Piilimka 42

1Ase Jekob ale ga wom ayen ŋandiinta a bo Ejipiti la, wa yaa weeni wa nidoabilisaŋa ayen, <<Ka boa ate ni zak a nya chaaba?>> 2Wa yaa weeni gum du ayen, <<Mi wom kama ayen ŋandiinta a bo Ejipiti. Ni siŋ dula a ga da ŋandiinta a ta jam, ate ti kan kpi abe ti vuuk.>>

3Josefi suata pi yaa cheŋ ayen ba da ŋandiinta Ejipiti. 4Alege Jekob ale jam tom mbala la, Josefi suoku Benjamin an jam maa gum du, dii nyiŋla wa jam a yɔgsa kama ayen wari ale nye wa. 5Dila la Izirali nidoabilisaŋa a jam gum ka baai ale cheŋ ayen ba da ŋandiinta la po, diila kɔmmu a jam bo Keenan tɛŋka po mɛ kama.

6Yɔgyɔgla de Josefi ale jam chim tɛŋka kpagi, waai ale jam da ŋandiintaŋa a te nuruba la, ase Josefi suataŋa ale ga paari la ba yaa koori tɛŋ wa niŋ. 7Josefi ale deri ga nya wa suataŋa la wa yaa miŋ ba? Alege wa yaa potim seba ale nye wadek ase nichaanɔ la a biisi ba a kaasi. Wa jam bek ba kama ayen, <<Nama nyini ka be?>> Ate ba tulisi ayen, <<Ti nyini ka Keenan tɛŋka ayen ti da ŋandiinta.>>

8Josefi a jam miŋ wa suataŋa kama alege ba an jam miŋ wa. 9Ate wa yaa teeri wa le jam gɔdaasim ba wie diila a yaa weeni ba ayen, <<Ni ka kpesi nyaarɔba. Ni jam ni nya ka ti tɛŋka wobsim jigi.>>

10Ate ba yaa tulisi ayen, <<Aaya, m nyɔnɔ. Fi tomteerɔma a jam ba da ka ŋandiinta. 11Ti meena ka nuru yeŋ bisa. Fi tomteerɔma ka nuru maŋsa ba daa kpesi nyaarɔba.>>

12Wa yaa weeni ba ayen, <<Aaya, ni jam ni nya ka ti tɛŋka wobsim jigi.

13Alege ba tulisi ayen, <<Fi tomteerɔma a jam ka suata pi ale baye, nuru yeŋ bisa waai ale bo Keenan tɛŋka po la. Baaŋka a bo ale ka ti kowa, ate wanyi a karo.>>

14Josefi yaa weeni ba ayen, <<Ase mi ale weeni ni diila, ni ka kpesi nyaarɔba. 15M le m nye ni diila ale nna. Faaro ale vua la, ni kan basi dela jigini nin ka nama ale ta ni yoa baaŋka a nin jam dela. 16Ni tom ni po wanyi ate wa ga ta ni suoku a jam. Ni meena ale jo ka likka dɔkku po ate ti kpesi a nya ni wieŋa ase ni a biisi wensie ya. Ni dan kaa biisi wensie, ase Faaro ale diem vua la ni ka kpesi nyaarɔba.>> 17Ate wa yaa lik ba meena daa ŋata.

18Daa ŋatawa danni, Josefi yaa weeni ba ayen, <<Ni nye nnala ate ni boro, ale mi a chali Wen kama. 19Ni dan ka wensie nuruba, ni basi ate ni suataŋa wanyi a bo likka dɔkku po dela, alege ate ni meena cheŋ a ga ta ŋandiinta a ga te ni yenni demma meena ale a viiri la. 20Alege ku a fɛ ni ta ni yoa baaŋka a jam te mi, ate ni ale a weeni diila a chim wensie ate ni kan kpi.>> Ba yaa cheŋ a ga nye kude.

