Azaya 5

1Mi ale yi yiili a te waai ate mi a yaali la. Wa kadukka wari yiili. Mi ale a yaali waai la a ta ka kaduk, ate ka poak a bo guuku geŋ. 2Wa tu tɛŋka kama a yeeri tana ŋaai ale boro la, alege a yaa vuk tiisa sii ate wa a yaali la. Wa sɛ ka yeri ate di woŋŋa kadukka po ale ŋman nye daam ŋmiaka jigi. Wa jam a gisi ka tiib sii ale ta yɔn maŋsa la, alege si meena a jam yɔni ka yɔn baata.

3Yɔgyɔgla de, nama baai ale bo Jerusalem la ale nidoa baai ale bo Juda la, ni weeni dii ale bo mi ale m kadukka suŋsuŋ la. 4Ka boa ate mi ale nye a te m kadukka a ŋman gaam mi ale nye diila? Mi ale a gisi yɔn ŋaai ale nala la, ka boan nyiŋ ate si yɔni yɔn baata? 5Yɔgyɔgla de, mi ale weeni ni. Mi ale za m nye m kadukka diila. Mi ale yeeri ka geruku a basi ate ka kaasi. Mi ale nak ka siaka a lɔnsi tɛŋ, ate ba ale tabi ka zuk.#5:1-5 Nya fotowa, Piilimka 9:20. 6Mi ale nye ate tɛŋka a kan ta kiri ya, m kan ŋman yoarisi tiisaŋa naŋsaŋa yaase m kpa ka po. Mi ale basi ate ŋankayaata ale muŋsa a nyini tɛŋka zuk. Mi ale weeni chiŋmaaŋa ate ŋmoruk a kan ni ka po.

7Naawen Dii Ale A Dɛ Tugurik Tɔŋdɔma Niŋ La kadukka ka Izirali yenni ale Juda nidoama a chim kaduk ate wa mariŋ. Ate wa jam a gisi nyemagsika, alege wa taam goanti a nya ziim nyinika. Wa jam a yaali ka wayɔrisima alege wa goanti wom nyiŋdomma kumsa.

8Ku ale toa a te ni, nama baai ale pai nuruba yie a gum yeeŋa po la ale pai tɛŋsa a gum tɛŋsa po la, ate ku ga paari diipo ate peelim an ŋman tali la, ate nidek ni nyiini bo tɛŋka po la.

9Naawen Dii Ale A Dɛ Tugurik Tɔŋdɔma Niŋ La a weeni kama ate mi a wom wa ayen, <<Chekki yie ŋaai ale zuak la ale kaasi, ate yie kpiema ŋaai ale nala tali la nuruba a kan bo ŋa po. 10Yinkiba pi kaduk tiisa ale te ka daam samɔniŋ yeŋ ate ŋanbie boorik a te ka ŋanbie taasi kpien nyiini.>>

11Ku ale toa ate nama baai ale a yiti saluik yokyok chali a vi daam la, ale nama baai nyiem ale bo daam nyuka po a ga paari yok diipo a buk la. 12Ba ta ka kpanta ale bagansa ale kayaksa ale paampuuŋta ale daam ba ŋandiinta tiŋŋa po, alege ba niŋ ka Naawen tuimaŋa po, ba ka zula a te wa nisa tuimaŋa. 13Dila nyiŋ, ba ale yik m nuruma a ta cheŋ tɛŋ yoŋ po, ba ale a silim miŋka la nyiŋ. Ba nuru baai ale ta kpaŋta la, ale kpi ale kom, ate nyanyuila ale ko ba nuru boanni. 14Dila nyiŋla, vɔrumu a basi kama ate bu koarisaŋa a zuak ate bu lak bu nɔnni nna yegayega. Ba kpaŋŋa ale nuru boanni ale siŋ bu po ale ba wɔkwɔk nyama ale baai ale a dɛ masim la meena. 15Dila nyiŋ nuru meena ale siŋ tɛŋ ate nurubiik ale zaab wadek, ate kanjanta nyam ale zaab badek. 16Alege Naawen Dii Ale A Dɛ Tugurik Tɔŋdɔma Niŋ La ale nya zak zaanka wa nyemagsika nyiŋ, ate tuilum Wenni ale sak wa tuilummu a ta va wa wayɔrisimaŋa nyiŋ. 17Ate piisa ale ŋɔbi wuyɔgsuk ase ka ŋa dɛka jigi la. Ate pabisa ale dɛ jigsirɔma ŋan kaasuŋta po.

