Maika 5

1Tigsi fi tugurik tɔŋdɔma, tugurik tɔŋdɔba tɛŋ nummoa, diila ba gilim kama a ta chaab ale ti. Ba le fɔbi Izirali niŋdeerɔwa tapiak ale doari.

2<<Alege fi Betiliyem Efrata, Juda buuni po fi ale pɔsima, a nyini fi po ate niŋdeerɔ ale nya Izirali zuk a te mi. Waai kiri ale nyini ŋiak po.>>

3Dila nyiŋ ba za ba zɛri Izirali kama ate ku ga paari diipo ate nipok waai ale a dom la a ga biak, ate wa soa tii ale tali la a pilim ŋmani a ga gum Izirali demma po.

4Wa ale zaani a kasi wa piisaŋa Naawen pagrimu nyiŋ ale Naawen wa Wenni zula yuenni nyiŋ. Ate ba ale bo sukka dek jigi, ate wa zuaka ale paari tɛŋka kpeglimka. 5Ate wala ale chim ba suiyɔgni. Ase Assiria demma nin wɛ jɔ ti tɛŋka po a gɔk santiri a gilim ti yie pagrisaŋa, ti ale siti ka naapeerisa bayopɔi dan poom ka nidoaba naaniŋ a basi ba zuk. 6Ba ale pai gebika a nya Assiria tɛŋka zuk, abe ba dari gebik a yeeri fook po a nya Nimrod tɛŋka zuk. Wa ale vari ti a nyini Assiria demma nisa po a basi ase ba nin wɛ jo ti tɛŋka po a gɔk santiri va ti tɛŋ banaŋa po.

7Jekob nuru baai ale tali la ale bo nuru boari po ase maglim ale nyini Naawen jigi diila, abe ba ŋman nye ase ŋmoruk ale ni a basi wuuk zuk diila, ale kan limisi nuru yaase nurubiik zuk nyaka la. 8Jekob nuru baai ale a tali la ale bo ka tɛŋsaŋa po, nuru boari suŋsuŋ po ase gbeŋli ale bo gɔi po ale duŋsa diila, abe ba ŋman nye ase gbeŋ paali ale bo ale piisa a na ale dari a ŋasi nna bunabuna ate waai karo ale vari ŋa a basi la. 9Fi ale zagri fi nisaŋa ŋmai nakdeka po fi dachaasaŋa zuk, ate fi dachaasaŋa meena ale kaasi.

10Naawen ale a weeni ayen, <<Dai dila danni m le kaasi ni wusumaŋa ni suŋsuŋ, abe m ŋɔriŋ ni torokoma. 11M le kaasi ni tɛŋka tɛŋ ninaŋa abe m dari ni pagrimu ale bo juijui la meena a lɔnsi tɛŋ. 12M le kaasi ni sakpaŋni ate ni kan ŋman baga a tom sampoporinni. 13M le kaasi ni bɔgtaŋa ale ni tuilum tanaŋa ni suŋsuŋ. Ni kan ŋman koori tɛŋ a te ni nisa tuima. 14M le voori Asera zaŋŋa ni suŋsuŋ abe m kaasi ni tɛŋ kpieŋsaŋa. 15Suipuurum po ate m le nye tuni tɛŋ kpieŋ sii meena ale kan wom mi la.>>

Currently Selected:

Maika 5: BWU

Highlight

Copy

Compare