Josua 6

1Jeriko demma a jam lik ba tɛŋka nansuiŋtaŋa ka nna kpapi dii nyiŋla ba jam a chali ka Izirali demma yɔgsum. Ba jam kan siak ate nuru a jo tɛŋka po yaase nuru nyini ka po nyini.

2Alege Naawen a yaa weeni Josua ayen, <<M pai Jeriko tɛŋka ale ka naawa ale ka tugurik tɔŋdɔma meena a nyo fi nisima po. 3Fi ale fi tugurik tɔŋdɔma meena a cheŋ gilim tɛŋka bunyi dai yeŋ po. Ni nye dila ate ku paari daa ŋayuebi. 4Basi ate kaabteerɔba bayopɔi wanyi wanyi a pai damuniŋ a dɛ dakanni niŋ. Da dii danni ale a saari ŋayopɔiwa la ni cheŋ gilim tɛŋka ku nɔi buyopɔi abe kaabteerɔma a peeri damunsaŋa. 5Ni dan ga wom ale kaabteerɔma a peeri ba damunsaŋa yegayega basi ate nuruma meena a yaa kaari nna bɔgbɔg, tɛŋka parika a yaa le lo ate fi nuruma a yaa chali jo ka po a nak nuruma ale bo ka po la.>>

6Ate Nun nidoabinni Josua a yaa wi kaabteerɔma ate ba jam jigi yeŋ ale wa weeni ba ayen, <<Ni pai Naawen nɔiyeŋka dakanni a yaa kaabteerɔba bayopɔi ate ba dɛ di niŋ ale damunsa.>> 7Ate wa yaa weeni nuruma ayen, <<Ni cheŋ gilim tɛŋka tugurik tɔŋdɔma le dɛ Naawen dakanni niŋ a dak suiku a sak ni.>>

8Josua ale biisi ale nuruma a ga nueri la kaabteerɔma bayopɔiwa yaa pai damunsa a dɛ Naawen dakanni niŋ a cheŋ a gilim tɛŋka ale a peeri ba damunsaŋa. Ate kaabteerɔ baai ale ji Naawen dakanni la a vi ba ŋaaŋ. 9Tugurik tɔŋdɔba ale jam dɛ kaabteerɔma baai ale jam ji dakanni la niŋ ate mba mɛ a bo di ŋaaŋ a vi alege te kaabteerɔma a kasim a peeri ba damunsaŋa. 10Josua yaa weeni ba ayen, <<Waai kan kaari, waai kan poom biisi mɛ. Mi dan kan te ni suik ayen ni kaari waai kan choa chiowa, ate mi yaa dan weeni ayen ni kaari, abe ni yaa kaari.>> 11Ba yaa pai Naawen dakanni a ji cheŋ gilim tɛŋka bunyi dekki ate waai meena a ŋman pilim cheŋ ba le diem bo juijui a goa la ayen ba goa.

12Josua a yaa yiti saluik yokyokwa da dindila danni a basi ate kaabteerɔma a ŋman ji Naawen dakanni. 13Kaabteerɔba bayopɔiwa baai ale ta damunsaŋa la a yaa dɛ Naawen dakanni niŋ a cheŋ ale a peeri ba damunsaŋa. Tugurik tɔŋdɔba ale jam dɛ kaabteerɔma baai ale ta damunsaŋa la niŋ a cheŋ alege ate mba me a bo ŋaaŋ a vi di. Dila powa meena kaabteerɔma a kasim a jam a peeri ba damunsaŋa kama. 14Dai dila danni dek ba cheŋ gilim tɛŋka ka bunyi ale ŋman pilim cheŋ ba goomu jigini. Ba jam a nye ka dila a ga paari daa ŋayuebi.

15Daa ŋayopɔiwa danni Izirali demma a yaa yiti saluik yokyokwa a cheŋ gilim tɛŋka ase ba ale jam a nye diila. Alege da dila danni ba yaa cheŋ gilim ka ku nɔi buyopɔi. 16Ba ale cheŋ gilim dii a saari buyopɔiwa la, kaabteerɔma a yaa peeri ba damunsaŋa yegayega ate Josua a yaa weeni nuruma ayen, <<Ni kaari. Ale Naawen a pai tɛŋka a nyo ka ni nisima po. 17Ni kaasi tɛŋka ale ka jaab meena ale ka Naawen ale soa ba meena. Alege ni basi Arayab waai ale ka taabuk la ale wa yenni demma meena dii nyiŋla wa jam pai nuru baai ale jam ba kpesi nya tɛŋka la a suk kama ate ba an ko bo. 18Ni kan pai ŋan baai ate ni ale kaasi la a tara, dii nyiŋla ba ka Naawen ŋanta. Waai a dan zɛri alege pai jaab wa ta ka kaasuŋ a cheŋ wadek zuk ale Izirali bisaŋa meena zuk. 19Jaabuui meena ate ba pai kpana ale ligmɔniŋ ale kutuk mɔnta ale kutuk a nye la ka tuilum ŋanta a te Naawen. Waai a dan pai bala wa ta jam ate ti pai a dueni jigi maŋ a te Naawen.>>

20Nuruma ale ga wom damunsaŋa peeri ka la, ba yaa kaari nna zigzig, ate Jeriko tɛŋka parika ale se gilim ka la a yaa deri lo meena a paari tɛŋ. Izirali bisaŋa a yaa deri chali jo tɛŋka po a nak nuruma a vari ka. 21Ba jam kaasi jaab meena kama ka po nidoaba ale nipooba ale paalisa ale nisɔm ale niiga ale piisa ale bonsa jaab meena ba jam kaasi kama.

22Josua yaa weeni barinyarɔma bayema ate wa jam tom la ayen, <<Ni cheŋ taabuka yenni a ga ta wa ale wa yenni demma meena a jam ase ni le puulim dii ale wa la.>> 23Nidoa paalukku bayema a yaa cheŋ a ga ta Arayab ale wa kowa ale wa mawa ale wa toama ale wa yenni demma meena ale bo le wa la a jam. Ba yaa ta ba a cheŋ jigi yeŋ ate ku moata Izirali bisaŋa dek ale diem jaa goa juijui la ate nuruba a kan daani ba.

24Izirali bisaŋa a yaa ju tɛŋka ale ka jaab meena ka ŋan baai nyini ate ba jam pai kpana ale ligmɔniŋ ale kutuk kuui ale a nyaliŋ la ale kuta ŋantaŋa ale ba jam pai a ta ga dueni Naawen yenni po. Juijui ate jaab a kan baga a daani ba la. 25Josua yaa jam pai Arayab ale wa koyeni demma meena a basi. Wa an jam ko ba dii nyiŋla wa le jam tom ate ba cheŋ Jeriko a suk la nyiŋ. Wa ale wa dɔkku a jam bo ale ka Izirali bisaŋa a jam paari jinla.

26Va ŋala po Josua a jam pɛ a basi Jeriko tɛŋka nyiŋ ayen, <<Naawen ka te waai ale nye wa popola ayen wa ŋman se Jeriko tɛŋka la. Dai dii danni ate wa a piilim ka nyubini la wa bikpagni kpi. Wa ale a su tɛŋka nansuiŋtaŋa dai dii danni la wa nisa po biika me kpi.>>

27Naawen a yaa jam bo ale Josua ate wa yuei a yiti tɛŋ kala meena po.

Currently Selected:

Josua 6: BWU

Highlight

Copy

Compare