Matiu 26

1Yeezu ale jam sak wa ŋaaŋviirɔma wieŋa de meena a nueri la, wa yaa weeni ba ayen, 2<<Ni seba ayen tali ka da ŋaye ate Gaambasika Tigini a paari.#26:2 Nyinika 12; Chiinika 9:1-14 Ba le yik Mi Saalɔbiika a te ate ba kpi wa jabarim nyiŋ.>>

3Va ŋala po kaabteerɔ kpaŋŋa ale Juuma nisɔmma yaa tigsi chaab kaabteerɔ kpioŋku Kayafas dabiaka po, 4ayen ba poli a nya suik ate ba va a suk yik Yeezu a ko. 5Alege ba yaa ŋman weeni chaab ayen, <<Ase ti dan yik wa nuru boanni baai ale tigsi chaab ayen ba dɛ tigini dɛ la suŋsuŋ, ba le jam yiti ale nɔiyeŋ a nyiem a kaasi tuima tɛŋka po.>>

6Dai yeŋ po ate Yeezu yaa jam bo Simon yenni po Betani tɛŋka. Simon wala a jam ta ka gama tuem. 7Nipok wanyi yaa nyini peelim a ta kpa buui nyum ale masa nna yegayega la a jam jo Yeezu jigi a kpiiri bu a nyo wa zuk. 8Yeezu ŋaaŋviirɔma ale ga nya nipowa ale nye diila, ba sue yaa puuri ale wa. Ba yaa jam a poli ba suiniima po ayen, <<Ka boa ale soa ate nipowa de a pai kpaamu a yik kaasi nna la? 9Wa dan poom a pai bu a da ligra yegayega a pai ŋa a te ŋanjaksaŋa, dila an zunchoŋŋa?>>

10Yeezu yaa jam seba dii ate ba a poli la, a yaa weeni ba ayen, <<Ka boa ate wa le nye diila a daani nama? Ni basi wa, dii nyiŋla wa tom ka wamaŋ a te mi. 11Niwomma a kasim bo ale nama kama daa meena, alege mi a kan bo ale ni a ta a cheŋŋi. 12Nipowa de a kpiiri kpaamu a nyo mi zuk a gomsi mi nyiŋka a magsi ka guka. 13Wensie ate mi a weeni ni, juijui meena ate nuruba a sak Wen wamaŋsaŋa la, ba le weeni nipowa de ale nye dii a te mi la. Ba le kasim a teeri wa yuei diipo meena wuu.>>

14Da ŋala po Yeezu ŋaaŋviirɔma pi ale bayewa po wanyiwa waai ate ba a wi wa ayen Judas Iskariot la, a jam yiti a cheŋ kaabteerɔ kpaŋŋa jigi, 15a weeni ba ayen, <<Ase mi a dan baga a yik Yeezu a ta wa a jam a nyo ni nisima po, nama ale te mu ka boa?>> Wa le bek ba dila la, ba yaa deri chiini ligbie pisita a te wa dula jigini. 16A nyini da ŋala po a ta a cheŋ, Judas yaa nyiem a gisi ka suik ayen wa ta Yeezu a ga bobri a sak.

17Yeezu ŋaaŋviirɔma yaa jam wa jigi tigi dii ate ba a ŋɔbi boroborok kuui ale kan ta dabinta la piilimka danni a weeni ayen, <<Ka bɛ ate fi a yaali ayen ti ga gomsi Gaambasika Tigini ŋandiintaŋa ate ti dɛ?>>

18Wa yaa weeni ba ayen, <<Ni cheŋ nuru wanyi jigi tɛŋka po a ga weeni wa ayen, <Ti Sagrɔwa ale tom ti ayen ti jam a weeni fu ayen wa kummu danni a moata kama. Tama ale wa ale a yaali ayen ti dɛ Gaambasika Tigini ŋandiintaŋa fi yenni po.> >>

19Wa ŋaaŋviirɔma yaa cheŋ ga nye dii ate wa weeni la a yaa gomsi Gaambasika Tigini ŋandiintaŋa.

