ale chim ka pu koruk. Fi ale dueni ŋanta alege jaab a kan boro a te fu, dii nyiŋla fi ale a dueni ŋan baai la m le pai ŋa a te kpaliŋ po. 15Fi ale bori alege fi kan nya che. Fi ale ŋmiak kpaam alege fi kan pai bu a tom tuini. Fi ale ŋmiak yɔna alege fi kan nyu ŋa daamoa. 16Fi va ka Omri ŋmarisika ale Ayab yenni ale a nye dii meena la ale va ba ŋiak wieŋa. Dila nyiŋ m le kaasi ni, ate fi nuruma ale chim nuru valiŋsa. Tɛŋ kpieŋsa meena ale nye ni a la.>>

Currently Selected:

Maika 6: BWU

Highlight

Copy

Compare