Yabakkuk 2

1Mi ale jueli ka gboŋ a za ase limisidɔ la a limisi ate m nya Naawen ale wa weeni mu diila ale wa le wa tulisi m funfɔblaŋa diila.

2Naawen yaa tulisi mi a weeni ayen, <<Ŋmarisi dii ate fi nya la dueni. Ŋmarisi cheri a dueni tintain paglak nyiŋ ate waai dek ale a karim la a chali ga weeni ba gela. 3Ku an diem paari diipo ate wanni ale chim wensie la, alege ku cheena ate wanni a chim wensie. Ku a nye ase ku a beni kama la, alege yik fidek a limisi, dii nyiŋla ku le sum jam, ku kan beni.

4<<Kanjanta nyɔnɔ nyeelaŋa an nala alege wayɔrisima nyɔnɔwa a vuuk kama wa siaka nyiŋ. 5Daam ale baga a paasi nuru la, wabaata nyama a kan benni, diila ba a yaali ŋanta ase ka vɔrup ale a yaali kum diila, kum abe kasim a yaali ka kpieba yega. Ba tigsi tɛŋsaŋa meena nuruma a ta jam jigi yeŋ a ta ba.

6<<Alege tɛŋ sii meena ate Kaldiya a basi ate ko jo ba nyiŋla ale cheem la ba. Ba le nye ba a la abe ba a weeni ayen ku le bie te baai ale a zu ŋanta yegayega la. Tɛŋ kala demma ate ba jigsi a paari ka dimpo a fɛ nuruba ayen ba a tuni ba? 7Dai yeŋ nuru baai ate ni a tuesi ligra ba jigi la ale tulim ta chaab ale ni. Ba le miŋ dii meena ale a nye la a basi ate yɔgsum yik ni ate ni nyiŋsa a gɔk. Ate ba yaa tuesi jaab meena ate ni ta la. 8Ni be le zu tɛŋsa yegayega la, baai ale tali la ale tuesi yegayega ni jigi. Dii nyiŋla ni ko nuruba yega a kaasi tɛŋ kpieŋsa ale nuru baai meena ale bo si po la.

9<<Ku le ku bie dii ale tɛŋ kaai ale va biem nyiŋ a jigsi la, ale a poli ayen ba le bo kauk kuui ate ba nyini biem po la. 10Ni be le a zɔk ayen ni ko nuruba yega la ni nye kama ate chivie a yik nidek dɔkdemma. Dila nyiŋ ni le jɔk ni nyuvooŋa. 11Saasaŋa tintanaŋa ale kaari a weeni ayen ni an nye magsi ya, da pilintaŋa ale siak ayen ni nye kaasi kama.

12<<Tɛŋ kaai ale a ko nuruba ayen ba va dila nyiŋ a sɛ ba tɛŋka la, ku le bie ba jigi, ale nye nuru yonta a kaasi, ayen ba piilim ba tɛŋka la. 13Naawen dii ale ka Tugurik Tɔŋdɔma Niŋdeerɔ ale basi ate bolim jam kaasi ba le se ŋan baai meena la, ate ba tuimaŋa meena a chim kinla. 14Ate nya kpiem ale taari lik dua ate ba a nya diila, nuruba ale bo jigi meena la ale nya Naawen zulaŋa ale wa nalimu.

15<<Tɛŋ kaai nuruba ale a basi ate ba chaab a nyu daam a buk la ku le bie ba jigi, a kasim a kpiiri bu daam yuini po a te ate ba ga buk ate ba yaa a nya ba chaboala la. 16Nama Kaldiya demma chivie ale yik ni chekki, ni kan nya zula. Ku tulim jam kama ayen nama mɛ nyu buk lo tɛŋ ase da bugrik la. Suipuurum beerika ale bo Naawen juga nisa po la cheen ni jigi. Ni le tuesi chivie, daa zula. 17Ni te ti ku jo nuruba nyiŋ Lebanon po, alege yɔgyɔgla de ku le jo nama mɛ nyiŋ. Ni che tiisaŋa meena ale ko duŋsa yegayega dula, yɔgyɔgla de yɔgsum le yik ni dii ate ni nye tɛŋ kala ale ka tɛŋ kpieŋsaŋa, ale nuruma ale bo si po la.

18<<Bɔgluk a kan nye wamaŋa, diila nurubiik ale nye ku, ku ka jameem buui ale a sak venta. Waai ale nye ku la a ta sebchakka kama ayen wadek tuini maari wa, alege wa a nye ka bɔgluk tii ale kan poom a biisi. 19Waai ale a weeni bɔgluk ate ba nye ale diok la, ayen vari mu a basi la, ku le bie wa jigi. Waai ale a weeni tintain ayen yiti ŋmai la, ku le bie wa jigi. Di an baga a weeni fi le fi nye dii ya. Ka jaab kama ate ba pai ligmɔniŋ ale kpana nye lik ku nyiŋka, nyuvuri ka ku po. 20Naawen a bo ka wa yenni po, tɛŋka nuruma meena nye diki wa niŋ.>>

Currently Selected:

Yabakkuk 2: BWU

Highlight

Copy

Compare