Yabakkuk 1
1
1Wa dii ate Naawen a pai sak wa biisiteerɔwa Yabakkuk la, 2Naawen, mi ale saalim fi soa ka sɛ a weeni ayen fi maari ti alege ate fi yaa wom? Ku le beni ka sɛ alege ate fi vari ti gaasaŋa dɛ po basi? 3Ka boa ale soa ate fi basi ate mi a nya daanika de meena? Ka boa ale soa ate fi a nya nye kaasika de meena? Kaasuŋ ale gaasa ale kasim gilim mu, ate kpaliŋ ale nanpaga kasim bo jigi meena. 4Sinsaŋŋa ŋman ka kiriya, ŋa kan ŋma tomu, wensie tuima ka. Nuru baataŋa a goanti a nya badek alege nuru maŋsaŋa a lo ate boteerɔma kan bo buusa a magsi.
5Ate Naawen yaa weeni wa nuruma ayen, <<Ni a nya tɛŋ kpieŋsaŋa ale gilim ni la. Ni le a nya diila le cha ni. M le za m nye diila ni kan siagi ase ni nin poom wom. 6Kaldiya demma baai nyeka ale toa nna yegayega la, m le te ba pagrim. Ba gɔk ka santiri a diak a nak tɛŋ kpieŋsa ale tɛŋ fiisa a cheŋ. 7Ba kasim a nyigsi ka nuruba. Ba a nyeka ba le a yaali diila. Ba le ba kanjantaŋa ba chim nuru maŋsa te ka badek. 8Ba wusumaŋa a korisi gaam yɔŋma ate ŋa nyeka mɛ toa ase kom ale ta piina la. Ba wusum duerisaŋa nyiem deri jam diiri kama. Ba nyini ka niŋniŋŋa. Ba nyiem jam diiri kama ase jiiruk ale diiri jaab diila. 9Ba meena jam ka kpaliŋ. Jaab karo a kasi ba. Ba ligrɔma a piisi ase ka tintain busuŋ la. 10Ba a la nalima kama ale a nye kpaga a la. Ba a la tɛŋ sii meena ale ta pari pagrisa a gilim ba la Kama. Ba nyiem dueni ka tanta a jueli paari noawaaŋa a jo yik ba. 11Ate ba yaa boro ase viok la a cheŋ. Nuru ba tii ale a zuli badek pagrim la.>>
12Naawen yaa, fi ka Naawen a nyini piilimka po meena. Fi ka m Wen, a Welema ale ka kpeglimka. Ti kan kpi. Naawen yaa m ligrɔ, fi ale lueri Kaldiya demma a te ba pagrim ayen ba namsi ti. 13Fi be welema ka yega ale biem nyaka. Fi kan baga a nya baai ale tom a kaasi la. Dila nyiŋ fi le nye ka sɛ a nye ale biem nyama? Fi le nye ka sɛ sina ate ba a ko baai ale diem chim nuru maŋsa a gaam ba la? 14Fi a nye nuruba nna se ka jumaŋa ale bo nyiamu po la, nna se ŋan baai ale bo nyiam po a ka niŋdeerɔ la. 15Kaldiya demma a yik nuruba ale ka goatisa ase juma la. A yaa dari ale ba ŋmaasaŋa ale a kaari ale suipeentik ba le yik la. 16Ba poom a zuli ba ŋmaasaŋa kama ale a kaab si, si ale a te ba dii meena ate ba a yaali la. 17Ba le kasim pai ba gebisaŋa a kaasi tɛŋsaŋa kama a cheŋ alege kan sak jiirimmoa?
Currently Selected:
Yabakkuk 1: BWU
Highlight
Copy
Compare
Share
Want to have your highlights saved across all your devices? Sign up or sign in
© 2023, Ghana Institute of Linguistics, Literacy and Bible Translation
