Matiu 27

1Vanni ale veenti la, kaabteerɔ kpaŋŋa ale Juuma nisɔmma meena a ŋman tigsi chaab ayen ba poli ba le ba nye dii a ko Yeezu la. 2Ba yaa bobi wa nisimaŋa a ta wa cheŋ Gominawa Paalɔt jigi.

3Judas waai ale jam ta Yeezu a ga bobri sak la, ale nya ba le bo Yeezu buusaŋa diila, wa sui yaa jam kaasi, ate wa yaa ŋman pilim cheŋ kaabteerɔ kpaŋŋa ale Juuma nisɔmma jigi ayen wa pai ba ligbieŋa pisitawa a te ba. 4Wa le ga paari dula la, wa yaa weeni ba ayen, <<Wen a nya mi kaasuŋku kama, dii nyiŋla mi ta ka nuru waai ale kan kaasi wari la, a jam bobri sak nama. Yɔgyɔgla de nama mɛ a yaa bo wa kum buusa.>> Ba yaa weeni wa ayen, <<Kula a daa tama niŋŋa, alege ka fidek niŋ.>> 5Judas ale ga wom dii ate ba weeni la, wa yaa pai ligraŋa a yuk basi Wen yenni suŋsuŋ, ale ge a nyini a ga bobi miik a kpi.

6Judas ale ga nyini la, kaabteerɔ kpaŋŋa yaa yiti a pisi ligraŋa ale weeni chaab ayen, <<Ligraŋa de tama pai ŋa a da ka nuru nyuvuri. Ti Sinsaŋŋa a kan siak ayen ti pai ŋa a maa gum Wen yenni ligraŋa po.>> 7Ba yaa pai ligraŋa a da tɛŋ kaai ate ba a wi ayen Samɔnsa Meka jigi la. Ba jam a yaali kama ayen ba pai dula jigini a chim nicham guka jigi. 8Ka dila ale soa ate nuruba a diem a wi dula jigini ayen Ziimu Jigini la. 9Ate Biisiteerɔwa Jeremaya ale biisi diila a chim wensie ayen, <<Ba pai ligbie pisita ŋaai ate Izirali nidoabilisaŋa gela a siak da wa la. 10Ba pai te a magsi samɔnsa mɛka jigi ase Naawen ale dak mi diila.>>#27:9-10 Zakaria 11:12-13; Jeremaya 32:6-9

11Yeezu yaa jam taam zaani Paalɔt niŋ. Paalɔt yaa bek wa ayen, <<Ka fi ale Juuma naawa la?>> Yeezu yaa weeni wa ayen, <<Ka fi ale a weeni dila.>> 12Alege kaabteerɔ kpaŋŋa ale Juuma nisɔmma ale jam a ŋma wa la, wa an jam weeni wari ya. 13Paalɔt yaa bek wa ayen, <<Fi kan wom ba ale a ŋma fu ale wie ŋaai meena la?>> 14Alege Yeezu an jam tulisi wa yeŋ mɛ la. Ku yaa jam cha Paalɔt nna yegayega ale wa ale kan a tulisi wari la.

15Bena meena Gaambasika Tigini a nyiem dan paari, gominawa Paalɔt a nyiem lak nuru waai ate tɛŋka demma a yaali ayen wa lak ate wa nyini likka dɔkku po a nyini la a basi kama. 16Nuru wanyi ale jam boro ate ba a wi ayen Barabasi ate ba jam maa yik wa a lik. Nuruba a jam seba wa ka nna yegayega. 17Paalɔt yaa bek nuru baai meena ale tigsi chaab la ayen, <<Nama a yaali ayen m basi ka ba wana? Barabasi yaa Yeezu waai ate ba a wi ayen Kirisitawa la?>> 18Paalɔt jam seba ayen ka kaabteerɔ kpaŋŋa nyunni nyiŋ ale soa ate ba yik Yeezu a ta jam wa jigi.