18Ku ale toa a te baai ale pai pimpaasima miik a dari wabiok la, ale baai mɛ ale pai miik a dari gaasa la. 19A te baai ale a weeni ayen, <<Basi ate Wen a nye nwuli, basi ate wa tom wa tuini nwuli ate ti nya. Basi ate ku forisi a paari. Basi ate Waai Ale Welema A Bo Izirali La zɔŋŋa a jam, ate tama a seba.>>

20Ku ale toa a te baai ale a wi biem ayen nalim ale a wi nalim ayen biem la ale baai ale pai legi a chim bolim la, ate bolim a chim legi la ale baai ale pai ŋan tuasa a chim ŋan masa la, ate ŋan masa a chim ŋan tuasa la.

21Ku ale toa a te baai ale ta yam badek nimbie po la ale baai mɛ ale seba wie badek nina po la.

22Ku ale toa a te nuru baai ale so ale daam la, ale baai ale kperi ale daam damka la, 23baai ale a tuesi ŋanta a nyini baai ale tom kaasi la jigi a nyiem le basi ba la, alege a kan pai nyemagsika a te baai ale kan seba wari nɔi po la. 24Dila nyiŋla, ase bolim ŋiak ale a dɛ kinkaa ale wukosik diila, dila tɛŋ naŋsaŋa ale poak, ate viok ale ji wupuutaŋa a ta cheŋ ase nyuŋ la. Dii nyiŋla, ba zɛri Naawen Dii Ale A Dɛ Tugurik Tɔŋdɔma Niŋ La sinsaŋŋa kama, ale ŋman zɛri Waai Ale Welema A Bo Izirali La wanni. 25Dila nyiŋla, Naawen sui ale a puuri ale wa nuruma. Wa zak ka wa nisaŋa wen a yaa a nak ba a lɔnsi. Guutaŋa a choa kama ate baai ale kpi la a nye ase yaata ale doa suitaŋa po diila. Kula ŋaaŋnyiŋ meena, wa suipuurumu an basi ya, wa nisaŋa a diem bo ka ŋmai.

26Wa a zak ka tikti ayen tɛŋ sii ale yalima la a jam wa jigi, ale ŋman fiili fiiluk a wi baai ale bo tɛŋka kpeglimka la ayen ba jam. Ba abe sum jam kama, ba kpabi kama a jam nna a wuli. 27Ba waai an poom jiak ya, yaase wa nak naŋŋa. Ba wanyi mɛ an goa a jɔgsi ya yaase wa poom a goa ya. Ba waai chiak gbaŋ an foli a nyini wa chiaka po. Ba waai nuensiri an poom a kaasi ya. 28Ba timaŋa peemaŋa a choarisi kama, ate ba gbeeri ba timaŋa meena a magsi tɔŋka. Ba wusumaŋa naŋsabaŋa a pagra ase tintana la. Ba wusuma torokoma naŋsaŋa a nye ase ka va pagrik la. 29Ba wuurika a nye ase ka gbeŋli la, ba a wuuri ase ka gbeŋ paala la. Ŋa a ŋuuni kama ase ŋa ale yik jaab ate nuru karo a vari wa a basi la. 30Dai dila danni, ŋa ale wuuri ka zuk ase ka nyakpiemu wuurika la. Ate a waai a dan nya tɛŋka, wa ale nya ka legi ale namsika. Ate ba dan poom tɔti bolim, chiŋmaaŋa ale lik bu ate ku chim legi.

Currently Selected:

Azaya 5: BWU

Highlight

Copy