Azaya 15

1Naawen wa dii ale a magsi chaab ale Moab la. Ar ale bo Moab po la a kaasi kama, a kaasi kama yok yeŋ po. Kir ale bo Moab la a kaasi kama, a kaasi kama yok yeŋ po. 2Dibon demma a cheŋ ka ba puusika yenni ŋmani ayen ba kum. Moab a kum Nebo ale Medeba nyiŋ. Ba chiiri zuima meena ale che teeŋsa meena a basi. 3Suitaŋa po ba jo ka boorisa gatta. Ba bo ka ba yieŋa zuk ale peelim jigi meena a kum, ba poom lo duak ka tɛŋ a kum ba kumsaŋa. 4Yesbon ale Elealeya demma a kaari kama ate ba luelutaŋa a nyini peelim ate Jayaz a wom ba. Dila nyiŋla, Moab tugurik tɔŋdɔma a kaari kama ate ba kpaziita poom a nak.

5Mi a kum a te Moab a nyini ka m suinum po Moab nuruma a chali a cheŋ ka Zoar, ate ba gela a chali a cheŋ Eglat Selisiya. Ba poom cheŋ jueli a paari ka Luyit ale diem kum a cheŋ. Baai ale va Yoronaim suiku la, a kum kama a magsi chaab ale ba kaasuŋku. 6Nimrim nyaataŋa a kpeeri kama ate wuutaŋa a kɔ. Gɔnni ale tattaŋa po jaab a karo a sobri. 7Dila nyiŋ ba ŋantaŋa ate ba paari a tigsi ba la, ba ji ta cheŋ ka Niak Tiisaŋa Vooliŋka. 8Ba kumsaŋa a chɔgsi a paari Moab tɛŋka banaŋa. Ba kumsaŋa a paari Eglaim ale Beer Elim tɛŋsaŋa kama. 9Dimon tɛŋka nyaataŋa ka ziim, alege mi ale diem a ta namsika yega a jam Dimon zuk. A ta gbeŋli a jam Moab nuru baai ale chali la zuk ale baai ale tali bo tɛŋka po la.

Currently Selected:

Azaya 15: BWU

Highlight

Copy