19Paalɔt ale jam diem kala boteka dɔkku po la, wa powa yaa tom weeni wa ayen, <<Kan nye nuruwa de jaaboa ale wa an kaasi wari ya. Dii nyiŋla deemwa yokku mi gɔdaasim wa wari kama ate ku daani mi nna yegayega.>> 20Kaabteerɔ kpaŋŋa ale Juuma nisɔmma yaa weeni nuru boanni ayen ba saalim ate wa lak Barabasi a basi abe wa ge ate ba ko Yeezu. 21Paalɔt yaa bek nuru boanni ayen, <<Nuruma de bayewa, nama a yaali ayen m basi ka ba wana?>> Ba yaa tulisi wa ayen, <<Ti a yaali ayen fi basi ka Barabasi.>> 22Wa yaa ŋman bek ayen, <<M be nye Yeezu waai ate ba a wi ayen Kirisitawa la ka sɛ?>> Ba meena yaa tulisi ayen, <<Basi ate ba kpi wa jabarimu nyiŋ ate wa kpi.>> 23Wa ŋman bek ba ayen, <<Ka boan jaab wabiok ate wa nye?>> Ba yaa kaari nna yegayega ayen, <<Basi ate ba kpi wa jabarimu nyiŋ ate wa kpi.>>

24Paalɔt yaa nya ayen wa an baga a nye wari ya dii nyiŋla, ba nuemka ale ta kpaliŋ a jam. Wa yaa pai nyiam a nari wa nisaŋa nuru boanni niŋ, ale weeni ba ayen, <<Mi niŋ maa ka nuruwa dɛ kum po, ku bo ka nama dek jigi.>> 25Nuru boanni yaa weeni wa ayen, <<Basi ate wa kummu nyiŋ ninammu a jam tama ale ti bisaŋa jigi.>> 26Paalɔt yaa lak Barabasi a basi ale basi ate ba miiri Yeezu. Ba ale miiri wa nueri la, wa yaa pai wa te ayen ba ta wa ga kpi jabarimu nyiŋ.

27Paalɔt tugurik tɔŋdɔma yaa yik Yeezu a ta jo ba gominawa yenni dabiaka po ate ba meena a yaa gilim wa. 28Ba yaa yeeri wa gattaŋa ale pai garuk mɔnuŋ a jo wa. 29A pai munsa a yɔk zutɔk a pai vuk wa zukku ale pai tachek a nyo wa juga nisaŋa po. Ba yaa kpi duna wa niŋ a nye wa a la, ale a weeni ayen, <<Juuma naawa, kasim boro taam wuu.>> 30Ba jam chesi tintueta a basi wa nyiŋ ale pai diok a nak wa zukku. 31Ba ale nye wa la a ga nueri la, ba yaa yeeri garuk mɔnuŋku ale pai wadek gattaŋa a jo wa a ta wa nyini cheŋ ayen ba kpi wa jabarimu nyiŋ.

32Ba ale jam bo suiku po a cheŋ la, ba yaa zik Simon ale wa cheena tɛŋka po ate tugurik tɔŋdɔma a fɛ wa ate wa tuesi Yeezu jabarimu ji. Simon a jam Sairini tɛŋka denɔ.

33Ba yaa ga paari juijui ate ba a wi ayen Golgota la. Ku kiri ale Zukoluku Jigini. 34Ba yaa pai tiim a nyo daam po a lam nya ale pai te Yeezu ayen wa nyu alege wa an jam nyu ya.

35Ba yaa yik Yeezu a kpi wa jabarimu nyiŋ, ale pai wa gattaŋa a chari chaab. Ba jam nak ka gbaŋ a nya waai ale magsi garuk kuui dek la. 36Ba ale nak gbaŋka wa gattaŋa nyiŋ a nueri la, ba yaa kala a limisi ayen waai a kan vari wa a basi. 37Ba yaa pai tapagi a ŋmarisi di nyiŋ ayen, <<Ka Yeezu, Juuma Naawa Ale Nna,>> a pai di kpi jabarimu zuk.

38Ba jam maa kpi ka zueba baye ŋanbarinta nyiŋ a gum Yeezu po, ate ba wanyi a bo wa juga, nwala mɛ a bo wa gala. 39Nuru baai ale jam va dula a taam la a yaa zak zuk nya wa a mati ba noa ale a lɛ wa ayen, 40<<Fi weeni ayen fi le kaasi Wen yenni abe fi ŋman sɛ di a nueri daa ŋata po. Fi dan ka Wen Nidoabili bɛ nyini jabarimu zuk a siŋ a vari fidek a basi.>> 41Kaabteerɔ kpaŋŋa ale Sinsak sagrɔma, ale Juuma nisɔmma me a jam a la wa ale a weeni ayen, 42<<Wa jam baga a vari nuruba a basi kama, alege wa an baga a vari wadek a basi. Daa wa ale Izirali Naawa? Wa dan nyini jabarimu zuk a siŋ ti yaa le ta siaka ale wa. 43Wa ta siaka kama ayen Wen ale bo le wa ale weeni ayen wa ka Wen Nidoabili. Ti be le nya ase Wen ale vari wa a basi ya.>> 44Zue baai ate ba jam kpi ba a gum Yeezu po la, mɛ a lɛ wa dila dekdega.

