Yosea 12

1Ɛfraim a dɛ ka vioku. Wa a vi ka kori geŋsa vioku danni meena ale te ate venta ale wɔkwɔk a kasim a piisi. Wa a nye nɔiyeŋ ale Assiria ale a tom kpaam a te Ejipiti. 2Naawen a ta ka wari a cheena Juda zuk. Wa ale namsi Jekob a magsi chaab ale wa suitaŋa abe wa ŋman tuni wa a magsi chaab ale wa tuimaŋa. 3Wa mawa luikku po ate wa jam yik wa suoku naŋ kpai. Ase nuru la wa jam jɛ ale ka Wen. 4Wa jam jɛ ale maarɔwa kama a nya nak dɛka wa zuk. Wa jam kum kama a saalim wa a yaali wa ŋmantiika. Wa jam ga nya wa ka Betel a biisi ale wa dula. 5Naawen, Wen Dii Ale A Dɛ Tugurik Tɔŋdɔma Niŋ La, Naawen ale wa yuenni ate waai meena a seba! 6Alege fi magsi kama ayen fi ŋman cheŋ fi Wenni jigi. Kasim ta yaalika ale nyemagsika abe fi kasim a limisi fi Wenni.

7Geruŋdɔwa a ka wensie ŋanmagsinta. Wa a yaali ka dɛ gaamka. 8Ɛfraim a kuulim kama ayen, <<Mi jigsi kama nna yegayega. M yaa chim ka jigsirɔ. Ale m jigsika meena ba kan nya nye kaasuŋ yaase wabiok mi jigi ya.>>

9<<Mi ale Naawen fi Wenni, dii ale ta fu nyini Ejipiti po la. M le nye ate fi ŋman bo viita po ase ni tiŋŋa daaŋa ale jam ka diila. 10Mi weeni m biisiteerɔma kama ale te ba gɔdaasima yega ale va ŋa nyiŋ a weeni wamagsima.>>

11Gilead a ta ka gaasa? Ka nuruma a ka kiri ya! Ba a kaab ka lalisa Gilgal po? Ba kuŋkuŋtaŋa ale nye ase ka tain puula ale bo kaduk po diila. 12Jekob a jam chali cheŋ ka Araam tɛŋka. Izirali a jam tom kama a nya nipok a faari, wa jam a nya ka piisa zuk a tuni wa nyiŋ. 13Naawen a jam pai ka biisiteerɔ a ta Izirali a nyini Ejipiti, wa jam va ka biisiteerɔ zuk a nya ba zuk. 14Alege Ɛfraim a nye kama ate wa sui a puuri nna tuatuaga. Wa nuruma ko ka nyiŋ wa Nyɔnɔwa ale basi ate foolaa a bo wa zuk abe wa ŋman tuni wa, wa ale kan zuli wa la nyiŋ.

Currently Selected:

Yosea 12: BWU

Highlight

Copy

Compare