Piilimka 41

1Bena ŋaye ale taam la, Faaro yaa gɔdaasim. Wa jam za ka Nile benni nɔi, 2ate niiga ŋayopɔi yaa nyini benni po a nyaksi ale biigi, ate ŋa yaa bo wuuku po a dɛ. 3Ŋala ŋaaŋnyiŋ niiga ŋayopɔi a buk a lɔrima a nyini Nile benni po a jueli za naa ŋaai ale za beni nɔi la gauŋ. 4Ate naa ŋaai ale buk a lɔrima la, a nɛ niiga ŋayopɔi ŋaai ale a nyaksi ale biigi la. Ate Faaro yaa yiti wa gɔdaasimaŋa po.

5Wa jam a lo ka goom po a gɔdaasim a nye buye. Wa gɔdaasimaŋa po wa yaa nya chɔlomben a pɛ chɔlombena ŋayopɔi ate ŋa nyiŋsa a pagra ale nala. 6Ŋan maŋsaŋa ale nye nueri la, ŋan jetisa ŋayopɔi a pusi nyini a nye ase viok tuilik ale wobri ŋa la. 7Chɔlomben ŋaai ale jeta la a yaa nɛ chɔlomben ŋaai ale a nyaksi ale biigi la, ate Faaro yaa yiti wa gɔdaasimaŋa po.

8Ku saluiku wa popola yaa ta wa a daani, ate wa tom wi sampoporisaŋa ale yam nyama meena Ejipiti tɛŋka po. Faaro yaa weeni ba wa gɔdaasimaŋa alege waai a karo a weeni ŋa kiri a sak wa.

9Ate daam teerɔ kpagni yaa weeni Faaro ayen, <<Jinla m teeri m kaasuŋku. 10Faaro sui yaa jam puuri ale wa tomteerɔma, ate wa yaa jam yik mi a lik ale boroborok seerɔma kpagni limisidɔma kpagni yenni po. 11Ti meena a jam gɔdaasim kama yok yeŋ po, ate gɔdaasimaŋa meena a ta ŋa kiri. 12Ate Yiburu bi paalik a yaa jam bo dula ale ti, limisidɔma kpagni tomteerɔ. Ti weeni wa ti gɔdaasimaŋa ate wa weeni ŋa kiri a sak ti. 13Ate wie a sum tulim nye a magsi chaab ale wa ale weeni ti diila. Mi ŋman pilim nya m kpaŋtaŋa kama, ate nuru nwala ba pai wa a yik tiib nyiŋ.>>

14Ate Faaro yaa tom wi Josefi, ate ba ta wa nyini likka dɔkku po a nyini nwuli. Ba ale poni wa zukku ale tagri wa kɔlimaŋa la, wa yaa jam Faaro niŋ.

15Faaro yaa weeni Josefi ayen, <<M gɔdaasim kama ate waai an baga a weeni mu ŋa kiri ya. Alege mi wom kama ale ba weeni ayen, fi dan wom fi baga a weeni ŋa kiri kama.>>

16Josefi yaa tulisi Faaro ayen, <<Mi an baga a nye, alege Wen ale te Faaro weeni ŋaai ate wa a yaali la.>>

17Ate Faaro yaa weeni Josefi ayen, <<M gɔdaasimaŋa po m jam za ka Nile benni nɔi, 18Ate niiga ŋayopɔi a nyini benni po a jueli a biigi ale a nyaksi a bo wuutaŋa po a dɛ. 19Ŋala ŋaaŋnyiŋ, niiga gela ŋayopɔi ate ŋa jeta ale lɔrima ale buk. Mi an diem nya naa buloatila Ejipiti tɛŋka meena po. 20Naa ŋaai ale bugi a lɔrima la a yaa nɛ niiga ŋayopɔiwa ale biigi a nyini benni po a jueli la. 21Alege ŋa le poom a nɛ ŋa a nueri la, waai an baga a weeni ayen ŋa nɛ jaaboa. Ŋa lɔrima ase ka ŋa le poom ka diila. Ate mi yaa yiti.

22<<M gɔdaasimaŋa po mi ŋman nya ka chɔlombena ŋayopɔi a sueri ale nala a bo kinka yeŋ nyiŋ a chim. 23Ŋala ŋaaŋnyiŋ chɔlombena ŋayopɔi yaa pusi ŋala nyiŋ a kɔ a jeta ate kori vioku a fuk ŋa a kaasi. 24Chɔlomben ŋaai ale jeta la a yaa nɛ chɔlombena ŋayopɔi ŋaai ale nala la. Mi weeni nya kude a sak sampoporisaŋa alege ba waai an baga a tɔk ku kiri a sak mu.>>

25Ate Josefi yaa weeni Faaro ayen, <<Gɔdaasimaŋa meena ka bunyi. Wen a pai sak Faaro wa le za wa nye diila kama. 26Naa naliŋsa ŋayopɔiwa kiri ale bena ŋayopɔi, chɔlombena ŋayopɔiwa kiri ale bena ŋayopɔi. Gɔdaasimaŋa meena ka bunyi. 27Niiga ŋayopɔi ŋaai ale bugi a lɔrima la ale jam ŋaaŋ nyiŋla ka bena ŋayopɔi, ku ka dila mɛ ale chɔlombena ŋayopɔi ŋaai ate kori vioku a fuk ŋa a kaasi la. Ku a magsi ka chaab ale bena ŋayopɔi kɔm.

