Yosea 4

1Wom Naawen wanni, nama Izirali demma, dii nyiŋla Naawen a ta ka wari ale nama baai ale bo tɛŋka po la ayen, <<Wensie ale yaalika a karo. Wen miŋka a ka tɛŋka po. 2Ka kikaasa ale venta ale nuru koorik ale zum ale kaboŋsa nyeka nyiini ale boro. Ba ale weeni dii a dueni la, ba ŋman yik a kaasi ate nuruba a kasim a ko chaab. 3Dila nyiŋ tɛŋka a kum kama, ate baai meena ale bo ka po la a kpeeri a bɛ. Duŋsaŋa ale bo gɔnni po la nuinsaŋa ale bo vioku po la ale jumaŋa ale bo nyakpiemu po la a kpi.

4<<Alege kan te ate nuru a ta wari a jam, kan te nuru a weeni wa choa ayen wa kaasi ya diila ni nuruma a nye ase ka baai ale ta wie a jam kaabteerɔma zuk la. 5Fi a nak ka naŋsa kantueŋ ale yok, ate biisiteerɔma a nak naŋsa ale fu. Ate mi ale kaasi fi mawa. 6Miŋka ale a silim la nyiŋ ale soa ate mi nuruma a kaasi. <<Dii nyiŋla fi zɛri ka miŋka, mi mɛ zɛri fi kama ase m kaabteerɔba la. Dii nyiŋla fi zɛri fi Wenni sinsaŋŋa kama. Mi mɛ ale zɛri fi bisaŋa. 7Kaabteerɔma ale a piisi a soa diila, ba ale nye a kaasi mi la a piisi ka dila. Ba pai ba zulaŋa a tagri ka jabuui ale ta chivie. 8Ba a dɛ ka mi nuruma wabaataŋa ale a nya masim a nyini ba gaasaŋa po. 9Ate ba ale nye ase nuruba la ase kaabteerɔba la. M le namsi ba nɔi bayema ba suitaŋa nyiŋ abe m tuni ba, ba tuimaŋa nyiŋ.

10<<Ba ale dɛ alege ba kan chagi. Ba ale jo taabugni po alege ba kan piisi, dii nyiŋla ba zɛri Naawen kama ale pai badek 11a te taabugni ale da kpak ale da paalik kaai ale pai mi nuruma miŋka a 12ta a cheŋ. Ba a cheŋ ka diok bɔgluk jigi ate duok a tulisi ba. Taabugni chiik ale ta ba cheŋ a bɛ. Ba ka wensie ale ba Wenni. 13Ba a kaab ka pinaŋa ale a ju tiirita guutaŋa zuima a bo dapagrisa tiisa ale niak tiisa ale yɔgsum tiisa juijui ate yɔgsummu a masa la. Ate ni liema a pai badek a te taabugni ate ni sampooma a pai badek a te kaboŋsa tuima.

14<<Mi a kan namsi ni liema ase ba nin pai badek a te taabugni yaase ni sampooma ase ba nin nye kaboŋsa, dii nyiŋla nidoama dek ale cheŋ a paari taabuksaŋa ale a nye kaabka ale tangbana taabuksa. Nuru baai ale kan ta miŋka la ale kaasi.

15<<Izirali, fi nye ka kaboŋ, kan te Juda a nye foolaa. Kan cheŋ Gilgal. Kan cheŋ jueli Bet Aven. Kan pɛ, <Ase Naawen ale vua la.> 16Izirali demma turi a kpari kama nna se naab sari la. Naawen ale nye ka sɛ a nya ba zuk ase pabisa ale bo wuuk po la? 17Ɛfraim a ga gum ka bɔgta po. Basi ba! 18Ba daamu a dan poom yiinti, ba diem gum du kama a nye ba taabugni. Ba niŋdeerɔma a pai ka chivie suita a chim ba niŋ wari. 19Va pagrik ale vaari ba a basi, ate ba kaabka ale ta chivie a jam te ba.

Currently Selected:

Yosea 4: BWU

Highlight

Copy

Compare