20Wenni ale jam siŋ la, Yeezu ale wa ŋaaŋviirɔma pi ale bayewa yaa tigsi chaab a kala a dɛ ŋandiintaŋa. 21Ba le jam boro a dɛ la, wa yaa weeni ba ayen, <<Wensie ate mi a weeni ni, nama po wanyi ale a yaali ayen wa ta mi a ga bobri sak.>>

22Wa ŋaaŋviirɔma ale wom dii ate wa weeni ba la, ba meena sue yaa jam kaasi ate ba yaa bek wa wanyi wanyi ayen, <<M Nyɔnɔ Yeezu Kirisita, ka mi?>>

23Yeezu yaa weeni ba ayen, <<Nuru waai ale kala dela pai wa boroborok a maari a suiik jentaŋa ale mi dek la, ale wa ta mu a ga bobri sak. 24Mi Saalɔbiika ale kpi ase ka ba ale ŋmarisi dii Wen gbaŋka po la. Alege ku le pagra kama a te waai dek ale wa ta mu a ga bobri sak la. Ku zunchoŋ kama ale ba nin poom kan biak wa.>>

25Judas waai ale jam a yaali ayen wa ta Yeezu a ga bobri la yaa bek wa ayen, <<M Sagrɔ, ka mi?>> Yeezu yaa weeni wa ayen, <<Ka fi.>>

26Ba ale boro a dɛ ŋandiintaŋa la, Yeezu yaa pai boroborok a puusi a te Wen a nye wa jiam, alege ŋmari ku a chari wa ŋaaŋviirɔma ale weeni ba ayen, <<Ni ŋoa ŋɔbi, mi nyiŋka ale nna.>>

27Wa yaa ŋman pai beerik ale daam a puusi a te Wen jiam, alege pai te ba ate ba nyu, wa yaa weeni ba ayen, 28<<Ka mi nɔiyeŋ paalika ziimu ale nna. Buui ale a nyini nuruba yega nyiŋla, ate Wen a vɔŋ ba tuimbaataŋa a te ba.#26:28 Jeremaya 31:31 29Mi a weeni ni, m kan ŋman nyu daamu de nin ka dai dii danni ate m ŋman a nyu da paalimu m Kowa naamu po la.>>

30Ba yaa yi yiili alege a nyini ga jueli Olivi Guuku zuk.

31Yeezu yaa weeni ba ayen, <<Ni meena ale chali waaŋ chaab mi nyiŋ yokku de. Diila ba ŋmarisi kama ayen, M le siti naapeerika ate piisa a waaŋ chaab. (Zakaria 13:7) 32Alege m dan yiti kum po, m le dɛ ni niŋ a cheŋ Galili tɛŋka.>> 33Piita yaa weeni wa ayen, <<Fi ŋaaŋviirɔma meena a dan basi fu, mi kan maara basi fu diipo.>> 34Yeezu yaa weeni wa ayen, <<Basi ate m weeni fu, yokku de fi ale pagsi ku nɔi buta ayen fi zɛ mi, alege ate vari kpadiaka a kum.>> 35Piita yaa ŋman weeni wa ayen, <<Mi kan weeni ayen m zɛ fu. Mi dan poom ayen m kpi ale fu, mi kan weeni dila.>> Wa ŋaaŋviirɔma meena mɛ a weeni dila dekdega.

36Ba yaa jam paari jigi ate ba a wi ayen Getsemani, ate Yeezu yaa weeni wa ŋaaŋviirɔma ayen, <<Ni kali dela ate m cheŋ a ga puusi a te Naawen abe m jam.>> 37Wa le a cheŋ la, wa yaa basi ate Piita ale Jeemsi ale wa suoku Jɔɔn, Zebedi nidoabilisaŋa a va wa. Ku yaa piilim a daani wa ate wa sui a kaasi. 38Wa weeni ba ayen, <<M sui ale kaasi nna yegayega, ate ku a nye nna ase mi a yaali ayen m kpi kama la. Ni be limisi dela ate m jam, abe ni kpesi a nya.>>

39Wa le ŋman cheŋ magadek la, wa yaa kpi duna tɛŋ a puusi a te Wen ayen, <<M Koa, mi a saalim ayen ku dan ka fi popeentik, be yeeri ninammu de mi jigi a basi. Nye fidek ale a yaali diila, alege daa mi ale a yaali diila.>>