28<<Ku ka dii dek ate m weeni sak Faaro la. Wen a sak wa le boro a yaali wa nye diila kama. 29Bena ŋayopɔi ŋandiinta yegayega ale jam Ejipiti tɛŋka po, 30alege bena ŋayopɔi kɔm ale pai saŋ. Ate ba le baŋ ŋandiinta yegayega wari Ejipiti tɛŋka po, ate kɔm ale bo tɛŋka po. 31Ate ba kan teeri ŋandiinta yegayega wari tɛŋka po, dii nyiŋla kɔmmu ale paasaŋ la ale pagra yegayega. 32Kude a za ku sum a nye kama dii nyiŋla Wen a te fu wanni de ka gɔdaasima buye po.

33<<Basi ate naawa a nya nuru waai ale ta yam ale a miŋ wie ate wa a nya Ejipiti tɛŋka zuk. 34Basi ate Faaro lueri kpaga tɛŋka po ate ba lab ŋandiinta yegayega ku naŋtuok nɔi bunu Ejipiti po a pai bunyi a dueni. 35Ba tuesi ŋandiintaŋa meena ben maŋsaŋa de po ale cheen la, naawa pagrim nyiŋ ba tigsi kpari ŋantaŋa a dueni tɛŋ kpieŋka po a nya ŋa zuk. 36Ŋandiintaŋa de ni tali ŋa a zaani tɛŋka po ate ni jam pai de bena ŋayopɔiwa po ate kɔm a cheen Ejipiti po la, ate kɔm kan kaasi tɛŋka.>>

37Popolaŋa a jam nala kama a te Faaro ale wa kpaŋŋa meena. 38Ate Faaro yaa bek ba ayen, <<Ti baga a nya waai ase nuruwa dela, waai ate Wen Chiika a bo wa po la?>>

39Ate Faaro yaa weeni Josefi ayen, <<Ase Wen ale basi ate fi seba kude meena la, waai a karo a miŋ wie ale ta yam ase fi la. 40Fi ale fi a nya m nayenni zuk, ate fi ale a weeni diila m nuruma meena a siak a te fu. Ka m naamu zukpaglika zuk nyiini ate m le gaam fu.

41Dila Faaro yaa weeni Josefi ayen, <<M pai Ejipiti tɛŋka meena a nyo fi nisa po.>> 42Faaro yaa yeeri wa nifelinni wa nandummu nyiŋ a su Josefi nandummu nyiŋ. Wa yaa pai koaliŋ naliŋsa a jo wa ale pai ligmɔniŋ chɔrinni a su wa ŋinni. 43Wa basi ate wa dɔ wusum ale toroko ase waai ale pai a saŋ wa ŋaaŋ la, ate nuruba a de wa niŋ a nuem ayen, <<Ni te suik.>> Wa basi ate wa a nya Ejipiti tɛŋka meena zuk.

44Faaro yaa weeni Josefi ayen, <<Mi ka Faaro alege fi a dan kan weeni wari ya, nuru karo a zak wa nisa yaase wa naŋ Ejipiti tɛŋka po.>> 45Faaro yaa te Josefi yuei ayen Zafenat Panea a ŋman pai nipok a te wa, wa yuei ale Asenat. Wa jam ka Potifera On kaabteerɔwa lie. Josefi yaa jam nyiem Ejipiti tɛŋka meena po.

46Josefi a jam ta ka bena pisita ale piilim a tom a te Faaro Ejipiti naawa la. Ate Josefi a yaa basi Faaro ale cheŋ gilim Ejipiti tɛŋka. 47Bena ŋayopɔiwa po tɛŋka a jam sueri ale ŋandiinta nna yegayega. 48Josefi yaa jam tuesi ŋandiintaŋa yegayega meena ale jam nye bena ŋayopɔiwa Ejipiti tɛŋka po la a ta ga dueni tɛŋ kpieŋsaŋa po. Ate tɛŋ meena ate ba bori ŋanta la, wa pai ŋa a dueni ka ka dek po. 49Josefi yaa dueni kpari ŋanta nna yegayega ase beli tintain busuŋ la. Ŋa jam piisi ka nna yegayega ate wa ŋman zɛ ŋa nɔi ya.

50Alege ate kɔmmu benaŋa a jam la, Potifera ale ka On kaabteerɔ la, wa liewa Asenat a jam biak ka nidoabilisa baye a te Josefi. 51Josefi yaa jam te bikpagni yue ayen Manasa ale weeni ayen, <<Diila Wen a nye kama ate m baŋ m daanika meena ale m kowa yenni demma meena wari.>> 52Nidoabi dii ale pai a saŋ la wa te wa yue ayen Ɛfraim ale weeni ayen, <<Diila ka Wen ale basi ate m biak nidoabilisa tɛŋ kaai po ate m nam la.>>

53Benna ŋayopɔiwa ate ŋandiinta yegayega a jam boro la yaa kpeglim, 54ate bena ŋayopɔiwa kɔmmu yaa piilim, ase Josefi ale weeni diila. Kɔm ale jam bo tɛŋ sinsila, alege Ejipiti tɛŋka po meena ŋandiinta jam boro kama. 55Ase Ejipiti demma meena ale jam miŋ ayen kɔm a boro la, nuruma yaa jam kaari te Faaro ayen ti a yaali ka ŋandiinta. Ate Faaro yaa weeni Ejipiti demma meena ayen, <<Ni cheŋ Josefi jigi a nye dii meena ate wa a weeni ni la.>>

56Ase kɔmmu ale tagli tɛŋka meena la, Josefi yaa lak ŋandiintaŋa yeeŋa a pai da te Ejipiti demma, dii nyiŋla kɔmmu a jam pagra kama Ejipiti tɛŋka meena po. 57Ate tɛŋsaŋa meena yaa jan jam Ejipiti ayen ba da ŋandiinta Josefi jigi, dii nyiŋla kɔmmu a jam pagra kama tɛŋzuk de meena.

Currently Selected:

Piilimka 41: BWU

Highlight

Compare

Copy