Azaya 2

1Amoz nidoabinni Azaya ale nya dii a ta va Juda ale Jerusalem zuk la ale nna. 2Dai kpeglimaŋa po, Naawen yenni guuku ale zaani ase naab la guutaŋa po. Ku ale yiti ŋmai a gaam guutaŋa, ate tɛŋsa meena ale chuiri a cheŋ ku jigi.

3Nuru boari ale jam a weeni ayen, <<Ni jam ate ti jueli Naawen guuku, ti jueli Jekob Wen yenni. Wa ale sak ti Wa suitaŋa ate ti baga a cheŋ ti po.>> Wa sinsaŋŋa ale nyini Zayon a cheŋ. Ate Naawen wanni ale nyini Jerusalem. 4Wa le bo tɛŋsa suŋsuŋ buusa. Wa le yik nuru boari wie a yomsi. Ba ale kuri ba gebisaŋa a nye niiga kua. Ba gbattaŋa ale labri a chim gebisa ate ba pai a yoarisi tiisa. Tɛŋ a kan pai gebik a ta chaab ale tɛŋ ka choa, yaase ba ŋman sak badek a magsi kpaliŋ diipo diipo.

5Jekob dɔkdemma abe jam ate ti cheŋ Naawen bolimu po.

6Fi zɛri fidek nuruma Jekob dɔkdemma kama. A nyini Kori geŋsa, ku kasim a sueri ale ka kperisa tuima. Ba a tom ka sampoporinni tuima ase Filistia demma la, ale a nak ba nisima ale baai ale kan seba Wen la. 7Ba tɛŋka a sueri ale ka kpana ale ligmɔniŋ. Ba tuilum ŋantaŋa a ka kpeglimka. Ba torokoma a ka kpeglimka. 8Ba tɛŋka a sueri ale ka bɔgta. Ba a koori ka tɛŋ a zuli ba nisima tuimaŋa, a zuli ba nandubsaŋa ale nye ŋan baai la. 9Dila Naawen ale te nuru siŋ tɛŋ ate nurubiik a zaab wadek. Kan vua a te ba.

10Ni cheŋ pinaŋa po, ni suk tɛŋka po a nyini Naawen kpazinagsuku po ale wa naamu nalimu po. 11Nuru waai ale a nya wadek nna se wa gaam nuruba la ale zaab wadek, ate kanjanta nyam ale siŋ tɛŋ. Ka Naawen nyiini ale za wa nya zakzaanika da dila danni.

12Naawen Dii Ale A Dɛ Tugurik Tɔŋdɔma Niŋ La a lueri ka dai a magsi kanjanta nyam ale kayeruk nyam ale zak badek a zaani la, ba meena ale zaab badek. 13Wa lueri ka dai a magsi Lebanon nyunyoŋtaŋa meena ale woŋŋa ale ta kayeruk la ale Basan kinkaŋpettaŋa meena. 14Guuk woŋta ale guuk tii ale jueli la meena ale 15yie ŋaai ale sɛ jueli wen la ale parik pagrik meena ale 16Tarsis ŋaaruŋ meena ale ŋaaruŋ naluŋ meena. 17Nurubiik kanjantaŋa ale siŋ tɛŋ ate nurubisa ale zaab badek ale ba kanjantaŋa. Ka Naawen nyiini ale za wa soa zakzaanika da dila danni. 18Ate bɔgta meena ale muriŋ bɛ.

19Nurubisa ale chali a jo pina vie ale tɛŋka vieŋa po, dii nyiŋla Naawen kpazinagsuk ale wa naamu nalimu nyiŋ. Wa ale yiti kama a choa tɛŋka. 20Da dila danni nuruba ale yuk ba bɔgtaŋa tii ate ba pai kpana ale ligmɔniŋ a nye ayen ba a puusi la a te ŋooma ale kpinkpirinsa. 21Ba ale yiti a jo vie pinaŋa po ale pina ŋaai ale yik wen a churinti la po, a nyini Naawen kpazinagsuk ale wa naamu nalimu nyiŋ, wa ale yiti kama a choa tɛŋka.

22Kan mariŋ nuru biiga, waai ale ta vuusum wa nyuevie po la, wa ka boa?

Currently Selected:

Azaya 2: BWU

Highlight

Copy