Yosea 2

1Mi nuruma, ni weeni ni suataŋa ale ni tuama wie. Waai ate mi a yaali la ayen, 2<<Ni toariŋ ni mawa, ni toariŋ wa dii nyiŋla wa daa mi powa, ate mi an chim wa chorɔ. Te ate wa yeeri kaboŋ nyaasimu wa nimbidiaka po ale a ka wensie a nyini wa biisaŋa suŋsuŋ. 3Dan kan daa di m le yeeri wa kɔlima a basi ate wa za chaboala, ate jaab a kan bo wa nyiŋ po ase dai dii danni ate ba biak wa la. M le nye wa ase ka gɔi la. M le nye ate ka chim tɛŋ kosik a yaa pai nyanyuila a ko ka. 4M kan sak m yaalika ale ka bisaŋa, dii nyiŋla ba ka kaboŋsa bisa. 5Ba mawa a ka wensie a yaa yik ba puusaŋa ale chivie. Wa weeni kama ayen, <M le cheŋ a vi baai ale a yaali mu la ŋaaŋ, bala ale baai ale a te mu ŋandiinta ale nyiam ale duŋ kɔbta ale garuk ale kpaam ale daam.> 6Dila nyiŋ m le pai muŋsa a lik wa suiku. M le sɛ parik a lik wa ate wa kan nya suik a va nyini. 7Wa a chali a vi baai ate wa a yaali la alege wa a kan paari ba. Wa ale gisi ba alege wa a kan nya ba. Wa yaa le weeni ayen, <M le ŋman cheŋ m chorɔwa jigi ase piilimka la, dii nyiŋla m jam zunchoŋ kama a gaam yɔgyɔgla de. 8Wa an jam miŋ ayen ka mi ale jam te wa ŋan bie ale da paalik ale kpaam ale pai kpana ale ligmɔniŋ nna yegayega a te wa ate ba pai nye te Baal bɔglukku.

9<<Dila nyiŋ, m le pai m ŋan bieŋa ase ŋa nin bɛ ale m da paalika ase bu nin magsi nyuka. M le pai m duŋsa kɔbtaŋa ale m garukku ate m za m pai a lik wa chaboalaŋa la. 10Ate yɔgyɔgla de, m le nye ate wa zaani ale chaboala baai ale a yaali wa la niŋ. Waai a kan tuesi wa a nyini Mi nisa po. 11M le gebi wa bein bein tiŋŋa ale wa Chi Paalisaŋa ale wa Vuusum daaŋa ale tik ŋaai meena ate wa lueri la a basi. 12M le kaasi wa tiisaŋa ale kinkaŋsaŋa, ate wa weeni ayen ka wa tutuna a nyini baai ale a yaali wa la jigi. M le nye ate si chim tiuk ate gɔi duŋsa a kaasi si. 13M le namsi wa da ŋaai ate wa pai ju ŋan nyuntisa a te Baal bɔgtaŋa la. Wa pai ka nifelima ale sotta a gomsi wadek ale cheŋ a vi baai ale a yaali wa la alege baŋ Mi.>> Naawen ale weeni.

14<<Dila nyiŋ yɔgyɔgla de m nye ate wa nala. M le ta wa a cheŋ gɔnni po a biisi biik sɔŋ ale wa. 15Dula ate m le ŋman pai wa kaduksaŋa a te wa, abe m nye ate Achor Viaka a chim yiila tuok. Dula wa ale yi yiila ase diipo ate wa jam paala la ale da dii dai ate wa jam nyini Ejipiti la.#2:15 Achor kiri ale daanika.

16Naawen a weeni kama ayen, <<Dai dila danni, fi ale wi Mi ayen, <mi chora.> Fi a kan ŋman wi Mi ayen, <mi kpagi ya.> 17M le yeeri Baal bɔgtaŋa yueŋa a nyini wa nɔi po. Ba kan ŋman wi ti yueŋa. 18Dai dila danni Mi ale nye nɔiyeŋ a te ba ale duŋsaŋa ale bo gɔnni po la ale nuinsaŋa ale bo vioku po la ale ŋan baai ale a cheŋ tɛŋka zuk la. M le nye ate tom ale gebik woŋ ale kpaliŋ a kan bo tɛŋka zuwa, ate waai meena a duak nalimnyiini. 19M le puulim fu a te m dek taam wuu. M le puulim fu wayɔrisima ale nyemagsika ale ŋmanteka ale jiirim a basi m po. 20M le puulim fu ale wensie, ate fi ale miŋ Naawen.

21Naawen weeni ayen, <<Dai dila danni m le tulisi. M le tulisi a te wenzukku ate ba ale tulisi a te tɛŋzuk de. 22Ate tɛŋzuk de ale tulisi a te ŋan bieŋa ale da paalika ale kpaamu, ate ba ale tulisi a te Jezreel. 23M le vuk wa a te M dek tɛŋka po. M le sak m yaalika ale waai ate m jam wi ayen, <Wa daa waai ate mi a yaali la.> M le weeni baai ate m jam a wi ba ayen, <Ni daa nuru baai ate mi a yaali la> ayen, <Ni ka Mi nuruba.> Ate ba ale weeni ayen, <Fi ka m Wen.> >>

Currently Selected:

Yosea 2: BWU

Highlight

Copy

Compare