Azaya 16

1Ni ta pabisa a cheŋ a ga te waai ale a nya tɛŋka zuk la ase ni lampoo la. Ni nyini Sela a gaam gɔnni a ga paari Jerusalem. 2Moab nipooma ale bo Arnon benni la a nye ase ka nuinsa ale yiti nyini si tukta po ale masim ale poom zɛ si ale a cheŋ juijui la.

3<<Sak ti dii ale magsi ayen ti nye la, te ti popola. Basi ate fi yisuŋku a lik ti kantueŋ pagrik po. Suk nuruma kan pai baai ale suk la a da. 4Basi ate Moab demma a bo ale fu. Chim ba ligrɔ a nyini kaasirɔwa jigi.>> Namsidɔwa ale jam kpeglimka ate kaasuŋ a kan ŋman boro. Dachiaka ale bɛ tɛŋka po. 5Ŋmanteka po naam zukpaglik ale zaani. Wensie po nuru ale kali ka zuk, waai ale nyini ka Deevid yenni po la. Waai ale a bo buusa ale a gisi nyemagsika la ale kpabi ale wayɔrisima tuima.

6Ti wom Moab demma kanjantaŋa yegayega ale ba ale a poli ayen ba gaam nuruba la wari kama. Ba kanjantaŋa ale ba kuulimka meena ka koruk. 7Dila nyiŋ, Moab demma a gum ka chaab a boro kum a te ba tɛŋka. Ba kum a te ka dii ale nye Kir Yareset tɛŋka nidoama la. 8Yesbon tattaŋa a kɔ kama. Sibma tiisaŋa mɛ a kɔ. Tɛŋsaŋa niŋdeerɔma a tabi si a kaasi kama. Ba tiisaŋa nyiem ale jam a teeri a paari Jazer a cheŋ gɔnni po la. Si naŋbuli teeri nyini a cheŋ paari nyakpiemu. 9Ate mi a kum, ate Jazer mɛ a kum a te Sibma tiisaŋa. Yesbon ale Elealeya, mi a kum ale ninyaata a te ni. Ni ale magsi ayen ni nuem ale masim a magsi chaab ale ni tiisaŋa yɔnaŋa ale muni la ale ni ale che ni ŋankpaantaŋa la, ba la meena a kaasi kama. 10Masim ale suipeentik a ŋman ka tiisaŋa tɛŋka po. Waai a kan yi yiila a nuem kaduksaŋa po. Waai a kan ŋmiak daam jigini diila mi kpeglim nuemka kama. 11Mi kum m suinum po a te Moab ase ka kpanuŋ la ale a kum m ponni po a te Kir Yareset. 12Moab demma a dan cheŋ ba guuku zuk, ku a kan te ba maarika. Ba abe dan cheŋ ba puusika jigini, ku a kan ta wamaŋ a te ba.

13Wanni de ate Naawen a poom ŋaam a dɛ niŋ a weeni a magsi chaab ale Moab. 14Alege yɔgyɔgla de Naawen ale a weeni diila ale nna. <<Bena ŋata po, ba ale nye ase ka tomteerɔba ale bo ba kpagi nisima po diila. Ba nalimu ale ba nuruma a kan ŋman boro, ate baai ale za ba vuuk la a kan soa diiya, ate ba ale wobsa mɛ.>>

Currently Selected:

Azaya 16: BWU

Highlight

Copy