40Wa le ŋman pilim a nyini wa puusika jigini a jam la, wa yaa nya wa ŋaaŋviirɔma batawa a doa goa. Wa yaa weeni Piita ayen, <<Ka boa ate nama an baga a kali a limisi maga ale ge a goa? 41Ni a kpesi abe ni a puusi a te ni kan jo nyenyaka po, chiika a yaali kama alege nyiŋka a wobsa.>>

42Wa yaa ŋman pilim cheŋ wa puusika jigini a ga puusi a te Wen ayen, <<M Koa, ku dan kan ta nyeka alege ate fi a yaali ayen m nam bɛ basi ate fi ale a yaali diila a nye.>> 43Wa yaa ŋman pilim jam paari ale wa ŋaaŋviirɔma a doa a goa, dii nyiŋla goom ale jam ta ba nna yegayega.

44Yeezu yaa ŋman pilim cheŋ a ga puusi a te Naawen ase wa le poom a puusi diila. 45Butawa po Yeezu yaa ŋman pilim jam paari a bek ba ayen, <<Ni diem a doa a goa kama? Wie meena a nueri kama. Di danni a paari ya ate ba ayen ba yik Mi Saalɔbiika a nyo tuimbaata nyam nisima po. 46Ni yiti ate ti cheŋ. Nuru waai ale ta mu a ga bobri sak la ale la a cheena.>> 47Yeezu ale diem boro a biisi la, Judas waai ale jam ka Yeezu ŋaaŋviirɔma pi ale bayewa po wanyi la, yaa jam wa jigi ale nuru boari yegayega. Kaabteerɔ kpaŋŋa ale Juuma nisɔmma ale tom ba. Ba jam ta ka gebi kpieŋsa ale dua a jam ayen ba yik wa. 48Bumbobrɔwa a poom weeni ba kama ayen, <<Ti dan ga paari ba, nuru waai ate mi a puusi ale a gbaari wa la, ka wala ale la. Ni yik wa ale pagrim.>> 49Ba ale ga paari Yeezu la, Judas yaa deri ga wa jigi a wi wa ayen, <<M Sagrɔ,>> a yaa alege a puusi ale gbaari wa.>>

50Yeezu yaa weeni wa ayen, <<M doa, nye dii ate fi a poli ayen fi nye mu la.>> Baai ale jam va Judas la, a yaa yik wa ale pagrim. 51Yeezu ŋaaŋviirɔma po wanyi a deri yeeri wa gebi kpieŋ a che kaabteerɔ kpioŋku yɔmma po wanyi turi a gebi lɔnsi tɛŋ. 52Yeezu yaa weeni wa ayen, <<Pa fi gebika a ŋman su ka fooku po. Diila baai ale a pai gebik la a kpi ale ka gebik. 53Nama a zɛ ayen mi baga kama a wi M Kowa ayen wa tom wa maarɔma baai ale piisi nna yegayega la ate ba jam a maari mu? 54M dan nye dila, wie ŋaai ate ba ŋmarisi mi wie Wen Gbaŋka po dipo la a kan chim wensie.>>

55Yeezu yaa viriŋ a bek nuru boanni ayen, <<Mi ka zue ate nama a ta gebi kpieŋsa ale dua a jam ayen ni yik mu? Daa meena mi kasim bo ale ni Wen Yenni po a sak ni kama, alege nama an jam yik mu. 56Ba le ŋmarisi Wen biisiteerɔma Gbaŋka po diila a sum chim ka wensie jinla.>> Dula jigini wa ŋaaŋviirɔma meena a yiti chali ale ge wa.

