Yosea 11

1<<Ase Izirali ale jam ka biik la, mi jam yaali wa kama, a nyini Ejipiti po ate mi jam wi mi nidoabinni. 2Alege mi ale a wi Izirali a soa diila, dila dek ate ba cheŋ a yalima ale mi. Ba jam nye ka kaabka a te Baal bɔgtaŋa ale jam a ju ŋan baai nyum ale masa la a te ŋan mɛɛnta. 3Ka mi ale jam a sak Ɛfraim chelim ale pai ba ale m nisa, alege ba an miŋ ya, be jam ka mi ale jam tebi ba. 4Mi ale jam dɛ ba niŋ ale jiirim ale yaalika miik. Mi ale jam yeeri niiga diokku ba ŋieŋa zuk a ju ku a pai dik ŋandiinta a te ba.

5Ba a kan ŋman cheŋ Ejipiti, Assiria a kan nya ba zuwa, ba ale zɛri ayen ba kan tagri la nyiŋŋa? 6Gebisa ale lo ba tɛŋ kpieŋsaŋa po, a kaasi ba nansuiŋta chibsaŋa a ta ba ale a poli ayen ba nye diila a jam kpeglimka. 7Mi nuruma a poli kama ayen ba basi mi. Ba dan poom wi Wen Dii Ale Bo Wenŋmazuk La, wa kan zak ba a zaani.

8<<Ɛfraim, mi ale nye ka sɛ a pai ni a te? Izirali, mi ale nye ka sɛ a pai ni a te? Mi ale nye ka sɛ a nye ni ase Adma la? Mi ale nye ka sɛ a nye ni ase Zeboiim la? Mi suinummu a tagri kama m po. M jiirimu a yiti kama nna yegayega ni zuk. 9M kan pai m suipuurumu a nyini peelimmoa yaase m kaasi Ɛfraim. Diila mi ka Wen, alege daa nuru biiga. M ka Waai Ale Welema La a bo ale ni. M kan jam ale suipuurummoa. 10Ba ale va Naawen ŋaaŋ. Wa ale kaari ase gbeŋli la. Ase wa dan kaari, wa bisaŋa ale nyini yeniŋ geŋsa a jam ale nyiŋ gɔkka. 11Ba ale jam ate ba nyiŋsa a gɔk ase nuinsa ale nyini Ejipiti la ale nangbaŋsa ale nyini Assiria la. M le te ate ba bo ba yieŋa po.>> Ka Naawen ale weeni.

12Ɛfraim a gilim mi ale ka venta, ate Izirali yenni ale paasika. Juda a ta ka chaab ale Wen, wa poom ta ka chaab ale wensie nyɔnɔwa Waai Ale Welema La.

Currently Selected:

Yosea 11: BWU

Highlight

Copy

Compare