45Ku ale jam paari kantueŋ baŋ pi ale buye la, tɛŋka meena yaa jam nye legi nna kpitɔ a ta ga paari kantueŋ baŋ buta. 46Baŋ butawa po, Yeezu yaa kaari ate ku jueli a weeni ale wadek tɛŋka biika ayen, <<Eloi, Eloi, Lama Sabagtani.>> Ku kiri ale, <<Mi Wen yaa, mi Wen yaa, ka boa ate fi zɛri mu?>> (Yiila 22:1)

47Nuru baai ale jam za dula jigini la gela a wom dii ate wa weeni la kama. Ba yaa weeni ayen, <<Wa a wi ka Elaja.>> 48Ba po wanyi yaa chali cheŋ ga pai sosok a lusi damiisiŋ po a pai yik diok woŋ nyiŋ a zak ta jueli Yeezu nɔi. 49Nuru mbala yaa weeni ayen, <<Ni basi ate ti limisi a nya ase Elaja ale jam a yik wa a ta nyini jabarimu zuk a siŋ tɛŋ ya.>>

50Yeezu yaa ŋman kaari nna yegayega a yaa le ge kpi. 51Wa ale jam kpi la, garuk panni dii ate ba jam pai a kasi Wen yenni po la, a yaa jam cheeri di ŋmazuk a ta siŋ paari di tɛŋ. Wen jam basi kama ate tɛŋka a choa ate pinaŋa a na a mobi, 52ate nuruba yega ale jam va Wen alege a kpi la boositaŋa a lagri ate ba yiti kum po, 53alege basi boositaŋa. Ku ŋaaŋnyiŋ ate Yeezu a yiti kum po la ba yaa jo Jerusalem tɛŋka po. Nuruba yegayega ale jam nya ba. 54Tugurik tɔŋdɔma kpagni ale tugurik tɔŋdɔ baai ale jam a limisi la ale nya tɛŋka choka ale dii meena ale nye la ku yaa cha ba nna yegayega. Ba yaa weeni ayen, <<Wensie, nuruwa de sum ka Wen Nidoabili.>>

55Nipok baai ale jam maari Yeezu Galili tɛŋka po la a jam za moata dula a nya dii meena ale nye la kama. 56Baai ale jam bo ba po la ale Mɛɛri Magdalene ale Mɛɛri, Jeemsi ale Josefi mawa ale Zebedi nidoabilisaŋa mawa.

57Jigsirɔ wanyi ale jam nyini tɛŋ ate ba a wi ayen, Arimatia. Wa yuei jam ale Josefi. Wa jam ka waai ale ta siaka ale Yeezu. 58Da dila danni junɔi ate wa yaa cheŋ Paalɔt jigi a saalim wa ayen wa basi ate wa ga yeeri Yeezu nyiŋka jabarimu zuk a ta cheŋ ga gu ate Paalɔt yaa siak. 59Josefi yaa cheŋ ga yeeri Yeezu nyiŋka jabarimu zuk yaa pai garuk pali naliŋ a vili ka 60a ta ga dueni piuŋ vɔrup paalik po. Wa yaa bilim tintain kpienni a lik piuŋku vɔrumu nɔnni. 61Mɛɛri Magdalene ale Mɛɛri nwala a jam kali ka dula a tuk vɔrumu nyiŋ.

62Vari ale ŋman veenti la, ba Vuusum Danni saluiku kaabteerɔ kpaŋŋa ale Farisiima yaa cheŋ Paalɔt jigi a weeni wa ayen, 63<<Ti diem a teeri velimvendika ale jam boro la wa weeni ayen, <M le yiti kum po ku daa ŋata dai.> 64Be basi ate ba ga a limisi vɔrumu ate ku paari daa ŋata ate wa ŋaaŋviirɔma a kan mak yeeri wa abe ba weeni nuruma ayen wa yiti kum po. Dan kan daa di ventaŋa de ale gaam wa le liŋ velim diila.>> 65Paalɔt yaa siak ale basi ayen tugurik tɔŋdɔba cheŋ a ga ŋmasi a limisi vɔrumu. 66Ba yaa cheŋ ga daani tintanni ayen waai dan bilim di abe ba miŋ a yaa le basi ate tugurik tɔŋdɔma a limisi vɔrumu.

Currently Selected:

Matiu 27: BWU

Highlight

Copy

Compare