57Ba yaa ta Yeezu a cheŋ kaabteerɔ kpioŋku Kayafas jigi. Ba le jam ga paari dula la, Sinsak sagrɔma ale Juuma nisɔmma yaa jam tigsi chaab. 58Piita yaa mak va ba ŋaaŋ a jam jo kaabteerɔ kpioŋku yenni dabiaka po a cheŋ a ga kala ale kpagni limisidɔma ayen wa nya dii ale di nye la. 59Kaabteerɔ kpaŋŋa ale Nisɔmma meena a jam bo dula a gisi nuru ayen wa weeni a sak ba ayen wa nya Yeezu ale wa boro a tom wabiok ate ba baga a nya suik a ko wa. 60Ba yaa gisi a kpeeri. Alege nuruba yegayega a diem nyini a jam za ba niŋ ayen ba velim wie a te wa. Kula ŋaaŋnyiŋ nuruba baye yaa nyini a jam za ba niŋ. 61A weeni ayen, <<Tama a wom ale Yeezu a weeni ayen wa baga a kaasi Wen yenni, abe wa ŋman se di daa ŋata po.>>

62Kaabteerɔ kpioŋku yaa yiti a cheŋ a ga zaani a bek ayen, <<Fi ka wari a tulisi ale ŋaai meena ate ba a biisi a te fu la?>> 63Alege Yeezu yaa sina. Kaabteerɔ kpioŋku yaa ŋman weeni wa ayen, <<Mi a yaali kama ayen fi pɛ Wen dii ale boro la yuenni nyiŋ abe fi weeni mu wensieŋa.>> Wa yaa bek Yeezu ayen, <<Fi ka Wen Nidoabinni waai ate ba a wi ayen Kirisita la?>> 64Yeezu yaa weeni wa ayen, <<Mm, mi ale la. Ni basi ate m weeni ni ayen dai yeŋ po fi le nya Mi Saalɔbiika ale m kala Wen juga geŋ. Fi le ŋman nya mu ale m nyini Wen jigi chiŋmaaŋa po a cheena.>>#26:64 Daniel 7:13; Yiila 110:1

65Wa le weeni dila la, kaabteerɔ kpioŋku yaa yik wa garukku a dari cheeri ale weeni ba ayen, <<Ti kan ŋman a yaali seerɔba. Ni meena wom wa le pai wadek a magsi chaab ale Wen la. 66Nama a poli ka sɛ, wa lo yaa wa an loya?>> Ba meena yaa weeni ayen, <<Wa lo kama. Ku magsi ba ko wa kama.>>

67Nuruma ba gela yaa chesi tintueta a basi wa nyiŋ ale a nak wa. 68A weeni ayen, <<Fi a weeni ayen fi ale Kirisitawa. Be miŋ baai ale a nak fu la.>>

69Ba le ta Yeezu a nye nya kude meena la, Piita a diem bo ka yenni dabiaka po. Nipokbili wanyi a yaa jam boro. Wa jam ka kaabteerɔ kpioŋku dɔkliema po wanyi. Wa yaa nya Piita a weeni wa ayen, <<Daa fi ale poom va Galili tɛŋka denɔwa Yeezu la?>>

70Wa yaa pagsi ale baai meena ale za dula la nimbie po ale weeni wa ayen, <<Mi zɛ fi ale a biisi diila.>> 71Wa le weeni dila la, wa yaa yiti a cheŋ ga za nansuiŋku nɔi. Nipokbili wa choa a ŋman diem nya wa dula jigini ale wa za ate wa yaa weeni nuru baai ale za moata wa la ayen, <<Nuruwa de ka Yeezu ŋaaŋviirɔma po wanyi.>>

72Piita yaa ŋman pagsi ayen, <<M pɛ ya, mi zɛ nuruwa de.>>

73Ku an jam beniya ate baai ale jam za moata wa la wanyi a yaa weeni wa ayen, <<Fi ka ba wanyi, dii nyiŋla fi a biisi ase ka Galili denɔ la.>> 74Piita yaa weeni wa ayen, <<M pɛ ya, ka wensie ate mi a biisi. Mi zɛ nuru waai wie ate fi a biisi la.>> Wa le weeni dila a ga nueri la, vari kpadiaka yaa deri kum. 75Ate Piita yaa teeri dii ate Yeezu a poom weeni wa ayen wa le pagsi ku nɔi buta ayen wa zɛ wa, ale ge ate vari kpadiaka a kum la. Wieŋa de meena yaa nye ate Piita sui a kaasi ate wa yaa deri nyini a kum nna yegayega.

Currently Selected:

Matiu 26: BWU

Highlight

Copy

Compare