21Ba yaa weeni chaab ayen, <<Chekki ba a namsi ti ka ti suoku nyiŋ. Ti nya ku ale jam a daani wa dii ate wa a saalim ti wa nyuvunni nyiŋla kama, alege ti an wom ya dila ale soa ate namsika de a jam ti jigi.>>

22Ate Aruben yaa tulisi ayen, <<Mi an weeni ni ayen ni kan tom a kaasi nidoabilika? Alege ni an jam a wom ya. Yɔgyɔgla de ku a fɛ ate ti tuni wa ziimu nyiŋ.>> 23Ba an jam a miŋ ayen Josefi a miŋ ba ale a weeni diila kiri ya. Wa le jam basi ate waai tulisi a te wa la nyiŋ.

24Wa yaa viriŋ nakpiak alege ba a piilim a kum, ale ŋman a biisi ale ba. Wa yaa basi ate ba yik Simeyon a ta nyini a bobi wa ba nimbie po.

25Josefi yaa weeni ayen ba nye ŋandiinta a nyo ba boorisaŋa po, abe ba pai waai meena ligra a nyo wa boorik po, abe ba te ba ŋanta a magsi ba chelim. Ba le jam nye dila a te ba la ŋaaŋnyiŋ, 26ba yaa jam pai ba ŋandiintaŋa a vi ba bonsaŋa zuk a cheŋ.

27Ba le zaani juijui yokku la, ba po wanyi yaa foli wa boorik ayen wa nye ŋandiinta a te wa bonika, wa yaa jam nya wa kpanaŋa wa boorika po. 28Wa yaa weeni wa suataŋa ayen, <<Ba pilim pai m kpanaŋa a te mu kama, ŋa ale nna m boorika po.>> Ba kpaziita yaa nak, ate ba cheem nya chaab ate ba nyiŋsa a gɔk, ate ba weeni ayen, <<Ka boa ale nna ate Wen nye ti?>>

29Ba le jam ba kowa Jekob jigi Keenan tɛŋka po la, ba yaa weeni wa dii meena ale jam nye ba la. Ba weeni ayen, 30<<Nuru waai ale a nya tɛŋka zuk la a jam biisi ti a kaasi kama, a nye ti ase ka baai ale jam ayen ba kpesi nya tɛŋka la. 31Alege ate ti weeni wa ayen, <Ti ka nuru maŋsa ti daa kpesi nyaarɔba. 32Ti ka suata pi ale baye a chim nuru yeŋ bisa, wanyi a karo ate baaŋka ale kowa a bo Keenan.>

33<<Ate nuru waai ale soa tɛŋka a nya la yaa weeni ti ayen, <Kude ale basi ate m miŋ ase ni ka wensie nuruba ya. Ni basi ni suataŋa wanyi dela ale mu abe ni ta ŋandiinta a ga te ni yeri dem baai ale a viiri la. 34Alege ni ta ni yoa baaŋka a jam te mu ate m le seba ayen ni daa kpesi nyaarɔba, alege ni ka wensie nuruba. Ate mi yaa le ŋman pai ni suoku a te ni, ate ni le baga a gerim tɛŋka po.>>>

35Ase ba ale jam boro a kpiiri ba ŋantaŋa boorisaŋa po la, waai meena a jam nya wa kpana fook wa boorik po kama. Ba ale ba kowa ale jam nya ligra foataŋa la, ate ba nyiŋsa yaa jaa gɔk. 36Ba kowa Jekob yaa weeni ba ayen, <<Ni basi kama ate mi an paari m bisaŋa. Josefi a karo ate Simeyon mɛ a ŋman karo, ate yɔgyɔgla de ni a yaa ayen ni pai Benjamin. Jaab meena a ta chaab ale mu kama.>>

37Ate Aruben yaa weeni wa kowa ayen, <<Fi baga a ko m bisa bayewa kama ase m nin kan ta wa a jam a te fu. Pai wa a nyo mi nisa po ate m le pilim ta wa jam te fu.>>

38Alege Jekob a weeni ayen, <<M biika a kan va fu a siŋ dula wa suoku a kpi kama wa la nyiini ale tali. Ase wari a dan nye wa suiku po, fi ale gu mi zu peelukku nyɔnɔ ale niniga.

Currently Selected:

Piilimka 42: BWU

Highlight

Compare

Copy